Header Ads

ຄະນະສານອາຍາ ສານປະຊາຊົນຂັ້ນຕົ້ນ ແຂວງສາລະວັນ ຕັດສິນປ່ອຍຕົວນັກໂທດກ່ອນກໍານົດ 13 ຄົນ



ຄະນະສານອາຍາ ສານປະຊາຊົນຂັ້ນຕົ້ນ ແຂວງສາລະວັນ ໄດ້ຕັດສິນປ່ອຍຕົວນັກໂທດກ່ອນກໍານົດ ຈໍານວນ 13 ຄົນ ໃນວັນທີ 30 ພະຈິກ 2017 ຢູ່ທີ່ຄ້າຍຄຸມຂັງ-ດັດສ້າງນາໄຊ ໃຫ້ກັບຄືນສູ່ຄອບຄົວ ແລະ ສັງຄົມ ໂດຍມີຜູ້ປົກຄອງ ແລະ ນັກໂທດທີ່ໄດ້ຮັບການປ່ອຍຕົວເຂົ້າຮ່ວມ.
ນັກໂທດທີ່ຖືກປ່ອຍຕົວໃນຄັ້ງນີ້ລ້ວນແລ້ວແຕ່ມີຄວາມກ້າວໜ້າ ແລະ ດີເດັ່ນໃນການດັດສ້າງ ທັງມີເງື່ອນໄຂຄົບຕາມບົດແນະນຳຂອງຄະນະກຳມະການຄົ້ນຄວ້າຂັ້ນສູນກາງ ແລະ ທ້ອງຖິ່ນ ເຊິ່ງນັກໂທດທີ່ໄດ້ຮັບການປ່ອຍຕົວມີທັງໝົດ 13 ຄົນ ເຊິ່ງນັກໂທດແຕ່ລະຄົນໄດ້ຜ່ານການປະຕິບັດໂທດມາແລ້ວ 2 ປີ ຫາ 11 ປີ; ສະເພາະນັກໂທດທີ່ຮັບການປ່ອຍຕົວມີຄະດີຄ້າຂາຍສິ່ງເສບຕິດມີ 10 ຄົນ, ຄາດຕະກຳ 1 ຄົນ, ປຸ້ນຊັບ-ລັກຊັບພົນລະເມືອງ 2 ຄົນ ທີ່ໄດ້ຮັບການອະໄພຍະໂທດປ່ອຍຕົວຄືນສູ່ຄອບຄົວ ແລະ ສັງຄົມ ເພື່ອປະຕິບັດຕາມດຳລັດຂອງປະທານປະເທດ ສາທາລະນະລັດ ປະຊາທິປະໄຕ ປະຊາຊົນລາວ ວ່າດ້ວຍການອະໄພຍະໂທດ ປ່ອຍຕົວນັກໂທດກ່ອນກຳນົດ ໂດຍມີເງື່ອນໄຂໃຫ້ແກ່ນັກໂທດທີ່ມີຄວາມກ້າວໜ້າໃນທົ່ວປະເທດ.
ພັທ ກໍລະກັນ ບຸດໂທ ຫົວໜ້າຄ້າຍຄຸມຂັງ-ດັດສ້າງນາໄຊ ກ່າວວ່າ: ນັກໂທດທີ່ໄດ້ຮັບການປ່ອຍຕົວແມ່ນຜ່ານການຝຶກຝົນຫຼໍ່ຫຼອມທາງດ້ານລະບຽບວິໄນຂອງຄ້າຍຄຸມຂັງ-ດັດສ້າງຢ່າງຕີຫຼົບທົບໄດ້ ໂດຍສະເພາະວຽກງານສຶກສາອົບຮົບແນວຄິດຢ່າງສະໜິດແໜ້ນ ແລະ ເຂົາເຈົ້າຍັງໄດ້ຮຽນຮູ້ການປູກຝັງ-ລ້ຽງສັດ, ວຽກງານຈັດສານ, ວຽກງານເຝີນີເຈີ ແລະ ວຽກງານອື່ນໆ ເພື່ອໃຫ້ເຂົາເຈົ້ານຳໄປປະກອບອາຊີບທີ່ໝັ້ນຄົງຢູ່ຄອບຄົວ; ນອກນີ້, ເຂົາເຈົ້າເອງກໍ່ຮູ້ສຶກກິນແໜງແຄງໃຈຕໍ່ການກະທຳຜິດໃນໄລຍະຜ່ານມາ ແລະ ຖືເອົາເປັນບົດຮຽນອັນລໍ້າຄ່າໃນການດຳລົງຊີວິດຂອງຄອບຄົວ ນັບແຕ່ມື້ປ່ອຍຕົວເປັນຕົ້ນໄປເຂົາເຈົ້າຈະກາຍເປັນແບບທີ່ດີໃຫ້ສັງຄົມ ແລະ ປະເທດຊາດ ທັງເປັນກຳລັງແຮງໃນການປະກອບສ່ວນເຂົ້າໃນວຽກງານ ປກຊ-ປກສ ທີ່ດີອີກດ້ວຍ.
ພາບ ແລະ ຂ່າວ: ນສພ ຄວາມສະຫງົບ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.