Header Ads

ເຈົ້າຄອງນະຄອນຫຼວງວຽງຈັນ ລົງຊຸກຍູ້ການເກັບລາຍຮັບເຂົ້າງົບປະມານ ຢູ່ເມືອງຫາດຊາຍຟອງ ນະຄອນຫຼວງວຽງຈັນ



ນະຄອນຫຼວງວຽງຈັນ : ຕອນບ່າຍຂອງວັນທີ 12/12/2017 ທີ່ສຳນັກງານປົກຄອງເມືອງຫາດຊາຍຟອງ ນວ ໄດ້ຈັດກອງປະຊຸມສະຫຼຸບການເກັບລາຍຮັບງົບປະມານໃນໄລຍະ 11 ເດືອນ ແລະ ແຜນການເດືອນ 12 ປີ 2017 ຂອງເມືອງຫາດຊາຍຟອງ. ໃຫ້ກຽດເຂົ້າຮ່ວມເປັນປະທານກອງປະຊຸມໂດຍ ທ່ານ ປອ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ທ່ານ ບຸນທາມ ພຸດທະວົງສາ ເຈົ້າເມືອງຫາດ ຊາຍຟອງ, ທ່ານ ຄຳມອນ ບົວພັນ ຫົວໜ້າອາກອນປະຈຳນະຄອນຫຼວງ ວຽງຈັນ, ທ່ານ ສີສຸພັນ ຮອງພະແນກການເງິນ ນວ, ບັນດາຄະນະພັກເມືອງ, ພະແນກການກ່ຽວຂ້ອງ, ບັນດານາຍບ້ານ, ພະນັກງານ-ລັດຖະກອນ ແລະ ພາກສ່ວນກ່ຽວຂ້ອງເຂົ້າຮ່ວມ.
ພາຍຫຼັງກ່າວເປີດກອງປະຊຸມ, ທ່ານ ສີແພງ ແກ້ວບຸນນຳ ຫົວໜ້າຫ້ອງການ-ການເງິນເມືອງຫາດຊາຍ ຟອງ ໄດ້ລາຍງານຕໍ່ທີ່ປະຊຸມວ່າ ປະຈຸບັນມີຫົວໜ່ວຍທຸລະກິດທີ່ເມືອງ ຄຸ້ມຄອງທັງໝົດ 2.331 ຫົວໜ່ວຍ, ເມືອງຄຸ້ມຄອງ 597 ຫົວໜ່ວຍ, ບ້ານຄູ້ມຄອງ 1,403 ຫົວໜ່ວຍ, ແບ່ງ ເປັນຫົວໜ່ວຍແຈ້ງເສຍຕາມລາຍຮັບ (ຖືບັນຊີ) 43 ຫົວໜ່ວຍ, ຫົວໜ່ວຍເສຍອາກອນມອບເໝົາ 2.000 ຫົວໜ່ວຍ, ຫົວໜ່ວຍໃຫ້ເຊົ່າ 288 ຫົວໜ່ວຍ.
– ດ້ານລາຍຮັບອາກອນມາຮອດວັນທີ 11 ທັນວາ ປະຕິບັດໄດ້ທັງໝົດ 11 ກວ່າຕື້ກີບ ເທົ່າກັບ 67,31% ຂອງແຜນການປີ ທຽບໃສ່ປີຜ່ານມາແມ່ນຫຼູດ 14,77% ເປັນເງຶນ 2 ກ່ວາຕື້ກີບ.
– ດ້ານລາຍຮັບຊັບສິນ ມາຮອດວັນທີ 11 ທັນວາ ປະຕິບັດໄດ້ທັງໝົດ 1 ກ່ວາຕື້ກີບ ເທົ່າກັບ 102.90% ຂອງແຜນການປີ ທຽບໃສ່ໄລຍະຂອງປີຜ່ານມາ ແມ່ນລື່ນ 7.19%.
ລວມລາຍຮັບທັງໝົດຂອງເມືອງຫາດຊາຍຟອງ ມາຮອດວັນທີ 11 ທັນວາ 2017 ປະຕິບັດໄດ້ 12.934.232.000 ກີບ ເທົ່າກັບ 70.00% ຂອງແຜນການປີ ຄາດວ່າໝົດປີ ຈະໄດ້ 80% ເທົ່າກັບ 14.802.000.000 ກີບ.
ສຳລັບຂໍ້ຫຍຸ້ງຍາກ ແລະ ສາຍເຫດທີ່ເກັບລາຍຮັບບໍ່ບັນລຸຕາມແຜນການມີດັ່ງນີ້:

