Header Ads

ສພຂ ເຊກອງ ໄຂກອງປະຊຸມສະໄໝສາມັນເທື່ອທີ 4




ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງເຊກອງຊຸດທີ I ໄດ້ໄຂຂຶ້ນຢ່າງເປັນທາງການໃນວັນທີ 27 ທັນວາ 2017 ທີ່ເມືອງລະມາມແຂວງເຊກອງ, ພາຍໃນຕ້ການເປັນປະທານຂອງທ່ານ ພອນເພັດ ຄິວລະວົງ ປະທານສະພາປະຊາຊົນແຂວງ ແລະໃຫ້ກຽດເຂົ້າຮ່ວມມີທ່ານ ຄຳເຜີຍ ບຸດດາວຽງ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆເຊກອງ, ທ່ານ ວິໄລວົງ ບຸດດາຄໍາ ກໍາມະການຄະນະປະຈໍາ, ປະທານກໍາມາທິການແຜນການ, ການເງິນ ແລະການກວດສອບສະພາແຫ່ງຊາດ, ມີການນໍາພັກ-ລັດຂັ້ນແຂວງ-ເມືອງ, ຄະນະປະທານກອງປະຊຸມຕະຫຼອດເຖິງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງເຂົ້າຮ່ວມ.



ທ່ານ ພອນເພັດ ຄິວລະວົງ ກ່າວວ່າ: ກອງປະຊຸມຄັ້ງນີ້ ໄດ້ໄຂຂຶ້ນໃນທ່າມກາງທີ່ທົ່ວພັກ, ທົ່ວກອງທັບ ແລະ ທົ່ວປວງຊົນລາວທັງຊາດ ໂດຍສະເພາະແຂວງເຊກອງພວມສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ, ມະຕິ IX ຂອງອົງຄະນະພັກແຂວງ, ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ 5 ປີຄັ້ງທີ VIII ຂອງລັດ ກໍຄືຂອງແຂວງດ້ວຍຈິດໃຈບຸກທະລຸທັງ 4 ດ້ານ ກໍຄືການສ້າງຂະບວນການແຂ່ງຂັນຮັກຊາດ ແລະພັດທະ ນາຊຸກຍູ້ວຽກງານ 3 ສ້າງ.


ໂດຍກອງປະຊຸມຄັ້ງນີ້ ພວກເຮົາຈະໄດ້ສຸມໃສ່ພິຈາລະນາ ແລະຮັບຮອງເອົາບັນຫາສຳຄັນຂອງແຂວງເຊັ່ນ: ພິ ຈາລະນາຮັບຮອງເອົາຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມປີ 2017 ແລະທິດທາງແຜນການປະຈໍາປີ 2018; ຮັບຮອງເອົາບົດລາຍງານກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງປະຈໍາປີ 2017 ແລະທິດທາງແຜນການປະຈໍາປີ 2018; ຮັບຮອງເອົາບົດລາຍງານກ່ຽວກັບການກວດກາຕາມຜົນການກວດສອບການຈັດ ຕັ້ງປະຕິບັດແຜນງົບປະມານແຫ່ງລັດສົກປີ 2013-2014 ແລະ ສົກປີ 2014-2015; ຮັບຮອງເອົາບົດລາຍງານກ່ຽວກັບການຈັດຕັ້ງປະຕິບັດແຜນປະຈໍາປີ 2017 ແລະທິດທາງແຜນການປີ 2018 ແລະຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດສົກປີ 2015-2016 ຂອງອົງການກວດສອບແຫ່ງລັດປະຈໍາພາກໃຕ້; ບົດລາຍງານກ່ຽວກັບການຈັດຕັ້ງປະຕິບັດແຜນການປີ 2017 ແລະ ທິດທາງແຜນການປີ 2018 ຂອງອົງການໄອຍະການປະຊາຊົນ ແລະສານປະຊາຊົນ; ບົດລາຍງານຂອງພະແນກຍຸຕິທຳກ່ຽວກັບການຈັດຕັ້ງປະຕິບັດຄຳຕັດສິນຂອງສານທີ່ໃຊ້ໄດ້ຢ່າງເດັດຂາດໃນໄລຍະຜ່ານມາ ແລະທິດທາງແກ້ໄຂໃນຕໍ່ໜ້າ; ບົດສະຫຼຸບກ່ຽວກັບການຈັດຕັ້ງປະຕິບັດແຜນການປີ 2017 ແລະທິດທາງແຜນການປະຈໍາປີ 2018 ຂອງສະພາປະຊາຊົນແຂວງ ແລະຮັບຮອງເອົາບັນດາໜ້າວຽກ ແລະບັນຫາສຳຄັນອື່ນໆຂອງແຂວງ.




ທີ່ປະຊຸມທ່ານ ຄຳເຜີຍ ບຸດດາວຽງ ກໍໄດ້ຂຶ້ນຜ່ານບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມປີ 2017 ແລະ ທິດທາງແຜນການປະຈໍາປີ 2018 ໃນນັ້ນທ່ານໄດ້ກ່າວວ່າ : ສະພາບໂດຍລວມທົ່ວແຂວງມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ, ການແກ້ໄຂປະກົດການຫຍໍ້ທໍ້ມີການຫັນປ່ຽນຢ່າງຕັ້ງໜ້າ, ລະດັບການຂະຫຍາຍຕົວຂອງເສດຖະກິດລວມຍອດຜະລິດຕະພັນພາຍໃນ ຫຼື GDP ບັນລຸ 9,1% ແລະສະເລ່ຍໃສ່ພົນລະເມືອງເທົ່າກັບ 1.580 ໂດລາ ຫຼື ປະມານ 12,64 ລ້ານກີບ, ອັດຕາບ້ານ, ຄອບຄົວ ແລະ ຄົນທຸກຍາກນັບມື້ຫຼຸດໜ້ອຍຖອຍລົງເປັນກ້າວໆມາ.


ຂ່າວ-ພາບ : ສັນຍາ ແກ້ວໄຊຍະວົງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.