Header Ads

ສຳເລັດແລ້ວການແຂ່ງຂັນກິລາບານເຕະຊີງຂັນທ່ານເຈົ້າແຂວງຫຼວງພະບາງ ໂດຍເມືອງໂພນໄຊສູ້ສົມສັກສີຈົນເຖີງການຕັດສີນດ້ວຍການຍີງລູກຈຸດໂທດ




ການແຂ່ງຂັນກິລາບານເຕະ ຊີງຂັນທ່ານເຈົ້າແຂວງຫຼວງພະບາງ ເພື່ອສະເຫຼີມສະຫຼອງວັນຊາດ ທີ່ 2 ທັນວາຄົບຮອບ 42 ປີ ແລະ ວັນເກີດປະທານໄກສອນພົມວິຫານ ວັນທີ່ 13 ທັນວາ ຄົບຮອບ 97 ປີ ໄດ້ສຳເລັດລົງຢ່າງສະຫງ່າງາມ ໃນຕອນແລງຂອງວັນທີ່ 14 ທັນວານີ້ ພາຍຫຼັງທີ່ໄດ້ເລີ້ມຕົ້ນແຂ່ງຂັນມາແຕ່ວັນທີ່ 18 ພະຈິກ ໂດຍມີທັງໝົດ 7 ທີມເຂົ້າຮ່ວມການແຂ່ງຂັນ ແບ່ງອອກເປັນ 2 ສາຍຄື: ສາຍ(ກໍ) ປະກອບມີ ທະນາຄານແຂວງ, ເມືອງໂພນໄຊ ແລະ ທີບພະຍະປະກັນໄພ. ສາຍ(ຂໍ) ປະກອບມີ: ບໍລິສັດຮຸ່ງວິໄລກໍ່ສ້າງເຄຫາສະຖານຈຳກັດ, ລັດວິສາຫະກິດໄຟຟ້າລາວສາຂາແຂວງຫຼວງພະບາງ, ໂດມີນິກ ແລະ ນອກກອບ. 



ສຳລັບວັນທີ່ 14 ແມ່ນມີການແຂ່ງຂັນໃນຮອບຊີງຊະນະເລີດ. ໃນນັ້ນ ຊີງອັນດັບທີ່ 3 ແມ່ນ ການພົບກັນລະຫວ່າງ ບໍລິສັດຮຸ່ງວິໄລກໍ່ສ້າງເຄຫາສະຖານ ພົບກັບ ໂດມີນິກ ຜົນປະກົດວ່າ ບໍລິສັດຮຸ່ງວິໄລກໍ່ສ້າງເຄຫາສະຖານເປັນຝ່າຍຊະນະ 6 ປະຕູຕໍ່ 0 ຄ້ວາອັນດັບທີ່ 3 ໄປຄອງ, ສ່ວນຄູ່ຊີງຊະນະເລີດ ເປັນການພົບກັນລະຫວ່າງ ທະນາຄານແຂວງ ແຊ້ມກິລາບານເຕະປະຈຳປີ 2017 ພົບກັບ ເມືອງໂພນໄຊ ເຊີ່ງເປັນທີມທີ່ເຂົ້າຮ່ວມການແຂ່ງຂັນຄັ້ງທຳອິດ ຜ່ານການແຂ່ງຂັນດ້ວຍບັນຍາກາດອັນຝົດຝື້ນ ທ່າມກາງສຽງຊົມສຽງເຊຍຢ່າງຝົດສະນັ່ນ ນັກກິລາທັງສອງທີມໄດ້ແຂ່ງຂັນດ້ວຍເຕັກນິກ ແລະ ຄວາມສາມາດທີ່ພຽບພ້ອມ ຕ່າງຝ່າຍຕ່າງພັດປ່ຽນກັນບຸກ ໃນເຄີ່ງເວລາທຳອິດ ທະນາຄານແຂວງຂື້ນນຳໄປກ່ອນ ແຕ່ ເມືອງໂພນໄຊ ນຳຕີສະເໝີກ່ອນໝົດເວລາໃນເຄີ່ງທຳອິດ




 

ສ່ວນເຄີ່ງເວລາທີ່ 2 ກັບເປັນຝ່າຍເມືອງໂພນໄຊຂື້ນນຳໄປກ່ອນ 2 ປະຕູຕໍ່ 1 ຈາກນັ້ນ ການແຂ່ງຂັນ ເລີ້ມຄຶກຄັກ ຍ້ອນຝ່າຍທະນາຄານເປີດເກມບຸກຫວັງຕີສະເໝີ ແລະ ກໍ່ສາມາດຕີສະເໝີໄດ້ໃນໄລຍະຕໍ່ມາປະມານ 10 ນາທີ. ຈົບການແຂ່ງຂັນໃນເກມ 90 ນາທີ ຍັງສະເໝີກັນ 2 ປະຕູຕໍ່ 2 ຕ້ອງໄດ້ຕໍເວລາພິເສດອີກ 30 ນາທີ ໃນເກມການແຂ່ງຂັນຖືວ່າ ຝ່າຍທະນາຄານແຂວງເປັນຝ່າຍໄດ້ປຽບ ເປີດເກມບຸກຢ່າງຕໍ່ເນື່ອງ ແລະ ກໍ່ມີໂອກາດຫຼາຍຄັ້ງ ແຕ່ກໍ່ບໍ່ມີຝ່າຍໃດ ເອົາຊະນະກັນໄດ້ ຈື່ງຕ້ອງໄດ້ຕັດສີນດ້ວຍການຍີງລູກຈຸດໂທດ ຜ່ານການຍີງລູກຈຸດໂທດ ແມ່ນທະນາຄານແຂວງສາມາດຍີງໄດ້ດີກ່ວາ ແລະ ເອົາຊະນະເມືອງໂພນໄຊດ້ວຍປະຕູລວມ 6 ປະຕູຕໍ່ 5 ຄ້ວາໄຊຊະນະມາຄອງ ອີກ 1 ລາຍການສຳລັບປີນີ້. ສະຫຼຸບຜົນການແຂ່ງຂັນໃນຄັ້ງນີ້ ອັນດັບທີ່ 1 ແມ່ນທະນາຄານແຂວງ ໄດ້ຮັບຂັນລາງ ວັນພ້ອມເງີນສົດ 7.000.000 ກີບ, ອັນດັບທີ່ 2 ເມືອງໂພນໄຊ ໄດ້ຮັບຂັນລາງວັນ ພ້ອມເງີນສົດ 5.000.000 ກີບ, ອັນດັບທີ່ 3 ບໍລິສັດຮຸ່ງວິໄລກໍ່ສ້າງເຄຫາສະຖານ ໄດ້ຮັບຂັນລາງວັນ ພ້ອມເງີນສົດ 3.000.000 ກີບ ແລະ ອັນດັບທີ່ 4 ໂດມີນິກ ໄດ້ຮັບລາງວັນເງີນສົດ 2.000.000 ກີບ. ໃຫ້ກຽດຂື້ນມອບລາງວັນ ໂດຍ ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ.





ໂດຍ: ອາພຸດເດດ ບຸບຜາ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.