Header Ads

ເຈົ້າແຂວງຫຼວງພະບາງເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງໂພນທອງ





ວັນທີ່ 6 ທັນວານີ້ ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ ໄດ້ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ເມືອງໂພນທອງ ໂດຍມີຄະນະນຳຂອງເມືອງໂພນທອງໃຫ້ການຕ້ອນຮັບຢ່າງອົບອຸ່ນ ໂອກາດນີ້ ທ່ານເຈົ້າແຂວງໄດ້ໃຫ້ກຽດໂອ້ລົມພະນັກງານຫຼັກແຫຼ່ງຂອງເມືອງ ຢູ່ສະໂມສອນໃຫຍ່ຂອງເມືອງ, ທ່ານ ສົມມາລີ ຄຳເກັ່ງ ເຈົ້າເມືອງໂພນທອງ ໄດ້ໃຫ້ກຽດຂື້ນລາຍງານສະພາບການພັດທະນາເສດຖະກິດສັງຄົມ ກໍ່ຄື ການປະຕິບັດມະຕິກອງປະຊຸມໃຫຍ່ຂອງພັກ ແຕ່ລະຂັ້ນ.



ໃນ 3 ປີ ຜ່ານມາ ເສດຖະກິດຂອງເມືອງໂພນທອງ ຍັງສືບຕໍ່ຂະຫຍາຍຕົວຢ່າງຕໍ່ເນື່ອງ, ໜັ້ນທ່ຽງ ແລະຖືກທິດ ໃນລະດັບ 8% ຕໍ່ປີ, ໃນປີ 2017 ລວມຍອດຜົນຜະລິດທົ່ວສັງຄົມ (GO) ພາຍໃນເມືອງບັນລຸໄດ້ 8,2% ເທົ່າກັບ 124 ຕື້ກ່ວາກີບ, ໃນນັ້ນ: ຂະແໜງກະສິກຳ ແລະປ່າໄມ້ສາມາດບັນລຸໄດ້ 82 ຕື້ກ່ວາກີບ ເທົ່າກັບ 66%, ເພີ່ມຂື້ນ 7%. ຂະແໜງອຸດສາຫະກຳ-ການຄ້າ 4 ຕື້ກ່ວາກີບ ເທົ່າກັບ 3,5%, ຫຼຸດແຜນການ 11.8%. ການບໍລິການບັນລຸໄດ້ 36 ຕື້ກ່ວາກີບ ເທົ່າກັບ 30,5%. ເພີ່ມຂື້ນເກືອບ 12%. ສະເລ່ຍລາຍຮັບຕໍ່ຫົວຄົນໄດ້ 846,36 ໂດລາສະຫະລັດ ຫຼື ເທົ່າກັບ 6.770.800 ກີບ, ທຽບໃສ່ມະຕິກອງປະຊຸມໃຫ່ຍຄັ້ງທີ I ສະເລ່ຍໃສ່ຫົວຄົນໄດ້ພຽງ 624 ໂດລາ ຫຼື ເທົ່າກັບ 4.992.000 ກີບ, ເພີ່ມຂື້ນ 222,36 ໂດລາ. ຖ້າທຽບໃສ່ແຜນ 5 ປີປະຕິບັດໄດ້ 82,89% (ຕາມແຜນສູ້ຊົນຮອດປີ 2020 ໃຫ້ບັນລຸ 1.021 ໂດລາ). 

ທ່ານ ສົມມາລີ ຄຳເກັ່ງ ເຈົ້າເມືອງໂພນທອງກ່າວຕື່ມວ່າ: ຜົນສຳເລັດອັນເປັນໜ້າພາກພູມໃຈຂອງປະຊາຊົນຊາວເມືອງໂພນທອງໃນປີ 2017 ນີ້ ແມ່ນການກໍ່ສ້າງເມືອງສະຫະພັນແມ່ຍີງ 3 ດີ ໂດຍຈະມີພິທີປະກາດຮັບຮອງຢ່າງເປັນທາງການ ໃນວັນທີ່ 8 ທັນວານີ້. ໂອກາດນີ້ ທ່ານເຈົ້າແຂວງຫຼວງພະບາງ ໄດ້ມີຄຳເຫັນຊີ້ນຳ ໃຫ້ຄະນະພັກ ອົງການປົກຄອງເມືອງ ພ້ອມກັນສູ້ຊົນໃນການປັບປຸງແກ້ໄຂບັນຫາຄົງຄ້າງ ໂດຍສະເພາະບັນຫາປະກົດການຫຍໍ້ທໍ້, ອອກແຮງປັບປຸງວຽກງານໃຫ້ສອດຄ່ອງກັບທິດທາງແຜນການຂອງມະຕິກອງຊຸມຄັ້ງຜ່ານມາ ໂດຍອີງໃສ່ທ່າແຮງ ແລະ ມູນເຊື້ອຂອງປະຊາຊົນ, ພ້ອມທັງຫັນປ່ຽນຕາມທິດທາງ ແລະ ຄາດໝາຍສູ້ຊົນໃຫ້ບັນລຸຕາມແຜນການ, ເພື່ອກະກຽມເງື່ອນໄຂໃຫ້ແກ່ການດຳເນີນກອງປະຊຸມໃຫຍ່ ຂອງອົງຄະນະພັກເມືອງໃນຕໍ່ໜ້າ ໃຫ້ມີຜົນສຳເລັດອັນໃໝ່ ໃຫຍ່ຫຼວງກ່ວາເກົ່າ. ໂອກາດການລົງຢ້ຽມຢາມ ແລະ ເຮັດວຽກຢູ່ເມືອງໂພນທອງຄັ້ງນີ້ ທ່ານເຈົ້າແຂວງພ້ອມດ້ວຍ ຫົວໜ້າພະແນດການກ່ຽວຂ້ອງຂອງແຂວງ, ຂະແໜງການກ່ຽວຂ້ອງຂອງເມືອງ ໄດ້ລົງຢ້ຽມຢາມຄອບຄົວຕົວແບບຂອງປະຊາຊົນຕື່ມອີກ. 

ໂດຍ: ອາພຸດເດດ ບຸບຜາ(ວິທະຍຸກະຈານສຽວແຫ່ງຊາດ)

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.