Header Ads

ສະກັດກັ້ນຄົ້ນລົດເກັງ ພົບຢາບ້າ 54.000 ເມັດ


ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຫຼວງນໍ້າທາ ໄດ້ສະກັດກັ້ນຄົ້ນລົດເປົ້າໝາຍ ຢູ່ເສັ້ນທາງ R3 ເຂດບ້ານຕາຫວານ ເມືອງຫຼວງນໍ້າທາ ພົບຢາບ້າຈຳນວນ 27 ມັດ ເທົ່າກັບ 54.000 ເມັດ ໃນວັນທີ 12 ທັນວາ 2017 ໄປສອບສວນຫາຜູ້ຮ່ວມຂະບວນການນຳກັນ.


ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຫຼວງນໍ້າທາ ໄດ້ໃຫ້ຮູ້ວ່າ: ໃນວັນທີ 12 ທັນວາ 2017, ໄດ້ຮັບແຫຼ່ງຂ່າວຈາກພົນລະເມືອງດີວ່າ ຈະມີກຸ່ມຄົນບໍ່ດີເຄື່ອນໄຫວຂົນສົ່ງ ແລະ ຄ້າຂາຍຢາເສບຕິດມາຈາກ ແຂວງອຸດົມໄຊ ໄປ ແຂວງຫຼວງນໍ້າທາ ໂດຍນຳໃຊ້ລົດເກັງຮຸນໄດ ທະບຽນ ກມ 0876 ເປັນພາຫະນະຂົນສົ່ງ. ຈາກນັ້ນ, ເຈົ້າໜ້າທີ່ ຈຶ່ງໄດ້ຈັດກຳລັງລົງພິສູດແຫຼ່ງຂ່າວ ພ້ອມທັງຕັ້ງຈຸດກວດກາຢູ່ຕາມເສັ້ນທາງ R3 ເຂດບ້ານຕາຫວານ ເມືອງຫຼວງນໍ້າທາ. ມາຮອດເວລາປະມານ 17:00 ໂມງ ເຫັນລົດເກັງສີຂາວແລ່ນມາ ຊຶ່ງຂັບຂີ່ໂດຍທ້າວ ເຢັງປໍຢາງ ອາຍຸ 24 ປີ ປະຊາຊົນບ້ານມອນໃຕ້ ແລະ ທ້າວ ໃຈຢ້າງ ອາຍຸ 19 ປີ ປະຊາຊົນບ້ານ ໜອງແມງດາ ທັງສອງຢູ່ເມືອງໄຊ ແຂວງອຸດົມໄຊ.
ຜ່ານການສອບສວນໃນເບື່ອງຕົ້ນ ພວກກ່ຽວທັງສອງສາລະພາບວ່າ: ຢາບ້າຈໍານວນດັ່ງກ່າວແມ່ນໄດ້ຮ່ວມກັນຊື້ນຳເຖົ້າແກ່ຢູ່ແຂວງອຸດົມໄຊ ເພື່ອຈະມາຂາຍສົ່ງໃຫ້ຄູ່ຮ່ວມຂະບວນການທີ່ສັ່ງຊື້ຢູ່ແຂວງຫຼວງນໍ້າທາ ພໍໄປຮອດລະຫວ່າງທາງ ຈຶ່ງຖືກເຈົ້າໜ້າທີ່ຕຳຫຼວດກັກຕົວກ່ອນ. ປັດຈຸບັນ, ຄະດີດັ່ງກ່າວ ເຈົ້າໜ້າທີ່ກຳລັງເລັ່ງສອບສວນຂະຫຍາຍຜົນຫາຜູ້ຮ່ວມຂະບວນການ ແລະ ສະຫຼຸບສໍານວນຄະດີ ເພື່ອສົ່ງໃຫ້ໄອຍະການດໍາເນີນຄະດີຂັ້ນຕໍ່ໄປ.
 ທີ່ມາ: ນສພ ຄວາມສະຫງົບ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.