Header Ads

ກະລຶມປຶກສາຫາລືການກະກຽມເຂົ້າຮ່ວມງານເປີດປີທ່ອງທ່ຽວແຂວງເຊກອງ ປີ 2018





ໃນໂອກາດງານເປີດປີທ່ອງທ່ຽວແຂວງເຊກອງປີ 2018 ທີ່ຈະມາຮອດມາເຖິງອີກບໍ່ດົນນີ້ ໃນວັນທີ 12 ທັນວາ 2017 ຜ່ານມານີ້ ຢູ່ທີ່ສະໂມສອນກອງບັນຊາການທະຫານເມືອງກະລຶມ ໄດ້ມີພິທີປຶກສາຫາລືການກະກຽມກິດຈະກຳວາງສະແດງໃນງານດັ່ງກ່າວ ໂດຍການເຂົ້າຮ່ວມຂອງ ທ່ານ ສົມຫວັງ ກວດແກ້ວມະນີວົງ ຄະນະປະຈຳພັກເມືອງ ຫົວໜ້າກອງບັນຊາການປ້ອງກັນຄວາມສະຫງົບ, ມີ ທ່ານ ຈັນໄທ ຄຳມະນີວົງ ຮອງຫົວໜ້າພະແນກ ຖະແຫຼງຂ່າວ-ວັດທະນະທຳ ແລະ ທ່ອງທ່ຽວແຂວງ ພ້ອມດ້ວຍຄະນະກຳມະການຈັດງານເປີດປີທ່ອງທ່ຽວ ເມືອງ ກະລຶມ, ເລຂາຄະນະພັກຮາກຖານກຸ່ມບ້ານ, ນາຍບ້ານ ແລະ ແຂກຖືກເຊີນ ຈາກຂະແໜງການທີ່ກ່ຽວຂ້ອງເຂົ້າຮ່ວມ 100 ກວ່າສະຫາຍ.



ທ່ານ ສົມຫວັງ ກວດແກ້ວມະນີວົງ ຄະນະປະຈຳພັກເມືອງ, ຫົວໜ້າກອງບັນຊາການປ້ອງກັນຄວາມສະຫງົບກໍໄດ້ຂຶ້ນກ່າວໄຂພິທີ ພ້ອມທັງລາຍງານສະພາບຈຸດພິເສດພາຍໃນເມືອງໃຫ້ຮູ້ວ່າ: ເມືອງກະລຶມແມ່ນເມືອງໜຶ່ງທີ່ມີທ່າແຮງບົ່ມຊ້ອນທາງດ້ານວັດທະນະທຳ, ປະຫວັດສາດ ແລະ ທຳມະຊາດຢ່າງຫຼວງຫຼາຍ ມີວິຖີຊີວິດການເປັນຢູ່, ຮິດຄອງປະເພນີທີ່ດີງາມອັນສະເພາະຂອງເຜົ່າພາຍໃນເມືອງ ທີ່ບົ່ງບອກເຖິງຄວາມສາມັກຄີປອງດອງກັນເປັນຈິດໜຶ່ງໃຈດຽວຂອງພໍ່ແມ່ປະຊາຊົນ ດັ່ງທີ່ໄດ້ຂະໜານນາມວ່າ ເມືອງກະລຶມເປັນດິນແດນວິລະຊົນຄົນອາດຫານ ໃນນັ້ນຍັງມີຫຼາກຫຼາຍກິດຈະກຳທີ່ສາມາດສືບທອດກັນມາ ແລະ ພ້ອມຈະນຳເຂົ້າວາງສະແດງໃນງານເປີດປີທ່ອງທ່ຽວ ແຂວງ ເຊກອງປີ 2018 ເປັນຕົ້ນແມ່ນ ສີລະປະດົນຕີ, ສຽງຂັບ, ສຽງລຳພາສາເຜົ່າ, ສິນຄ້າຈັກສານ, ຕໍ່າແຜ່ນ, ສິນຄ້າທາງດ້ານກະສິກຳ, ອາຫານພື້ນບ້ານ, ແຮ່ທາດທາງທຳມະຊາດ ແລະ ການໂຄສະນາບັນດາແຫຼ່ງທ່ອງທ່ຽວຂອງເມືອງ ເພື່ອສະແດງໃຫ້ຊາວໂລກໄດ້ເຫັນວັດທະນະທຳອີກສ່ວນໜຶ່ງຂອງ ແຂວງ ເຊກອງ ແລະ ທັງເປັນການປະກອບສ່ວນສ້າງຂະບວນການໃນງານສະເຫຼີມສະຫຼອງປີທ່ອງທ່ຽວລາວທີ່ ແຂວງ ເຊກອງປີ 2018 ນີ້ໃຫ້ມີຄວາມຟົດຟື້ນ, ເບີກບານມ່ວນຊື່ນຫຼາຍຂຶ້ນ.




ໂອກາດດຽວກັນ ທ່ານ ຈັນໄທ ຄຳມະນີວົງ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງ ເຊກອງ ກໍໄດ້ໂອ້ລົມຕໍ່ພິທີດັງກ່າວ ເຊິ່ງທ່ານໄດ້ເນັ້ນໃຫ້ຜູ້ເຂົ້າຮ່ວມຈົ່ງພ້ອມກັນຄົ້ນຄົວ, ຊອກຫາສິນຄ້າວາງສະແດງທີ່ເປັນທ່າແຮງບົ່ມຊ້ອນ ທັງເປັນເອກະລັກອັນສະເພາະຂອງບັນດາເຜົ່າພາຍໃນເມືອງເຂົ້າຮ່ວມວາງສະແດງໃນງານເປີດປີທ່ອງທ່ຽວລາວທີ່ ແຂວງ ເຊກອງ ແລະ ງານບຸນປະຈຳປີເສົາຫຼັກເມືອງ ໃຫ້ມີຫຼາກຫຼາຍຜະລິດຕະພັນຂຶ້ນຕື່ມ ເພື່ອໃຫ້ເປັນທີ່ໜ້າເພິ່ງພໍໃຈຂອງແຂກຕ່າງດ້າວ ທ້າວຕ່າງແດນທີ່ເຂົ້າມາທ່ຽວມາຊົມ ແລະ ໃຫ້ສັງຄົມຮັບຮູ້ເຖິງວິຖີຊີວິດການເປັນຢູ່ຂອງພໍ່ແມ່ປະຊາຊົນບັນດາເຜົ່າພາຍໃນ ແຂວງ ເຊກອງ ເວົ້າລວມ, ເວົ້າສະເພາະກໍຄືເມືອງກະລຶມ ໃຫ້ນັບມື້ນັບຫຼາຍຂື້ນ.




ຂ່າວ: ທ ອັດສະວິນ ແສງສີຈັນ (ນັກຂ່າວ ເມືອງກະລຶມ ແຂວງເຊກອງ 0302807470)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.