Header Ads

ເປີດຮ້ານອາໄສເກມເປັນບັງໜ້າ ເບື້ອງຫຼັງເປັນບ່ອນຈໍາໜ່າຍຢາເສບຕິດ



ສະພາບຄ້າຂາຍຢາເສບຕິດລາຍຍ່ອຍ ໃນນະຄອນຫຼວງວຽງຈັນ ສ່ວນຫຼາຍມັນຈະໃຊ້ສະຖານທີ່ທີ່ມີຄົນຈຸດສຸ່ມເປັນສ່ວນໃຫຍ່ ເຊັ່ນ: ຮ້ານບັນເທີງ ແລະ ຮ້ານເກມທົ່ວໄປ ເພື່ອຫຼີກລ່ຽງການສົງໄສຂອງເຈົ້າໜ້າທີ່. ແຕ່ສະພາບການເຫຼົ່ານັ້ນ, ຈະເປັນວິທີທີ່ແນບນຽນກໍຕາມ ກໍບໍ່ສາມາດຈະໜີຈາກການກະທໍາຜິດດັ່ງກ່າວໄດ້ ສຸດທ້າຍໃນມື້ໜຶ່ງກໍຕ້ອງຖືກເຈົ້າໜ້າທີ່ກັກຕົວມາລົງໂທດຕາມກົດໝາຍ. ດັ່ງໃນວັນທີ 15 ພະຈິກ 2017, ເຈົ້າໜ້າທີ່ ປກສ ເມືອງສີສັດຕະນາກ ໄດ້ນໍາໃຊ້ວິຊາສະເພາະຕິດຕາມກັກຕົວເປົ້າໝາຍຄ້າຂາຍຢາເສບຕິດຢູ່ໃນຮ້ານເກມແຫ່ງໜຶ່ງ ຢູ່ເຂດສີແຍກຈີນາຍໂມ້ ເມືອງສີສັດຕະນາກ ສາມາດກັກຕົວຜູ້ຖືກຫາ 1 ຄົນ ພ້ອມຂອງກາງຢາບ້າ ຈໍານວນ 190 ເມັດ.

