Header Ads

ກອງປະຊຸມປະສານງານຮ່ວມເຂດສາມລ່ຽມພັດທະນາ



ໃນ​ວັນ​ທີ 19 ທັນວາ 2017 ທ່ານ ສຸພັນ ແກ້ວ​ມີ​ໄຊ ລັດ​ຖະ​ມົນຕີ​ກະຊວງ​ແຜນການ ແລະ ການລົງທຶນ ປະທານ​ຄະນະ​ກຳ​ມະການ​ປະສານ​ງານ​ຮ່ວມ ເຂດສາມ​ລ່ຽມ​ພັດທະນາ ກຳປູເຈຍ-ລາວ-ຫວຽດນາມຂອງ ​ສປປ ລາວ ໄດ້​ສຳເລັດ​ການ​ນຳພາ​ຄະນະ​ຜູ້​ແທນ ​ສປປ ລາວ ເຂົ້າ​ຮ່ວມ ກອງ​ປະຊຸມຄະນະ​ກຳມະການປະສານ​ງານ​ຮ່ວມ ເຂດ​ສາມລ່ຽມ​ພັດທະນາ ກຳປູເຈຍ-ລາວ-ຫວຽດນາມ ຄັ້ງ​ທີ 11 ທີ່​ແຂວງບິງ​ເຟືອກ ​ສສ ຫວຽດນາມ ພາຍໃຕ້​ການ​ເປັນ​ປະທານ​ຂອງ​ທ່ານ ຫງວຽນ ຈິ ຢຸ້ງ ລັດຖະມົນຕີກະຊວງ​ແຜນການ ແລະ ການ​ລົງທຶນ ປະທານ​ຄະນະ​ກຳມະການປະສານ​ງານ​ຮ່ວມ ເຂດ​ສາມລ່ຽມ​ພັດທະນາ ແຫ່ງ ​ສສ ຫວຽດນາມ ເຊິ່ງ​ມີ​ທ່ານ ປານ ໂສຣະສັກ ລັດຖະມົນຕີ​ກະຊວງ​ການ​ຄ້າ ປະທານ​ຄະນະ​ກຳມະການ​ປະສານ​ງານ​ຮ່ວມ ເຂດ​ສາມ​ລ່ຽມພັດທະນາ ແຫ່ງ ຣາ​ຊະ​ອານາຈັກກຳປູເຈຍ ແລະ ທ່ານ ຫງວຽນ ວັນ ຈຣຳ ປະທານ​ຄະນະ​ກຳ​ມະການ​ປະຊາຊົນແຂວງ​ບິງ​ເຟືອກ ເຂົ້າ​ຮ່ວມ ນອກຈາກ​ຄະນະ​ຜູ້ແທນ​ຈາກ​ກະຊວງ​ຂະແໜງການຕ່າງໆ​ຂອງ​ສາມ​ປະເທດ​ແລ້ວ ຍັງ​ມີ​ຄະນະ​ຜູ້​ແທນ​ຂັ້ນ​ສູງ​ຈາກ 13 ແຂວງ ເຂດ​ສາມ​ລ່ຽມ​ພັດທະ​ນາ ກຳປູເຈຍ-ລາວ-ຫວຽດນາມ ໃນ​ນັ້ນ ລວມ​ມີແຂວງ​ຈຳປາ​ສັກ ແຂວງ​ສາລະ​ວັນ ແຂວງເຊ​ກອງ ແລະ ແຂວງ​ອັດ​ຕະ​ປື.
ກອງ​ປະຊຸມ​ຄັ້ງ​ນີ້ ໄດ້​ທົບ​ທວນຄືນ​ຄວາມ​ຄືບ​ໜ້າ​ການຈັດຕັ້ງ​ປະຕິ​ບັດ​ ຜົນ​ກອງ​ປະຊຸມ​ຄະນະ​ກຳມະ​ການ​ປະສານ​ງານ​ຮ່ວມ ເຂດສາມ​ລ່ຽມ​ພັດທະນາ ກຳປູເຈຍ-ລາວ-ຫວຽດນາມ (JCC) ຄັ້ງ​ທີ 10 ໃນ​ເດືອນ​ທັນວາ 2015 ທີ່ແຂວງ​ຈຳປາ​ສັກ ແລະ ກອງ​ປະຊຸມ​ສຸດ​ຍອດ​ເຂດ​ສາມ​ລ່ຽມ​ພັດທະ​ນາ ກຳປູເຈຍ-ລາວ-ຫວຽດນາມ ຄັ້ງ​ທີ 9 ໃນ​ເດືອນ​ພະຈິກ 2016 ທີ່​ສຽມ​ລຽບ ແລະ ພ້ອມກັນ​ປຶກສາ​ຫາລື​ກ່ຽວ​ກັບ​ທິດ​ທາງການ​ຮ່ວມ​ມື​ໃນຕໍ່ໜ້າ.