1. ບາງຫົວໜ່ວຍຜູ້ດຳເນີນທຸລະກິດບໍ່ປະຕິບັດພັນທະຂອງຕົນຖືກຕ້ອງຕາມກົດໝາຍເຊັ່ນ: ບໍ່ແຈ້ງເສຍອາກອນຕາມລາຍຮັບຕົວຈິງ, ບໍ່ເສຍອາກອນຕາມການຄິດໄລ່, ບໍ່ຖືບັນຊີຕາມກົດໝາຍການບັນຊີ, ໜີ້ຄ້າງຈ່າຍຫຼາຍເດືອນ (ທວງເອົາຍາກ) ແລະ ອື່ນໆ…
2.ລະບົບກົນໄກການຕິດຕາມ, ຄຸ້ມຄອງຍັງບໍ່ທັນຫັດກຸມ, ບໍ່ທັນເປັນແບບລວມສູນໃນຂອດການເກັບກຳຂໍ້ມູນ ແລະ ປະສານງານ, ລວມທັງບາງພະນັກງານຈຳນວນໜື່ງທີ່ເຮັດວຽກວິຊາສະເພາະນີ້ ຍັງບໍ່ທັນໜັກແໜ້ນຕໍ່ຄວາມຮັບຜິດຊອບໜ້າທີ່ການເມືອງຂອງຕົນເທົ່າທີ່ຄວນ.
ພາຍຫຼັງຮັບຟັງການລາຍງານ ທ່ານ ສິນລະວົງ ຄຸດໄພທູນ ປະທານກອງປະຊຸມ ກໍໄດ້ໃຫ້ທິດຊີ້ນຳ ແລະ ທິດທາງແຜນວຽກຈຸດສຸມທີ່ເມືອງ ຕ້ອງເລັ່ງໃສ່ຈັດຕັ້ງປະຕິບັດການຈັດເກັບລາຍຮັບ ໂດຍມີ 5 ແຫຼ່ງ ດັ່ງນີ້:
1. ເລັ່ງຈັດເກັບຄ່າທຳນຽມທາງ ຕາມລັດຖະບັນຍັດຂອງປະທານປະເທດ ທີ່ປະກາດໃຊ້ແລ້ວນັ້ນ, ຕົ້ນຕໍກໍແມ່ນຕ້ອງລະດົມພະນັກງານ-ລັດຖະກອນ ຂອງເມືອງໃຫ້ເປັນແບບຢ່າງ ໃນການຕື່ນຕົວປະຕິບັດໜ້າທີ່ ແລະ ພັນທະຂອງຕົນຕໍ່ປະເທດຊາດ ກໍຄືນະຄອນຫຼວງວຽງຈັນ.
2. ຫ້ອງການໂຍທາທິການ-ຂົນສົ່ງເມືອງ ຕ້ອງກວດກາຕິດຕາມ ຂື້ນບັນຊີຖະໜົນ ເສັ້ນທາງ ແລະ ພາຫະນະລົດພາຍໃນເມືອງຂອງຕົນ ເພື່ອຮູ້ໄດ້ສະຖິຕິ ແລະ ຕົວເລກບັນຊີທີ່ຕົນຄຸ້ມຄອງມີເທົ່າໃດ, ທັງນີ້ ຫ້ອງການຊັບພະຍາກອນທຳມະຊາດ ແລະ ສີ່ງແວດລ້ອມຂອງເມືອງ ກໍຕ້ອງເກັບກຳໄດ້ຂໍ້ມູນ, ບັນຊີ ການຫັນປ່ຽນທີ່ດິນກະສິກຳ, ສຸມໃສ່ການເກັບພາສີທີ່ດິນ, ແຮ່ຊາຍ ດິນຈົກຂາຍ….
3. ຕິດຕາມເກັບເອົາຈາກໜີ້ທວງ, ໜີ້ຄ້າງຈ່າຍ ທີ່ຍັງຄົງຄ້າງ ກໍລະນີຍັງສືບຕໍ່ມີຄວາມຫຍຸ້ງຍາກກໍໃຫ້ອີງໃສ່ລະບຽບ ແລະ ກົດໝາຍ ເພື່ອຈັດຕັ້ງປະຕິບັດ ແລະ ແກ້ໄຂ.
4. ເອົາໃຈໃສ່ ເກັບຈາກຄ່າເຊົ່າ, ຄ່າສຳປະທານ ໃນຂອບເຂດພື້ນທີ່ຂອງເມືອງຕົນຮັບຜິດຊອບ.
5. ເກັບຈາກຄ່າທຳນຽມຈາກການປຸກສ້າງ ຫຼື ການປຸກສ້າງໃໝ່.
ທັງນີ້ຈະປະຕິບັດໄດ້ການຈັດເກັບຈາກ 5 ແຫຼ່ງດັ່ງກ່າວ ອົງຄະນະພັກເມືອງ-ອົງການປົກຄອງເມືອງ ແມ່ນຕ້ອງສ້າງແຜນການຈັດເກັບ ໃຫ້ເປັນແຜນວຽກຈັດຕັ້ງປະຕິບັດຢ່າງຊັດເຈນ, ມີການແບ່ງປັນຂັ້ນຄຸ້ມຄອງໃນການຈັດເກັບ ຂັ້ນເມືອງ ຂັ້ນ ບ້ານ… ໃຫ້ປະຕິບັດກົນໄກລວມສູນອັນດຽວກັນ. ປຶກສາຫາລື ແລະ ຂຸດຄົ້ນອັນໃດທີ່ເປັນທ່າແຮງ ເປັນແຫຼ່ງລາຍຮັບບົ່ມຊ້ອນໃນການສ້າງລາຍຮັບ ແລະ ຈະຈັດເກັບລາຍຮັບໄດ້ ຈາກສີ່ງນັ້ນ ພາຍໃນເມືອງຂອງຕົນ ເຊັ່ນ: ສະຖານທີ່ທ່ອງທ່ຽວ, ການກະສິກຳອິນຊີ, ການດຶງດູດທ່ອງທ່ຽວລະຫວ່າງເຂດເຊື່ອມຕໍ່ຊາຍແດນ…. ໂດຍຕິດພັນກັບປີທ່ອງທ່ຽວລາວ 2018 ນີ້.
ອັນສຳຄັນທີ່ຕິດພັນກັບການປະຕິບັດໃຫ້ບັນລຸໄດ້ຕາມຄາດໝາຍກໍແມ່ນຕ້ອງຍຶດເອົາການປະຕິບັດ 3 ຫຼຸດ 3 ເພີ່ມ 3 ຂະບວນການ ຕາມທີ່ມະຕິຄະນະບໍລິຫານງານວາງອອກ.
ພາບ ແລະ ຂ່າວ: ວຽງຈັນໃຫ່ມ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.