ເຈົ້າໜ້າທີ່ ປກສ ເມືອງສີສັດຕະນາກ ໄດ້ເປີດເຜີຍໃຫ້ຮູ້ວ່າ: ໃນຕົ້ນເດືອນພະຈິກ 2017 ໄດ້ຮັບລາຍງານຈາກພົນລະເມືອງດີວ່າ ມີກຸ່ມມົ້ວສຸມຢາເສບຕິດລາຍຍ່ອຍນໍາຢາເສບຕິດມາຈໍາໜ່າຍຢູ່ຮ້ານເກມ ທາງແບ່ງຈີນ່າຍໂມ້. ຈາກນັ້ນ, ໄດ້ນໍາໃຊ້ວິຊາສະເພາະຕິດຕາມ ມາຮອດວັນທີ 15 ພະຈິກ 2017 ເຫັນວ່າມີມູນຄວາມຈິງ ແລະ ຮູ້ໄດ້ເປົ້າໝາຍ ຈຶ່ງໄດ້ກັກຕົວທ້າວ ເອກະພົນ ຫຼື ຕີ້ ອາຍຸ 39 ປີ ພັກເຊົາຢູ່ບ້ານຈອມເພັດ ເມືອງສີສັດຕະນາກ ນະຄອນຫຼວງວຽງຈັນ ພ້ອມກັບຢາບ້າຈໍານວນດັ່ງກ່າວ. ຜ່ານການສອບສວນຂະຫຍາຍຜົນ ທ້າວ ເອກະພົນ ສາລະພາບວ່າ: ຜູ້ກ່ຽວໄດ້ເລີ່ມເສບຢາບ້າ ແຕ່ປີ 2015 ເປັນຕົ້ນມາ, ເສບມື້ລະ 1-2 ເມັດ ຢາບ້າທີ່ນໍາມາເສບແມ່ນຊື້ນໍາໄວ້ລຸ້ນເສບຢາບ້ານໍາກັນຢູ່ຕາມຮ້ານເກມແຖວທາງແບ່ງຈີນາຍໂມ້. ມາເດືອນມັງກອນ ປີ 2016 ຜູ້ກ່ຽວໄດ້ຮູ້ຈັກກັບທ້າວ ເນີດ ອາຍຸປະມານ 40 ປີ ຢູ່ເຂດຮ້ານເກມແຖວບ້ານໜອງດ້ວງ ເມືອງສີໂຄດຕະບອງ ນະຄອນຫຼວງວຽງຈັນ ແລະ ທ້າວ ເນີດ ໄດ້ເອົາຢາບ້າໃຫ້ໄປຂາຍຕໍ່ ຄັ້ງລະ 20-50 ເມັດ ໂດຍໄດ້ຮັບຄ້າຈ້າງເປັນຢາບ້າ ຄັ້ງລະ 4-5 ເມັດ ພາຍຫຼັງຂາຍໝົດແລ້ວ ທ້າວ ເນີດ ຈະເອົາຢາບ້າມາສົ່ງໃຫ້ຢູ່ຮ້ານເກມຄືເກົ່າ. ຕົກມາໃນເດືອນມິຖຸນາ 2016 ຜູ້ກ່ຽວຮັບເອົາຢາບ້ານໍາທ້າວ ເນີດ ມາຂາຍ ໂດຍຊື້ຄັ້ງລະ 100-200 ເມັດ ພາຍຫຼັງໄດ້ຢາບ້າມາແລ້ວ ກໍນໍາໄປຂາຍໃຫ້ກັບໄວລຸ້ນກຸ່ມເສບຢາບ້າຢູ່ເຂດຮ້ານເກມແຖວທາງແບ່ງຈີນາຍໂມ້ ເມື່ອໄດ້ຂາຍຢາບ້າໝົດແລ້ວ ກໍນໍາເງິນໄປຈ່າຍໃຫ້ຕາມທາງຫຼັງ.
ມາໃນວັນທີ 12 ພະຈິກ 2017, ຜູ້ກ່ຽວໄດ້ໄປຊື້ຢາບ້ານໍາທ້າວ ເນີດ ຢູ່ຮ້ານເກມໜອງດ້ວງ ຈໍານວນ 2 ຖົງເທົ່າກັບ 400 ເມັດ ພາຍຫຼັງໄດ້ຢາບ້າມາແລ້ວ ກໍນໍາໄປຂາຍໃຫ້ກັບໄວລຸ້ນເສບຢາບ້າຢູ່ຮ້ານເກມແຖວທາງແບ່ງຈີນາຍໂມ້ ຈໍານວນ 205 ເມັດ, ເສບເອງ 5 ເມັດ ຍັງເຫຼືອ 190 ເມັດ. ຈາກນັ້ນ, ມາວັນທີ 15 ພະຈິກ 2017 ເວລາປະມານ 14:00 ໂມງ ໄດ້ນໍາຢາທີ່ຍັງເຫຼືອໄປຂາຍຢູ່ຮ້ານເກມບ່ອນເກົ່າ ແຕ່ພໍໄປຮອດໄດ້ຖືກເຈົ້າໜ້າທີ່ກັກຕົວ ພ້ອມກັບຂອງກາງຢາບ້າຈໍານວນດັ່ງກ່າວ.
ນອກນັ້ນ, ເຈົ້າໜ້າທີ່ ປກສ ເມືອງສີສັດຕະນາກ ຍັງໄດ້ຮຽກຮ້ອງໄປຍັງພໍ່-ແມ່ປະຊາຊົນ ໂດຍສະເພາະບັນດາຜູ້ທໍາທຸລະກິດຕ່າງໆ ໃຫ້ເປັນເຈົ້າການຮ່ວມກັນແກ້ໄຂສະພາບບັນຫາຢາເສບຕິດ ເມື່ອທ່ານເຫັນວ່າມີກໍາມະກອນ ຫຼື ຜູ້ໃຊ້ບໍລິການ ມີການພົວພັນກັບຢາເສບຕິດ ກໍໃຫ້ແຈ້ງໃຫ້ພາກສ່ວນທີ່ກ່ຽວຂ້ອງ ເພື່ອຈະແກ້ໄຂໃຫ້ທັນການ ແລະ ແກ້ໄຂສະພາບການດັ່ງກ່າວໃຫ້ຫຼຸດລົງເທື່ອລະກ້າວ. ແຕ່ຖ້າຫາກວ່າເຫັນ ແລະ ມີບັນຫາດັ່ງກ່າວເກີດຂຶ້ນຢູ່ໃນການຄຸ້ມຄອງຂອງທ່ານແລ້ວ ທ່ານອາດຈະຖືກດໍາເນີນຄະດີນໍາກໍ່ເປັນໄປໄດ້. ປັດຈຸບັນ, ຄະດີດັ່ງກ່າວຍັງພວມດໍາເນີນຄະດີຢູ່ ແລະ ທ້າວ ເນີດ ທີ່ຜູ້ກ່ຽວໃຫ້ການຊັກທອດຫາ ເຈົ້າໜ້າທີ່ໄດ້ຂຶ້ນບັນຊີເປົ້າໝາຍ ເພື່ອກັກຕົວມາດໍາເນີນຄະດີຕາມພາຍຫຼັງ.
ພາບ ແລະ ຂ່າວ: ນສພ ຄວາມສະຫງົບ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.