Header Ads

ຍ້ອນຫິວເສບ ຈຶ່ງຊອກລັກ ຈັບຂະຫຍາຍຜົນໄດ້ຜູ້ຢູ່ເບື້ອງຫຼັງ



ຍ້ອນຫິວເສບຢາບ້າ ຈຶ່ງຊອກລັກຊັບພົນລະເມືອງ (ລົດຈັກ) ເຊິ່ງເປັນຄໍາສະລະພາບຂອງເດັກໄວລຸ້ນອາຍຸພຽງ 14 ປີ ທີ່ຕົກເປັນທາດຂອງຢາເສບຕິດແຕ່ເຍົາໄວ ພາຍຫຼັງເຈົ້າໜ້າທີ່ຕໍາຫຼວດສືບສວນ-ສອບສວນຄະດີອາຍາ ປກສ ເມືອງສີສັດຕະນາກ ນະຄອນຫຼວງວຽງຈັນ ກັກຕົວໃນທ້າຍເດືອນສິງຫາ 2017 ໂດຍພວກກ່ຽວກໍ່ເຫດມາແລ້ວຫຼາຍຄັ້ງ ສ່ວນຫຼາຍແມ່ນລັກລົດຈັກຂອງພົນລະເມືອງ ໃນຂອບເຂດໃນນະຄອນຫຼວງວຽງຈັນ ເພື່ອໄປຂາຍ ແລະ ແລກຢາບ້າໄປເສບ ເຊິ່ງການກະທໍາດັ່ງກ່າວມີຜູ້ຢູ່ເບື້ອງຫຼັງ ນັ້ນກໍຄືຜູ້ຮັບຊື້ລົດຈັກທີ່ລັກມາແຕ່ລະຄັ້ງ. ແຕ່ກໍຖືກເຈົ້າໜ້າທີ່ຕໍາຫຼວດຕິດຕາມຈັບຕົວໄດ້ 2 ຄົນ ຂໍ້ຫາຊື້ຊັບຜິດກົດໝາຍ.



ເຈົ້າໜ້າທີ່ຕໍາຫຼວດ ວິຊາສະເພາະ ປກສ ເມືອງສີສັດຕະນາກ ໄດ້ໃຫ້ຮູ້ວ່າ: ສືບເນື່ອງມາຈາກການຕິດຕາມຈັບຕົວ ໄວລຸ້ນ 2 ຄົນ ທີ່ກໍ່ເຫດລັກລົດຈັກປະຊາຊົນ ໃນເດືອນສິງຫາ 2017 ຊື່ທ້າວ ເກດສະດາ ຫຼື ເຕີ້ ອາຍຸ 14 ປີ ຢູ່ບ້ານບຶງຂະຫຍອງ ເມືອງສີສັດຕະນາກ ແລະ ທ້າວ ບ໋ອກ ອາຍຸ 14 ປີ ຢູ່ບ້ານໜອງປາໃນ ເມືອງຈັນທະບູລີ ນະຄອນຫຼວງວຽງຈັນ. ຈາກນັ້ນ, ຈຶ່ງສອບສວນຂະຫຍາຍຜົນຫາຜູ້ຢູ່ເບື້ອງຫຼັງທີ່ອໍານວຍຄວາມສະດວກໃຫ້ເດັກນ້ອຍທັງສອງຄົນກະທໍາຜິດໃນຄັ້ງນີ້ ຮອດວັນທີ 30 ສິງຫາ 2017 ຈຶ່ງຈັບຕົວໄດ້ທ້າວ ຖາວອນ ຫຼື ແປ ອາຍຸ 35 ປີ ຢູ່ບ້ານຝາຍ ເມືອງໄຊເສດຖາ ແລະ ທ້າວ ອຸເທນ ອາຍຸ 30 ປີ ຢູ່ບ້ານນາທາມ ເມືອງຫາດຊາຍຟອງ ນະຄອນຫຼວງວຽງຈັນ.


