Header Ads

ເສັ້ນທາງ ຊຽງແມນ-ຫົງສາ ຄືບໜ້າ 55%


ໂຄງການກໍ່ສ້າງເສັ້ນທາງປູຢາງສອງຊັ້ນ ຊຽງແມນ-ຫົງສາ ຄືບໜ້າ 55%

ໂຄງການກໍ່ສ້າງເສັ້ນທາງປູຢາງສອງຊັ້ນແຕ່ ບ້ານຊຽງແມນ ແຂວງຫຼວງພະບາງ ຫາ ເມືອງຫົງສາ ແຂວງໄຊຍະບູລີ ມີຄວາມຍາວ 71 ກິໂລແມັດກວ່າ, ມູນຄ່າການກໍ່ສ້າງທັງໝົດ 1.033 ລ້ານກວ່າບາດ(ສະກຸນເງິນໄທ) ໄດ້ແບ່ງການກໍ່ສ້າງອອກເປັນສອງໄລຍະ ເຊິ່ງໄດ້ເລີ່ມລົງມືປະຕິບັດນັບແຕ່ ວັນທີ 1 ກັນຍາ 2015 ເປັນຕົ້ນມາ. ມາຮອດປະຈຸບັນໜ້າວຽກການກໍ່ສ້າງໂດຍລວມແມ່ນສໍາເລັດແລ້ວ 55%.


ທ່ານ ສີສົມພັນ ພິມສີປະສົມ ຫົວໜ້າໂຄງການກໍ່ສ້າງທາງ ຫົງສາ-ຊຽງແມນ ໄດ້ໃຫ້ສໍາພາດຕໍ່ທີມຂ່າວພວກເຮົາເຖິງຄວາມຄືບໜ້າຂອງໜ້າວຽກງານການກໍ່ສ້າງທາງວ່າງບໍ່ດົນນີ້ວ່າ: ການກໍ່ສ້າງເສັ້ນ ທາງປູຢາງ 2 ຊັ້ນແຕ່ ເມືອງຫົງສາ ແຂວງໄຊຍະບູລີ ຫາ ບ້ານຊຽງແມນ ເມືອງຈອມເພັດ ແຂວງຫຼວງພະບາງ ລວມຄວາມຍາວທັງໝົດ 71.564 ແມັດ, ໜ້າທາງກວ້າງ 7 ແມັດ, ບ່າທາງຂ້າງລະ 1 ແມັດ, ໃນເຂດຊຸມຊົນ 0,5 ແມັດ, ໃນທາງທົ່ວໄປ ແລະ ເຂດພູສູງຊັນບໍ່ມີບ່າທາງ, ກໍ່ສ້າງຂົວ 7 ແຫ່ງ, ຍາວ 440 ແມັດ, ກໍ່ສ້າງທໍ່ລ່ຽມ 19 ແຫ່ງ, ຍາວ 248 ແມັດ, ທໍ່ກົມ 3,477 ແມັດ, ລວມມູນຄ່າການກໍ່ສ້າງທັງໝົດ 1.033 ລ້ານກວ່າບາດ(ສະກຸນເງິນໄທ) ເປັນເງິນກູ້ຍືມ 80% ແລະ ຊ່ວຍເຫຼືອລ້າ 20% ຈາກສໍານັກງານຮ່ວມມືພັດທະນາເສດຖະກິດກັບປະເທດເພື່ອນບ້ານອົງການມະຫາຊົນ ປະເທດໄທ (NEDA)

ສໍາລັບວຽກງານຍົກຍ້າຍສິ່ງກີດຂວາງແມ່ນເງີນສົມທົບລັດຖະບານລາວ 100%, ໄດ້ແບ່ງການກໍ່ສ້າງອອກເປັນສອງໄລຍະ ເຊິ່ງໄດ້ເລີ່ມລົງມືຈັດຕັ້ງປະຕິບັດນັບແຕ່ ວັນທີ 1 ກັນຍາ 2015 ເປັນຕົ້ນມາ, ຄາດໃຫ້ສໍາເລັດການກໍ່ສ້າງພາຍໃນ 32 ເດືອນ ແຕ່ມາຮອດປະຈຸບັນຖືວ່າເປັນໄລຍະທີສອງໜ້າວຽກການກໍ່ສ້າງໂດຍລວມແມ່ນສໍາເລັດແລ້ວ 55% ຫາກທຽບໃສ່ແຜນການແມ່ນສັກຊ້າ ຍ້ອນວ່າການນໍາເຂົ້າເຄື່ອງກົນຈັກອຸປະກອນຮັບໃຊ້ໃນການກໍ່ສ້າງມີຄວາມຫຍຸ້ງຍາກລວມເຖິງການຍົກຍ້າຍສິ່ງກີດຂວາງອອກຈາກແລວທາງຂອງການກໍ່ສ້າງຍັງສັກຊ້າ ຈິ່ງເຮັດໃຫ້ການກໍ່ສ້າງບໍ່ໄປຕາມແຜນການທີ່ກໍານົດໄວ້.


ເຖິງຈະມີຄວາມລ້າຊ້າຢ່າງໃດກໍ່ຕາມທາງວິຊາການຂອງບໍລິສັດໄດ້ພົວພັນເຖິງພາກສ່ວນທີ່ກ່ຽວຂ້ອງໃນການຍົກຍ້າຍສິ່ງກີດຂວາງອອກຈາກແລວທາງໃຫ້ສໍາເລັດໂດຍໄວ ແລະ ຍືນຍັນວ່າໃນ ປີ 2018 ຈະມາເຖິງນີ້ແມ່ນຈະໃຫ້ໄດ້ເລີ່ມປູຢາງຮອດທ້າຍປີຄາດຈະໃຫ້ສໍາເລັດ.

ພາບແລະຂ່າວ: ຂ່າວສານຫຼວງພະບາງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.