Header Ads

ມອບ-ຮັບອາຄານໂຮງໝໍແຂວງບໍ່ແກ້ວຫລັງໃໝ່ ດ້ວຍມູນຄ່າການກໍ່ສ້າງ 26 ຕື້ກີບ


ພິທີມອບ – ຮັບ ອາຄານຫລັງໃໝ່ຂອງໂຮງໝໍແຂວງບໍ່ແກ້ວຂຶ້ນໃນວັນທີ 8 ທັນວາ 2017ນີ້, ລະຫວ່າງ ບໍລິສັດ ຮວຍຍີນ ກໍ່ສ້າງຈຳກັດ ກັບ ໂຮງໝໍແຂວງບໍ່ແກ້ວ ໃນການເຊັນບົດບັນທຶກມອບ – ຮັບໃນຄັ້ງນີ້ມີ ທ່ານ ດຣ ຄໍາຜະຫຍາ ພົມປັນຍາ ກໍາມະການພັກແຂວງ, ຫົວໜ້າພະແນກສາທາລະນະສຸກແຂວງ, ທ່ານ ຈ່າງຮວຍຍີນ ຫົວໜ້າບໍລິສັດຮວຍຈີນກໍ່ສ້າງຈຳກັດ, ທ່ານ ດຣ ຄຳສິນ ພົມມະຫານ, ຜູ້ອຳນວຍການໂຮງໝໍແຂວງ ໂດຍການໃຫ້ກຽດເປັນສັງຂີພະຍານໂດຍທ່ານ ປອ ຄຳພັນ ເຜີຍຍະວົງ, ເຈົ້າແຂວງບໍ່ແກ້ວ, ທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ພ້ອມດ້ວຍຄະນະ, ມີບັນດາຄະນະປະຈຳພັກແຂວງ,ກຳມະການພັກແຂວງ, ເມືອງ ຕະຫຼອດຮອດແຂກຖືກເຊີນເຂົ້າຮ່ວມ.

ອາຄານຫລັງກ່າວເປັນອາຄານ 4 ຊັ້ນ ຂະໜາດ 17 ແມັດເຄິ່ງ x 56 ແມັດ ມູນຄ່າທັງໝົດ 26 ຕື້ກວ່າກີບ ໂດຍແມ່ນ ບໍລິສັດ ຮວຍຍີນ ກໍ່ສ້າງເຄຫາສະຖານ ເປັນຜູ້ຮັບເໝົາ ແລະ ຫລັງທີ່ໄດ້ເຊັນສັນຍາແລ້ວ ກໍ່ໄດ້ເລີ່ມລົງມືປະຕິບັດແຕ່ວັນທີ 22 ກຸມພາ 2015 ເປັນຕົ້ນມາ ຈົນເຖິງ ວັນທີ 21 ຕຸລາ 2017 ມາເຖິງປະຈຸບັນສໍາເລັດແລ້ວ 100% ເຊິ່ງໜ້າວຽກໃຫຍ່ມີ: ວຽກທັບມ້າງອາຄານຫລັງເກົ່າ, ວຽກໂຄງສ້າງເບຕົງ, ວຽກກໍ່ ແລະ ໂບກ, ວຽກໂຄງຫລັງຄາ ແລະ ແພດານ, ວຽກຕິດຕັ້ງ, ວຽກກາໂລ, ວຽກສີ, ວຽກສະ ໜອງເຟນີເຈີ, ວຽກໄຟຟ້າ.

ນອກຈາກນີ້ ບໍລິສັດ ຮວຍຍີນ ກໍ່ສ້າງເຄຫາສະຖານ ໄດ້ຊຸກຍູ້ປະກອບສ່ວນເຂົ້າໃນການກໍ່ສ້າງໂຄງການດັ່ງກ່າວປະກອບມີ: ຕິດຕັ້ງສະແຕນເລດໂອບເສົາໂຊ, ຕິດຕັ້ງຮາວສະແຕນເລດຕິດຝາ, ຕິດຕັ້ງເຄົ້າເຕີພ້ອມຕູ້ຄົບຊຸດ, ຕິດຕັ້ງຫີນອ່ອນໃສ່ອ່າງລ້າງມື ແລະ ເຄົ້າເຕີ, ຕິດຕັ້ງໂຄງເຫຼັກບ່ອນຈອດລົດ 1 ຄັນ, ຕິດຕັ້ງກ້ອງວົງຈອນປິດ 1 ຊຸດ, ຕິດຕັ້ງລະບົບອິນເຕີເນັດ ແລະ ໂທລະສັບ, ຕິດຕັ້ງໂທລະພາບຂະໜາດ 40 ນິ້ວ ຈໍານວນ 2 ໜ່ວຍ, ຕິດຕັ້ງຝາແກ້ວໂຄງອາລູຍຂັ້ນຫ້ອງ, ເທເບຕົງລະບຽງຊັ້ນ 2 ແລະ ຊັ້ນ 3 ພ້ອມຮາວພະນັກສະແຕນເລດ 190 ແມັດ, ຕິດຕັ້ງຈັກຍົກເຄື່ອງຄົບຊຸດ, ຕິດຕັ້ງກາໂລໃສ່ຝາທາງເຂົ້າໄປຫາປະລີບທັງ 4 ຊັ້ນ, ຕິດກະໂລໃສ່ເສົາອາຄານທັງ 4 ຊັ້ນ ແລະ ມອບເງິນສົດ ຊ່ວຍຈັດພິທີມອບ-ຮັບ. ລວມມູນຄ່າທັງໝົດ 1 ຕື້ 166 ລ້ານກີບ.

ຂ່າວພາບ: ບຸນເພັດ ໄຊຍະວົງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.