Header Ads

ທ່ານ ສອນໄຊ ສີພັນດອນ ຕ້ອນຮັບຄະນະ​ຊ່ຽວຊານ ນໍ້າ​ເທີນ 2




​​ໃນ​ຕອນ​ແລງຂອງ​ວັນ​ທີ 28 ​ພະຈິກ 2017 ທີ່​ສຳນັກງານ​ນາຍົກລັດຖະມົນຕີ ທ່ານ ສອນໄຊ ສີພັນດອນ ຮອງ​ນາຍົກລັດຖະມົນຕີ ​ໄດ້​ໃຫ້ກຽດຕ້ອນຮັບ ການ​ເຂົ້າຢ້ຽມຂ່ຳນັບຂອງ ທ່ານ ​ເດ​ວິດ ​ແມ໋ກ​ໂດ​ແວນ ຊ່ຽວຊານ​ສາກົນ ດ້ານ​ສັງຄົມ ​ແລະ ສິ່ງ​ແວດ​ລ້ອມ ສຳລັບ​ໂຄງການ​ນ້ຳ​ເທີນ 2 ຢູ່ ສປປ ລາວ ພ້ອມ​ດ້ວຍ​ຄະນະ ​ໃນ​ໂອກາດ​ເດີນທາງ​ມາ​ຕິດຕາມ​ກວດກາ ​ການຈັດຕັ້ງປະຕິບັດ​ວຽກງານຍົກຍ້າຍ​ຈັດ​ສັນ​ຂອງ​ໂຄງການ​ນໍ້າ​ເທີນ 2.

​ໂອກາດນີ້, ທ່ານ ​ເດ​ວິດ ​ແມ໋ກ​ໂດ​ແວນ ຊ່ຽວຊານ​ສາກົນ ດ້ານ​ສັງຄົມ ​ແລະ ສິ່ງ​ແວດ​ລ້ອມ ສຳລັບ​ໂຄງການ​ນ້ຳ​ເທີນ 2 ​ໄດ້​ລາຍ​ງານ​ໃຫ້​ຊາບ ກ່ຽວກັບ​ການ​ມາ​ຕິດຕາມ​ກວດກາ​ວຽກງານ ຄັ້ງທີ 27 ​ໃນ​ລະຫວ່າງ​ວັນ​ທີ 18 ມີນາ ຫາ 24 ພະຈິກ 2017 ​ໂດຍ​ສະ​ເພາະ ​ແມ່ນວຽກງານ​ການ​ຍົກຍ້າຍ​ຈັດ​ສັນ ​ແລະ ຟື້ນຟູ​ຊີວິດ​ການ​ເປັນ​ຢູ່ ຂອງ​ຜູ້​ຖືກ​ຜົນ​ກະທົບ ຢູ່​ພູ​ພຽງນາ​ກາຍ ​ແລະ ວຽກງານ​ຄຸ້ມ​ຄອງ-ປົກ​ປັກ​ຮັກສາ ອ່າງ​ໂຕ່ງ​ນ້ຳ​ເທີນ 2 ຊຶ່ງ​ຖື​ໄດ້​ວ່າ ​ເປັນ​ເທື່ອ​ສຸດ​ທ້າຍ ​ໃນ​ການ​ປະ​ເມີນ ​ແລະ ​ໃຫ້​ຄຳ​ແນະນຳ ຕໍ່ການຈັດຕັ້ງປະຕິບັດ​ວຽກງານ​ດັ່ງກ່າວ ອັນເຫັນ​ໄດ້​ວ່າ ໝົດປີ 2017 ນີ້ ຈະ​ສາມາດ​ສຳ​ເລັດ​ໂຄງການ​ໃນ 100 ກວ່າ​ກິດຈະກຳ ​ທີ່ໄດ້ມີ​ຄວາມ​ຄືບໜ້າຫຼາຍດ້ານ ​ປະກອບ​ດ້ວຍ 7 ​ແຜນ​ປະຕິບັດ​ງານ 4 ອາຊີ​ບ ຄື: ປ່າ​ໄມ້, ປູກຝັງ, ລ້ຽງສັດ-​ປະມົງ ​ແລະ ທຸລະ​ກິດ​ຂະໜາດນ້ອຍ. ນອກຈາກ​ນັ້ນ, ຍັງ​ມີ​ກິດຈະກຳ​ຈຳນວນໜຶ່ງ ທີ່​ຈະ​ໄດ້​ສືບຕໍ່ຈັດຕັ້ງປະຕິບັດ ​ໃນ​ປີ 2018 ​ແລະ ສືບຕໍ່ປະຕິບັດ​ແຜນ​ໄລຍະ​ກາງ ​ແຕ່ປີ 2018-2035.

​​ໃນ​ຕອນ​ທ້າຍ​, ທ່ານຮອງ​ນາຍົກລັດຖະມົນຕີ ຍັງ​ສະ​ແດງ​ຄວາມຂອບ​ໃຈ ຕໍ່ຄະນະ​ຊ່ຽວຊານ​ສາກົນ ດ້ານ​ສັງຄົມ ​ແລະ ສິ່ງ​ແວດ​ລ້ອມ ສຳລັບ​ໂຄງການ​ນ້ຳ​ເທີນ 2 ທີ່​ໄດ້​ເອົາ​ໃຈ​ໃສ່​ໃນ​ການ​ຕິດຕາມ​ກວດກາ ການຈັດຕັ້ງປະຕິບັດ​ວຽກງານຍົກຍ້າຍ​ຈັດ​ສັນ​ຂອງ​ໂຄງການ​ນ້ຳ​ເທີນ 2 ​ໃນ​ຕະຫຼອດ​ໄລຍະຫຼາຍປີ​ທີ່​ຜ່ານ​ມາ ອັນ​ເປັນ​ຂໍ້​ມູນ​ທີ່​ສຳຄັນ ​ເພື່ອໝູນ​ໃຊ້​ເຂົ້າ​ໃນ​ວຽກງານ​ການພັດທະນາ​ແບບ​ຍືນ​ຍົງ (SDGs) ທີ່​ສະຫະ​ປະຊາ​ຊາດ​ໄດ້​ກຳນົດ​ໄວ້ ​ແລະ ຫວັງຢ່າງ​ຍິ່ງ​ວ່າ ການ​ສຶກສາຄົ້ນຄວ້າ ​ແລະ ວາງ​ແຜນ​ໃນຕໍ່ໜ້າ ສຳລັບ​ໂຄງການ​ນ້ຳ​​ເທີນ 2 ນັ້ນ ຈະເປັນ​ແບບຢ່າງໜຶ່ງ ​​ເພື່ອ​ເປັນ​ບົດຮຽນໃຫ້​ແກ່​ການ​ສ້າງ​ບ້ານ​ພັດທະນາ ກໍ່ຄື​ການຈັດຕັ້ງປະຕິບັດ​ວຽກງານ 3 ສ້າງ ທີ່​ພັກ ​ແລະ ລັດຖະບານ​ວາງ​ອອກ ​ໃຫ້​ມີ​ການ​ລວມສູນ ​ແລະ ຈຸດ​ສຸມ​ໃນ​ການ​ພັດທະນາຫຼາຍຂຶ້ນ.


 ພາບ ແລະ ຂ່າວ: ສນຍ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.