Header Ads

ເມືອງຊຽງຮ່ອນ ແຂວງໄຊຍະບູລີ ປະກາດ 3 ນາມມະຍົດໃຫ້ບ້ານຫົວເມືອງ


ວັນທີ່ 14 ທັນວາ 2017 ນີ້ ຢູ່ບ້ານຫົວເມືອງ ເມືອງຊຽງຮ່ອນ ອົງການປົກຄອງເມືອງ ໄດ້ຈັດພິທີປະກາດບ້ານດັ່ງກ່າວ ເປັນບ້ານຍຸດຕິການຖາງປ່າເຮັດໄຮ່ແບບເລື່ອນລອຍ, ບ້ານແບບຢ່າງສາທາລະນະສຸກ ແລະ ບ້ານວັດທະນະທຳ ໂດຍການເປັນປະທານ ທ່ານ ສໍາລານ ແປງສະຫວ່າງ ເລຂາພັກເມືອງ ເຈົ້າເມືອງໆຊຽງຮ່ອນ, ມີອໍານາດການປົກຄອງເມືອງ, ແຂກຖືກເຊີນຈາກຕ່າງເມືອງ, ພ້ອມດ້ວຍພາກສ່ວນກ່ຽວຂ້ອງຂອງເມືອງ, ອົງການປົກຄອງບ້ານ ແລະ ປະຊາຊົນພາຍໃນບ້ານເຂົ້າຮ່ວມ.



ໃນພິທີ ທ່ານ ບຸນມີ ປັນຍາທອງ ຫົວໜ້າຫ້ອງການຖະແຫຼງຂ່າວ ວັດທະນະທຳ ແລະ ທ່ອງທ່ຽວເມືອງ ໄດ້ຂື້ນກ່າວເປີດພິທີເປັນທາງການ, ທ່ານ ສົມ ຍິ່ງຍົດ ເລຂາໜ່ວຍພັກ ນາຍບ້ານໆຫົວເເມືອງ ໄດ້ຂື້ນຜ່ານບົດສະຫຼຸບ ການສ້າງບ້ານຢຸດຕິການຖາງປ່າເຮັດໄຮ່ແບບເລື່ອນລອຍ,ບ້ານ ສາທາລະນະສຸກແບບຢ່າງ ແລະ ບ້ານວັດທະນະທຳ ທ່ານກ່າວວ່າ: ບ້ານຫົວເມືອງຢູ່ຫ່າງຈາກເທດສະບານເມືອງ ປະມານ 16 ກິໂລແມັດ ເປັນບ້ານຊົນເຜົ່າປະສົມ ເຜົ່າລາວ, ເຜົ່າລື້, ເຜົ່າຍວນ ແລະ ເຜົ່າກື່ມມຸ ປະກອບມີ 22 ໜ່ວຍຄຸ້ມຄອງພົນລະເມືອງ, ມີ 276 ຄອບຄົວ,ມີ ພົນລະເມືອງ 1,611 ຄົນ, ຍີງ 779 ຄົນ, ອາຊີບສ່ວນໃຫຍ່ແມ່ນການປູກຝັງ, ລ້ຽງສັດ ແລະຫຍິບແສ່ວອັນພົ້ນເດັ່ນ ແມ່ນການປູກເຂົ້າ, ຜ່ານການຕີລາຄາຜົນໄດ້ຮັບໃນການສ້າງບ້ານຍຸດຕິການຖາງປ່າເຮັດໄຮ່ແບບເລື່ອນລອຍ, ບ້ານແບບຢ່າງສາທາລະນະສຸກ ແລະ ບ້ານວັດທະນະທຳ ຄື: 


ການສ້າງບ້ານຍຸດຕິການຖາງປ່າເຮັດໄຮ່ແບບເລື່ອນລອຍ 5 ມາດຖານ ມາຮອດປະຈຸບັນພາຍໃນບ້ານມີຄອບຄົວຢຸດຕິການຖາງປ່າເຮັດໄຮ່ແບບເລື່ອນລອຍທັງໝົດ 238 ຄອບຄົວ, ເທົ່າກັບ 86,2% ຂອງຄອບຄົວທັງໝົດ, ການສ້າງບ້ານແບບຢ່າງສາທາລະນະສຸກແບບຢ່າງຕາມ 10 ມາດຖານ ມາຮອດປະຈຸບັນມີທັງໝົດ 233 ຄອບຄົວ, ເທົ່າກັບ 84,42 % ຂອງຄອບຄົວທັງໝົດຖືວ່າບັນລຸຕາມຄາດໝາຍກະຊວງສາທາລະນະສຸກວາງໄວ້ ແລະ  ໂດຍເຫັນໄດ້ເຖີງວັດທະນະທຳອັນດີງາມຂອງເຜົ່າ ປະຊາຊົນພາຍໃນບ້ານ ໄດ້ພ້ອມກັນປົກປັກຮັກສາ ຮີດຄອງປະເພນີອັນດີງາມຂອງເຜົ່າ ທີ່ເປັນເອກະລັກຂອງຊາດ ແລະ ຂອງທ້ອງຖີ່ນໄດ້ເປັນຢ່າງດີ,


