Header Ads

ສອງສຳນັກຂ່າວສານ ລາວ-ຫວຽດນາມ ເພີ່ມທະວີການ ຮ່ວມມື




​ໃນ​ວັນ​ທີ 5 ທັນວາ 2017 ທີ່​ໂຮງ​ແຮມ​ເມືອ​ງ​ແທງ ນະຄອນຫລວງ​ວຽງ​ຈັນ​ ໄດ້​ຈັດ​ພິທີພົບ​ປະ ​ແລະ ​ເຊັນ​ບົດ​ບັນ​ທຶນ​ການ​ຮ່ວມ​ມື​ສອງ​ຝ່າຍ ລະຫວ່າງ ສໍານັກ​ຂ່າວສານ​ປະ​ເທດ​ລາວ ​ແລະ ສໍານັກ​ຂ່າວສານ​ຫວຽດນາມ ​​ເຊິ່ງຝ່າຍ​ລາວນຳ​ໂດຍ​ທ່ານ ສູນ​ທອນ ຄັນທະ​ວົງ ຫົວໜ້າ​ອຳນວຍ​ການ​ໃຫຍ່​ສຳນັກ​ຂ່າວສານ​ປະ​ເທດ​ລາວ ພ້ອມ​ດ້ວຍ​ຄະນະ ​ແລະ ຝ່າຍ​ຫວຽດນາມ​ນຳ​ໂດຍ​ທ່ານ ຫງວຽນ ດຶກ ​ເລີ້​ຍ ຜູ້ອຳ ນວຍການ​ໃຫຍ່​ສຳ​ນັກ​ຂ່າວສານ​ຫວຽດນາມ ພ້ອມ​ດ້ວຍ​ຄະນະ. ໂດຍ​ການ​ເຂົ້າ​ຮ່ວມ​ຂອງ​ທ່ານ ສະຫວັນ​ຄອນ ລາຊະ​ມຸນ​ຕີ ຮອງ​ລັດຖະມົນຕີກະຊວງຖະ​ແຫລ​ງຂ່າວ, ວັດທະນະທຳ ​ແລະ ທ່ອງ​ທ່ຽວ ແຫ່ງສປປ ລາວ.





ການ​ພົບ​ປະ​ໃນ​ຄັ້ງ​ນີ້, ສອງ​ຝ່າຍ​ໄດ້​ທົບ​ທວນ​ການ​ປະຕິບັດ​​ແຜນ​ການ​ຮ່ວມ​ມື ລະຫວ່າງ ສອງ​ສຳນັກ​ຂ່າວສານ ລາວ-ຫວຽດນາມ ​ໃນ​ປີ 2017 ເຊິ່ງຜ່ານ​ມາ ສອງ​ສຳນັກ​ຂ່າວສານ​ໄດ້​ມີ​ຜົນສຳ​ເລັດ​ອັນ​ຕັ້ງໜ້າ​ໃນ​ຫລາຍ​ດ້ານ ​ໂດຍ​ສະ​ເພາະ​ແມ່ນ​ເນື່ອງໃນໂອກາດ ວັນ​ເຊັນ​ສົນທິສັນຍາ​ມິ​ດຕະພາບ ​​ແລະ ການ​ຮ່ວມ​ມື ຄົບຮອບ 40 ປີ  ​ແລະ ວັນ​ສ້າງ​ຕັ້ງ​ສາຍ​ພົວພັນ​ການ​ທູດ ລາວ-ຫວຽດນາມ ຄົບຮອບ 55 ປີ, ສຳນັກ​ຂ່າວສານ​ຫວຽດນາມ ​ກໍ​ໄດ້​ຈັດ​ພິ​ມປຶ້ມ​ຮູບ​ພາບ ​ແລະ ສຳນັກ​ຂ່າວສານ​ປະ​ເທດ​ລາວ ​ກໍ​ໄດ້​ຈັດ​ພິມ​ວາລະສານ​ສະບັບ​ພິ​ເສດ “ປີ​ສາມັກຄີ​ມິດຕະພາບ 2017 ລາວ-ຫວຽດນາມ”. ໃນ​ລະຫວ່າງ​ການ​ຢ້ຽມຢາມ​ຂອງ​ຄະນະ​ຜູ້​​ແທນຂອງ​ສຳນັກ​ຂ່າວສານ​ຫວຽດນາມຄັ້ງ​ນີ້, ສຳນັກ​ຂ່າວສານ​ປະ​ເທດ​ລາວ ​ຮ່ວມ​ກັບ​ສຳນັກ​ຂ່າວສານ​ຫວຽດນາມ ປະຈຳ ສປປ ລາວ ​ໄດ້​ຈັດ​ງານ​ວາງ​ສະ​ແດງ​ຮູບ​ພາບ ລາວ-ຫວຽດນາມ ພາຍໃຕ້​ຫົວຂໍ້ “ສາຍ​ພົວພັນ​ຫວຽດນາມ-ລາວ ໜັກ​ແໜ້ນ​ຍືນ​ຍົງ​ກວ່າ​ພູ​ເຂົາ​ກ້າ ກວ່າ​ແມ່​ນ້ຳ​ລໍາ​ເຊ” ​ໃນ​ລະຫວ່າງ​ວັນ​ທີ 6-8 ທັນວາ 2017 ນີ້, ທີ່​ຫໍ​ວັດທະນະ​ແຫ່ງ​ຊາດ​ລາວ.

