Header Ads

ເຈົ້າແຂວງຫຼວງພະບາງເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງວຽງຄຳ



ວັນທີ່ 7 ທັນວານີ້ ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ ພ້ອມດ້ວຍຫົວໜ້າພະແນກການກົມກອງຂອງແຂວງ ໄດ້ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ເມືອງວຽງຄຳ ໂດຍມີຄະນະນຳ ພ້ອມດ້ວຍພະນັກງານຫຼັກແຫຼ່ງ ຂອງເມືອງ ໃຫ້ການຕ້ອນຮັບຢ່າງອົບອຸ່ນ ຢູ່ສະໂມສອນໃຫຍ່ຂອງເມືອງ, ໂອກາດນີ້ ທ່ານ ອ່ອນຕາ ວັນນະຈັກ ເຈົ້າເມືອງວຽງຄຳ ໄດ້ໃຫ້ກຽດຂື້ນລາຍງານສະພາບການພັດທະນາເສດຖະກິດສັງຄົມ ກໍ່ຄື ການປະຕິບັດມະຕິກອງປະຊຸມໃຫຍ່ຂອງພັກ ແຕ່ລະຂັ້ນ. 


ທ່ານກ່າວວ່າ: ໃນປີຜ່ານມາ ການພັດທະນາເສດຖະກິດ-ສັງຄົມຂອງເມືອງ ໄດ້ມີຜົນສຳເລັດໃໝ່ຫຼາຍປະການ, ເສດຖະກິດສືບຕໍ່ຂະຫຍາຍຕົວຢ່າງຕໍ່ເນື່ອງ, ໃນລະດັບ 7,3% ຕໍ່ປີ, ທຽບໃສ່ແຜນການປີປະຕິບັດໄດ້ 97,45%, ລວມຍອດຜະລິດຕະພັນພາຍໃນບັນລຸເກືອບ 254 ຕື້ກີບ, ສະເລ່ຍລາຍຮັບຕໍ່ຫົວຄົນໄດ້ 1.067 ໂດລາສະຫະລັດ ຫຼື ເທົ່າກັບ 8.617.000 ກ່ວາກີບ ຕໍ່ຄົນຕໍ່ປີ, ທຽບໃສ່ປີຜ່ານມາເພີ່ມຂື້ນ 6,67 ໂດລາສະຫະລັດ. ຄະນະພັກ-ອົງການປົກຄອງເມືອງ ໄດ້ສ້າງເງື່ອນໄຂ ອຳນວຍຄວາມສະດວກ ທັງຍາດແຍ່ງການລົງທືນຈາກທັງພາຍໃນ ແລະ ຕ່າງປະເທດ ເຂົ້າມາຈັດຕັ້ງແຜນພັດທະນາເສດຖະກິດ-ສັງຄົມໄດ້ 131 ໂຄງການ, ມູນຄ່າ 180 ຕື້ກ່ວາກີບ, ທຽບໃສ່ແຜນການປະຕິບັດໄດ້ 68,23%, ພື້ນຖານໂຄງລ່າງໄດ້ຮັບການປັບປຸງ ແລະ ກໍ່ສ້າງ, ຊີວິດການເປັນຢູ່ຂອງປະຊາຊົນ ໄດ້ຮັບການພັດທະນາດີຂື້ນ ປະຈຸບັນຍັງມີບ້ານທຸກຍາກ 16 ບ້ານກວມ 22,55% ຂອງຈຳນວນຄອບຄົວທັງໝົດ, ທຽບໃສ່ປີ 2015 ລຸດລົງ 10 ບ້ານ, ຄອບຄົວທຸກຍາກຍັງເຫຼືອ 554 ຄອບຄົວ ກວມ 11,11% ຂອງຈຳນວນຄອບຄົວທັງໝົດ, ມີບ້ານພັດທະນາແລ້ວ 13 ບ້ານ, 1.530 ຄອບຄົວ.

ຄຽງຄູ່ກັບຜົນສຳເລັດ ຍັງມີບາງດ້ານ ທີ່ອົງການປົກຄອງເມືອງ ຈະສຸມໃສ່ແກ້ໄຂໃນຕໍ່ໜ້າ ຈາກນັ້ນ ຫົວ ໜ້າພະແນກການ, ກົມກອງຂອງແຂວງ ໄດ້ຂື້ນມີຄຳເຫັນຊີ້ນຳວຽກງານ ຕາມຂົງເຂດຄວາມຮັບຜິດຊອບ ເພື່ອເຮັດໃຫ້ເມືອງວຽງຄຳໄດ້ຮັບການພັດທະນາດີຂື້ນ ກ້າວໄປສູ່ການປະກາດເມືອງວຽງຄຳເປັນເມືອງລຸດພົ້ນຈາກຄວາມທຸກຍາກໃນອານາຄົດ. ໂອກາດນີ້ ທ່ານເຈົ້າແຂວງຫຼວງພະບາງ ໄດ້ມີຄຳເຫັນຊີ້ນຳ ໃຫ້ຄະນະພັກ ອົງການປົກຄອງເມືອງ ພ້ອມກັນສຸມໃສ່ແກ້ໄຂບັນຫາປະກົດການຫຍໍ້ທໍ້ ໂດຍສະເພາະແມ່ນບັນຫາຢາເສບຕິດ ໃຫ້ເລິກເຊີ່ງ ໂດຍຊຸກຍູ້ໃຫ້ທ້ອງຖີ່ນຮາກຖານ ເປັນຜູ້ມີສ່ວນຮ່ວມໃນການແກ້ໄຂ, ເພີ່ມທະວີການປັບປຸງລະບົບການຈັດຕັ້ງຢູ່ຂັ້ນຮາກຖານ ໃຫ້ມີຄວາມເຂັ້ມແຂງ ເພື່ອກະກຽມເງື່ອນໄຂໃຫ້ແກ່ການດຳເນີນກອງປະຊຸມໃຫຍ່ ຂອງອົງຄະນະພັກເມືອງໃນຕໍ່ໜ້າ ໃຫ້ມີຜົນສຳເລັດອັນໃໝ່ ໃຫຍ່ຫຼວງກ່ວາເກົ່າ. 

ໂອກາດການລົງຢ້ຽມຢາມ ແລະ ເຮັດວຽກຢູ່ເມືອງວຽງຄັ້ງນີ້ ທ່ານເຈົ້າແຂວງພ້ອມດ້ວຍຄະນະ ໄດ້ລົງຢ້ຽມຢາມຄອບຄົວຕົວແບບຂອງປະຊາຊົນ ແລະ ເຂດພັດທະນາສຳນັກງານເມືອງຕື່ມອີກ. 
 
ໂດຍ: ອາພຸດເດດ ບຸບຜາ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.