ໃນ​ກອງ​ປະຊຸມ​ບັນດາ​ທ່ານລັດຖະມົນຕີຂອງ 3 ປະເທດ ໄດ້ເຫັນ​ດີ​ຮັບຮອງ ແລະ ລົງ​ນາມ​ບົດບັນທຶກ​ຂອງ​ກອງ​ປະຊຸມ ​ຄະນະ​ກຳມະການ​ປະສານ​ງານ​ຮ່ວມ ເຂດສາມ​ລ່ຽມ​ພັດທະນາ ກຳປູເຈຍ-ລາວ-ຫວຽດນາມ ຄັ້ງ​ທີ 11 ເພື່ອເປັນ​ບ່ອນ​ອີງ​ໃນ​ການ​ສືບຕໍ່​ຈັດ​ຕັ້ງປະຕິບັດ ​ວຽກ​ງານ​ການ​ຮ່ວມ​ມື​ໃນຕໍ່ໜ້າລະຫວ່າງສາມ​ປະເທດ ກໍ່​ຄື 13 ແຂວງ ໃນ​ເຂດ​ສາມລ່ຽມ​ພັດທະນາ ທັງ​ນີ້ກໍ່​ເພື່ອ​ຈະລາຍ​ງານ​ຕໍ່​ກອງ​ປະຊຸມ​ສຸດ​ຍອດເຂດ​ສາມ​ລ່ຽມ​ພັດທະນາ ກຳ​ປູເຈຍ-ລາວ-ຫວຽດນາມ ຄັ້ງ​ທີ 10 ເຊິ່ງ​ມີ​ແຜນ​ຈະ​ຈັດ​ຂຶ້ນ​ໃນ​ເດືອນມີນາ 2018 ທີ່ ​ສສ ຫວຽດນາມ.
ກອງ​ປະຊຸມໄດ້​ຮັບ​ຊາບ​ໝາກຜົນ​ຂອງ​ກອງ​ປະຊຸມ​ລະດັບ​ຕ່າງໆ ແລະ ກິດຈະກຳ​ປິ່ນ​ອ້ອມ ທີ່​ໄດ້ຈັດ​ຂຶ້ນ​ໃນ​ໂອກາດ​ກອງ​ປະຊຸມຄັ້ງ​ນີ້ ເປັນຕົ້ນ ກອງ​ປະຊຸມ​ເຈົ້າໜ້າທີ່​ອາວຸໂສ ກອງ​ປະຊຸມ​ອະນຸກຳມະການ​ດ້ານ​ເສດຖະກິດ ຄັ້ງທີ 10 ກອງ​ປະຊຸມ​ອະນຸ​ກຳ​ມະການ​ປ້ອງ​ກັນ​ຄວາມ​ສະຫງົບ ແລະ ວຽກ​ງານ​ການ​ຕ່າງປະເທດ ຄັ້ງ​ທີ 10 ກອງ​ປະຊຸມ​ອະນຸ​ກຳ​ມະການ​ສັງຄົມ ແລະ ສິ່ງແວດລ້ອມ ຄັ້ງ​ທີ 8 ແລະ ກອງ​ປະຊຸມ​ອະນຸກຳມະການ​ປະສານ​ງານ​ລະດັບແຂວງ ຄັ້ງ​ທີ 9 ທີ່​ໄດ້​ຈັດ​ຂຶ້ນ​ໃນວັນ​ທີ 17 ທັນວາ 2017 ລວມ​ທັງຜົນ​ການ​ຈັດ​ງານ​ວາງສະແດງການ​ຄ້າ ແລະ ການທ່ອງທ່ຽວເວທີ​ປຶກສາ​ຫາລື​ຊາວ​ໜຸ່ມ ຄັ້ງ​ທີ 7 ແລະ ກອງ​ປະຊຸມ​ສຳ​ມະ​ນາວ່າ​ດ້ວຍ​ການ​ສົ່ງເສີມ​ການ​ຄ້າ ການ​ລົງທຶນ ແລະ ການ​ທ່ອງທ່ຽວ ຄັ້ງ​ທີ 11 ທີ່​ໄດ້​ຈັດ​ຂຶ້ນ​ໃນ​ລະຫວ່າງ​ວັນ​ທີ 16-18 ທັນວາ​ນີ້ ທີ່ແຂວງ​ບິງ​ເຟືອກ ກອງ​ປະຊຸມ​ໄດ້ຮັບ​ຊາບ​ຄວາມ​ຄືບ​ໜ້າການ​ຮ່າງເອກະສານ ແຜນ​ປະຕິບັດ​ງານ​ວ່າດ້ວຍ​ການ​ເຊື່ອມ​ຈອດ​ດ້ານ​ເສດຖະ​ກິດ ກຳປູເຈຍ-ລາວ-ຫວຽດນາມ ຮອດ​ປີ 2030 ເຊິ່ງ​ມີ​ແຜນຈະ​ໃຫ້​ສຳເລັດ​ຮ່າງ​ດັ່ງກ່າວ ພາຍໃນ​ເດືອນ​ມັງກອນ 2018 ເພື່ອ​ນຳສະເໜີ​ໃຫ້​ທ່ານ​ລັດຖະມົນຕີ ປະທານ​ຄະນະ​ກຳມະການ​ປະສານງານ​ຮ່ວມ ເຂດ​ສາມ​ລ່ຽມ​ພັດ​ທະນາ ກຳປູເຈຍ-ລາວ-ຫວຽດນາມ ຮ່ວມ​ກັນ​ລົງ​ນາມ ໃນ​ໂອກາດກອງ​ປະຊຸມ​ສຸດ​ຍອດ​ເຂດ​ສາມລ່ຽມ​ພັດທະນາ ກຳປູເຈຍ-ລາວ-ຫວຽດນາມ ຄັ້ງ​ທີ 10 ທີ່​ຈະ​ມາເຖິງ​ນີ້ ລວມ​ທັງ​ແຜນ​ພັດທະນາອຸດສາຫະກຳ​ຢາງພາລາ ໃນ​ເຂດສາມ​ລ່ຽມ​ພັດທະນາ ກຳປູເຈຍ-ລາວ-ຫວຽດນາມ ແລະ ແຜນພັດທະນາ​ອຸດສາຫະກຳ​ການທ່ອງ​ທ່ຽວ​ໃນ​ເຂດ​ນີ້​ຕື່ມ​ອີກ.
ພາບ ແລະ ຂ່າວ : ນສພ ວຽງຈັນໃຫ່ມ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.