ໃນ​ການ​ພົບ​ປະດັ່ງກ່າວ ສອງ​ຝ່າຍ​ເຫັນ​ດີ​ເປັນ​ເອກະ​ພາບ​​ສືບ​ຕໍ່​ຍົກ​ສູງ​ຄຸນ​ນະພາ​ບດ້ານ​ຂໍ້​ມູນ​ຂ່າວສານ ໃນ​ປີ 2018 ​​ເຊັ່ນ: ຂ່າວ, ຮູບ​ພາບ​ເປັນ​ລາຍ​ວັນ ​ແລະ ຊຸກຍູ້​ການ​ໂຄສະນາ​ເຜີຍ​ແຜ່ ກ່ຽວ​ກັບ​ການ​ເສີມ​ຂະຫຍາຍ​ສາຍ​ພົວພັນ​ມິດຕະພາບ ຄວາມ​ສາມັກຄີ​ແບບ​ພິ​ເສດ ​ແລະ ການ​ຮ່ວມ​ມື​ຮອບດ້ານ ລະຫວ່າງ ສອງ​ພັກ, ສອງ​ລັດ ​ແລະ ປະຊາຊົນ​ສອງ​ຊາດ ລາວ-ຫວຽດນາມ ກໍ​ຄື​ກ່ຽວ​ກັບປະ​ເທດ​ຊາດ ​ແລະ ປະຊາຊົນ​ຂອງ​ແຕ່ລະ​ປະ​ເທດ​​ໃຫ້​ດີ​ຂຶ້ນ​ກວ່າ​ເກົ່າ. ພ້ອມ​ນັ້ນ, ສຳນັກ​ຂ່າ​ວານ​ຫວຽດນາມ​​ໄດ້ຕົກລົງ​ຈະ​ຮັບ​ເອົາ​ພະນັກງານ​ຂອງ​ສຳນັກ​ຂ່າວສານ​ປະ​ເທດ​ລາວ ​ໄປ​ຝຶກ​ອົບຮົມ​ດ້ານ​ວິຊາ​ການ ຢູ່​ສຳນັກ​ຂ່າວສານ​ຫວຽດນາມ ​ໃນ​ປີ 2018 ​ແລະ ຈະ​ຊ່ວຍ​ເຫລືອ​ສະໜອງ​ອຸປະກອນ​ເພື່ອ​ຕິດ​ຕັ້ງ​ຫ້ອງ​ຖ່າຍ​ທຳ ຢູ່​ຕຶກ​ອາຄານໃໝ່​ຂອງ​ສຳນັກ​ຂ່າວສານ​ປະ​ເທດ​ລາວ ຕາມ​ຄວາມ​​ເໝາະສົມ.

ຂ່າວ ສົມ​ຫວັງ​-ພາບ​ໄອ່​ຄຳ (ຂປລ)

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.