Header Ads

ລົດບັນທຸກມັນຕົ້ນ ເສຍຫຼັກຕຳລົດຈັກເສຍຊີວິດ 1 ຄົນ



ເກີດອຸບັດຕິເຫດລົດບັນທຸກມັນຕົ້ນ ເສຍຫຼັກຕໍາເອົາລົດຈັກ 2 ຄັນ ໃນເວລາ 8 ໂມງ 10 ນາທີ ຂອງວັນທີ 7 ທັນວາ ຜ່ານມາ ຢູ່ສົ້ນຂົວນໍ້າລອງ ເຂດບ້ານຫົວຂົວ 1 ເມືອງລອງ ແຂວງຫຼວງນໍ້າທາ ເຮັດໃຫ້ມີຜູ້ຂັບຂີ່ລົດຈັກເສຍຊີວິດ 1 ຄົນ ແລະ ບາດເຈັບ 5 ຄົນ.
ຮຕ ແກ້ວອຳພັນ ຖັນວົງສາ ຫົວໜ້າໜ່ວຍງານຈາລະຈອນ ປກສ ເມືອງລອງ ໃຫ້ຮູ້ວ່າ: ລົດທີ່ເກີດອຸບັດຕິເຫດຄັ້ງນີ້ ແມ່ນລົດບັນທຸກ 6 ລໍ້ ຍີຫໍ້ HKAT ສີຟ້າ ປ້າຍທະບຽນອຸດົມໄຊ ບກ 1476 ຂັບຂີ່ໂດຍທ້າວ ເຈີນ ອາຍຸ 25 ປີ ອາຊີບຂັບລົດ ຢູ່ບ້ານປ່າຫວາຍ ເມືອງສິງ ແຂວງຫຼວງນໍ້າທາ ພ້ອມດ້ວຍຜູ້ຂີ່ມານໍາ 2 ຄົນ ຂັບຂີ່ອອກຈາກເມືອງສິງ ມຸ່ງໜ້າເຂົ້າມາເມືອງລອງ ເພື່ອໄປສົ່ງມັນຕົ້ນໃຫ້ໂຮງງານຢູ່ບ້ານເຕົ້າໂຮມ ເມືອງລອງ ພໍມາຮອດຈຸດເກີດເຫດ ສົ້ນຂົວນໍ້າລອງ ເຊິ່ງເສັ້ນທາງຂອບເຂດດັ່ງກ່າວ ເປັນເສັ້ນທາງໂຄ້ງ ແລະ ເປັນຄ້ອຍ ລົດເກີດເສຍຫຼັກຕຳເອົາລົດຈັກຍີ່ຫໍ້ລີຟານ ສີແດງ ບໍ່ມີປ້າຍທະບຽນ ຂັບຂີ່ໂດຍທ້າວ ອຸສັກ ອາຍຸ 33 ປີ ພະນັກງານຢູ່ບ້ານຫົວຂົວ 1 ເມືອງລອງ ແລ້ວເຮັດໃຫ້ລົດບັນທຸກ 6 ລໍ້ ເຈີດໄປຕໍາ ແລະ ປີ້ນທັບໃສ່ລົດຈັກເວບ ໜາຍເລກທະບຽນ ຈຂ 5124 ຫຼວງນໍ້າທາ ຂັບຂີ່ໂດຍທ້າວ ລຸນ ອາຍຸ 27 ປີ ປະຊາຊົນຢູ່ບ້ານຫົວຂົວ 1 ເມືອງລອງ ສົ່ງຜົນເຮັດໃຫ້ຜູ້ຊ້ອນທ້າຍມານໍາ ຊື່ນາງ ເພັງ ອາຍຸ 58 ປີ ໄດ້ຮັບບາດເຈັບສາຫັດ ແລະ ເສຍຊີວິດໃນເວລາຕໍ່ມາ.
ອຸບັດຕິເຫດຄັ້ງນີ້ ໄດ້ສ້າງຄວາມເສຍຫາຍ ພາຫະນະເປເພເລັກນ້ອຍ 1 ຄັນ, ເປເພສົມຄວນ 1 ຄັນ ແລະ ໃຊ້ການບໍ່ໄດ້ 1 ຄັນ, ຄົນໄດ້ຮັບບາດເຈັບເລັກນ້ອຍ 3 ຄົນ, ບາດເຈັບສົມຄວນ 1 ຄົນ, ບາດເຈັບສາຫັດ 1 ຄົນ ແລະ ເສຍຊີວິດ 1 ຄົນ; ສ່ວນສາເຫດໃນການເກີດອຸບັດຕິເຫດໃນຄັ້ງນີ້, ເຈົ້າໜ້າທີ່ພວມເກັບກຳຂໍ້ມູນ ແລະ ເອົາຄຳໃຫ້ການຈາກຜູ້ຂັບຂີ່, ຜູ້ເຫັນເຫດການ ເພື່ອດຳເນີນການແກ້ໄຂຕາມຂັ້ນຕອນ.
ພາບ-ຂ່າວ: ນສພ ຄວາມສະຫງົບ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.