ເສີມຂະຫຍາຍວັນນະຄະດີທີ່ເປັນເອກະລັກທາງດ້ານວັດທະນະທຳ, ທີ່ມີມາແຕ່ດັ່ງເດີມ ຈົນມາເຖິງປະຈຸບັນ, ຜ່ານການຊຸກຍູ້ການສ້າງຄົນ, ຄອບຄົວ ແລະ ບ້ານວັດທະນະທຳ ຂອງຫ້ອງການຖະແຫຼງຂ່າວ ວັດທະນະທຳ ແລະ ທ່ອງທ່ຽວເມືອງ ເຫັນວ່າຄອບຄົວ ທີ່ຄົບຕາມ 5 ມາດຖານເງື່ອນໄຂອງຄອບຄົວວັດທະນະທຳ ທີ່ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວວາງອອກມີ 234 ຄອບຄົວກວມເກືອບ 84,78% ຂອງຈຳນວນຄອບຄົວທັງໝົດ.



ໃນພິທີ ທ່ານ ສໍາລານ ແປງສະຫວ່າງ ເລຂາພັກເມືອງ ເຈົ້າເມືອງໆຊຽງຮ່ອນກໍ່ໄດ້ຂື້ນມອບໃບຢັ້ງຢືນທັງ 3 ນາມມະຍົດໃຫ້ບ້ານຢ່າງສົມກຽດ. ພ້ອມນັ້ນທ່ານກໍໄດ້ມີຄຳເຫັນສະແດງຄວາມຊົມຊີຍທີ່ອົງການປົກຄອງບ້ານ ແລະ ປະຊາຊົນພາຍໃນບ້ານ ໄດ້ພ້ອມກັນເປັນເຈົ້າການສ້າງບ້ານຂອງຕົນເອງ ໃຫ້ກາຍບ້ານຍຸດຕິການຖາງປ່າເຮັດໄຮ່ແບບເລື່ອນລອຍ, ບ້ານແບບຢ່າງສາທາລະນະສຸກ ແລະ ບ້ານວັດທະນະທຳ, ເຮັດໃຫ້ເມືອງຊຽງຮ່ອນ ເປັນໃຈກາງຜະລິດກະສິກໍາ 4 ເມືອງເໜືອ, ສຸມໃສ່ຜະລິເຂົ້າ, ປູກຜຶດເປັນສິນຄ້າ, ຂີດຢາງພາລາເປັນປາຍແຫຼມຕິດພັນກັບອຸດສາຫະກໍາປຸງແຕ່ງ ພ້ອມທັງເພີ່ມທະວີການອານຸລັກທາງດ້ານວັດທະນະທຳອັນດີງາມ ທັງປົກປັກຮັກສານາມມະຍົດ ບ້ານວັດທະນະທຳໃຫ້ຍືນຍົງຕະຫຼອດ ໃນພິທີຜູ້ເຂົ້າຮ່ວມກໍ່ຍັງໄດ້ຮັບຊົມການສະແດງສິລະປະວັນນະຄະດີຂອງນ້ອງນັກຮຽນດ້ວຍບັນຍາກາດຟົດຟື້ນ.
   

ຈາກນັ້ນ ຄະນະປະທານພ້ອມດ້ວຍແຂກທີ່ເຂົ້າຮ່ວມ ໄດ້ພ້ອມກັນລັ່ນຄ້ອງ 9 ບາດ ແລະ ເປີດປ້າຍບ້ານຍຸດຕິການຖາງປ່າເຮັດໄຮ່ແບບເລື່ອນລອຍ, ບ້ານແບບຢ່າງສາທາລະນະສຸກ ແລະ ບ້ານວັດທະນະທຳໃຫ້ແກ່ບ້ານຫົວເມືອງຢ່າງສົມກຽດ.


ຂ່າວ : ດິ່ງ ໄທແກ່ນ ລາຍງານຈາກເມືອງຊຽງຮ່ອນ ແຂວງໄຊຍະບູລີ



------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com




No comments

Powered by Blogger.