ສ່ວນທ້າວ ເກດສະດາ ແລະ ທ້າວ ບ໋ອບ ເປັນໄລຍະການກະທໍາຜິດຂອງເດັກທັງສອງມີອາຍຸພຽງ 14 ປີ ຖືວ່າຍັງເປັນເດັກທີ່ອາຍຸບໍ່ເຖິງກະສຽນທາງກົດໝາຍອາຍາ, ແຕ່ກໍເປັນການກະທໍາຜິດທີ່ມີຄວາມເສຍຫຼາຍ ຈຶ່ງໄດ້ກັກຕົວໄວ້ກ່ອນເພື່ອສຶກສາອົບຮົມບໍ່ໄປກະທໍາຜິດອີກ. ຈາກການສອບຖາມເດັກທັງສອງ ການກະທໍາຜິດໃນຄັ້ງນີ້ ເພື່ອຢາກໄດ້ເງິນໄປຊື້ຢາບ້າໄປເສບ ແລະ ນໍາເງິນໄປໃຊ້ຈ່າຍຫຼີ້ນຟຸມເຟືອຍ. ສໍາລັບ ທ້າວ ຖາວອນ ແລະ ທ້າວ ອຸເທນ ແມ່ນກັກຕົວດໍາເນີນຄະດີໃນຂໍ້ຫາຊື້ຊັບຜິດກົດໝາຍ.


ທ້າວ ຖາວອນ ສາລະພາບວ່າ: ຜ່ານມາຜູ້ກ່ຽວໄດ້ຮັບຊື້ລົດຈັກຜິດກົດໝາຍທີ່ບັນດາໄວລຸ້ນລັກມາຂາຍໃຫ້ ຈໍານວນ 6 ຄັ້ງ ໄດ້ລົດຈັກ 6 ຄັນ ແລ້ວນໍາໄປດັດແປງສະພາບເຕັກນິກ ກ່ອນໄປຂາຍຕໍ່ ເຊັ່ນ: ໃນເດືອນກໍລະກົດ 2017 ຜູ້ກ່ຽວໄດ້ຊື້ລົດຈັກຮອນດ້າ 250 CC ນໍາ ທ້າວ ກ໋ອກ ອາຍຸ 30 ປີ ຢູ່ເຂດບ້ານທົ່ງຂັນຄໍາ ເມືອງຈັນທະບູລີ ນະຄອນຫຼວງວຽງຈັນ. ຈາກນັ້ນ, ກໍນໍາໄປດັດແປງສະພາບລົດ ແລ້ວກໍໄປຂາຍໄດ້ເງິນ 3.000.000 ກີບ; ມາເດືອນສິງຫາ 2017 ຜູ້ກ່ຽວໄດ້ຊື້ລົດຈັກ ຊີບີອາ ແລະ ລົດຈັກເວບ 100 ສີແດງດໍາ ນໍາທ້າວ ເກດສະດາ ແລະ ທ້າວ ບ໋ອບ ແລ້ວນໍາມາດັບແປງສະພາບລົດ ຈຶ່ງນໍາໄປຂາຍຕໍ່ ແລະ ໃນເດືອນດຽວກັນໄດ້ຊື້ລົດຈັກເວບ 100 ສີແດງດໍາ ຈໍານວນ 3 ຄັນ ຈາກທ້າວ ກ໋ອກ. ຈາກນັ້ນ, ກໍນໍາມາດັດແປງສະພາບລົດ ແລ້ວໄປຂາຍຕໍ່.
ນອກນີ້, ທ້າວ ຖາວອນ ຍັງສາລະພາບອີກວ່າ: ຜ່ານມາ ຍັງໄດ້ພົວພັນກັບຢາເສບຕິດ ປະເພດຢາບ້າ ມາແຕ່ປີ 2010 ເປັນຕົ້ນມາ, ເສບມືລະ 1-2 ເມັດ ຢາບ້າທີ່ນໍາມາເສບແມ່ນຊື້ນໍາກຸ່ມໄວລຸ້ນເສບຢາບ້າຢູ່ພາຍໃນບ້ານ. ຈາກນັ້ນ, ມາປີ 2012 ໄດ້ຖືກເຈົ້າໜ້າທີ່ກັກຕົວມາແລ້ວ 1 ຄັ້ງ ໃນຂໍ້ຫາມົ້ວສຸມຢາເສບຕິດ ພາຍຫຼັງອອກມາ ກໍກັບມາເສບອີກຄັ້ງ.

ທີ່ມາ: ນສພ ຄວາມສະຫງົບ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.