Header Ads

ຄະນະຜູ້ແທນລາວ ເຂົ້າຮ່ວມເວທີປະຊາທິປະໄຕ ບາຫລີ ຄັ້ງທີ 10



ໃນລະຫວ່າງວັນທີ່ 7-8 ທັນວາ 2017, ຄະນະຜູ້ແທນ ສປປ ລາວ ນໍາໂດຍ ທ່ານ ພົງສະຫວັດ ບຸບຜາ ອະດີດລັດຖະມົນຕີ, ຫົວໜ້າຫ້ອງວ່າການປະທານປະເທດ, ໄດ້ເຂົ້າຮ່ວມເວທີປະຊາທິ ປະໄຕບາຫລີ ຄັ້ງທີ 10, ທີ່ບານເຕັນ ຈາກາຕາ, ສາທາລະນະລັດອິນໂດເນເຊຍ. ກອງປະຊຸມຄັ້ງນີ້, ໄດ້ດໍາເນີນພາຍໃຕ້ຫົວຂໍ້ “ປະຊາທິປະໄຕໄດ້ຖືກຈັດຕັ້ງປະຕິບັດ ຫລື ບໍ?.” ເຂົ້າຮ່ວມກອງປະຊຸມ ມີຄະນະຜູ້ແທນມາຈາກ 97 ປະເທດ ແລະ 7 ອົງການຈັດຕັ້ງສາກົນໃນພາກພື້ນອາຊີ-ປາຊີຟິກ, ເອີຣົບ, ອາເມລິກາລາຕິນ ແລະ ອາຟຣິກກາ ເພື່ອພ້ອມກັນແລກປ່ຽນຄວາມຄິດເຫັນ, ປະສົບການ ແລະ ທົບທວນຄືນ ກ່ຽວກັບການຈັດຕັ້ງປະຕິບັດ ພັດທະນາປະຊາທິປະໄຕ ໃນພາກພື້ນ ແລະ ໃນປະເທດຕົນ.

ທ່ານ ພົງສະຫວັດ ບຸບຜາ ຫົວໜ້າຄະນະຜູ້ແທນລາວ, ໄດ້ຂຶ້ນປະກອບຄໍາເຫັນ ໃນພາກອະຟິປາຍທົ່ວໄປ, ໂດຍທ່ານໄດ້ເນັ້ນຢໍ້າຄວາມມຸ້ງໝັ້ນ ແລະ ຄວາມເຊື່ອໃນຄ່ານິຍົມປະຊາທິປະໄຕ ຂອງ ສປປ ລາວ, ເຊິ່ງບໍ່ມີຕົວແບບປະຊາທິປະໄຕ ໃດທີ່ສົມບູບແບບໃນໂລກ, ລວມທັງໃນອາຊີ-ປາຊິຟິກ. ການປົກຄອງແບບປະຊາທິປະໄຕນັ້ນ ມີຫລາຍຮູບແບບທີ່ແຕກຕ່າງກັນ ໃນແຕ່ລະປະເທດ, ໂດຍຂຶ້ນກັບເງື່ອນໄຂ, ຈຸດພິເສດສະເພາະຂອງແຕ່ລະປະເທດ ແລະ ຄວາມມຸ້ງມາດປາຖະໜາ ຂອງປະຊາຊົນ.

ທ່ານ ພົງສະຫວັດ ບຸບຜາ ໄດ້ຍົກໃຫ້ເຫັນວ່າ: ໃນຫລາຍປີທີ່ຜ່ານມາ ສະພາແຫ່ງຊາດ ແລະ ລັດຖະບານລາວ ໃນຖານະເປັນສະຖາບັນຫລັກ ໃນລະບົບປະຊາທິປະໄຕ ໄດ້ມີບົດບາດສໍາຄັນໃນການພັດທະນາປະຊາທິປະໄຕ ຢູ່ ສປປ ລາວ, ໂດຍໄດ້ມີການປັບປຸງດັດແກ້ລັດຖະທໍາມະນູນຕາມສະພາບຄວາມເປັນຈິງ ແລະ ຄັ້ງຫລ້າສຸດ ແມ່ນໃນປີ 2015 ເຊິ່ງແນໃສ່ປັບປຸງລະບົບການປົກຄອງລັດ, ລວມມີອໍານາດນິຕິບັນຍັດ, ບໍລິຫານ, ຕຸລາການ ແລະ ການປົກຄອງທ້ອງຖິ່ນ. ໃນນັ້ນພົ້ນເດັ່ນກວ່າໝູ່ແມ່ນໄດ້ມີການສ້າງຕັ້ງສະພາປະຊາຊົນທ້ອງຖິ່ນ ເພື່ອກະຈາຍອໍານາດໃຫ້ປະຊາຊົນມີສ່ວນຮ່ວມ.

ທ່ານ ພົງສະຫວັດ ບຸບຜາ ໄດ້ຊີ້ໃຫ້ເຫັນວ່າ: ລັດຖະບານໄດ້ເອົາໃຈໃສ່ໃນການສ້າງຄວາມເປັນເອກະພາບແຫ່ງຊາດ, ຮັບປະກັນສິດ ແລະ ຜົນປະໂຫຍດທີ່ຖືກຕ້ອງຕາມກົດໝາຍຂອງປະຊາຊົນບັນ ດາເຜົ່າ, ໃນນັ້ນລວມທັງອິດສະຫລະ ພາບທາງດ້ານສາສະໜາ ຫລື ຄວາມເຊື່ອຖື, ເຊິ່ງປະຊາຊົນລາວບັນດາເຜົ່າມີສິດຢ່າງເຕັມສ່ວນ ໃນການນັບຖື ຫລື ບໍ່ນັບຖືສາສະໜາໃດໜຶ່ງບົນພື້ນຖານຄວາມຕ້ອງການຂອງເຂົາເຈົ້າ. ລັດຖະບານຍັງໄດ້ວາງວິໄສທັດ ຫັນປະເທດເປັນລັດ ແຫ່ງກົດ ໝາຍ ໃນປີ 2020 ເພື່ອຮັບປະກັນສິດສະເໝີພາບ ຂອງປະຊາຊົນຕໍ່ໜ້າກົດໝາຍ, ປາບປາມການສໍ້ລາດບັງຫລວງ, ສົ່ງເສີມການມີສ່ວນຮ່ວມຂອງປະຊົນ ຕໍ່ວຽກງານລວມຂອງຊາດ, ສົ່ງເສີມບົດບາດ ແລະ ຄວາມສະເໝີພາບ ລະຫວ່າງ ຍິງ-ຊາຍ.

ເວທີປະຊາທິປະໄຕບາຫລີ ໄດ້ເລີ່ມຕົ້ນມາແຕ່ ປີ 2008, ໂດຍມີຈຸດປະສົງເພື່ອສົ່ງເສີມຄວາມຮ່ວມມືໃນພາກພື້ນອາຊີ-ປາຊີຟິກ ກ່ຽວກັບການພັດທະນາປະຊາທິປະໄຕ ແລະ ການເມືອງ, ເນັ້ນໃສ່ການປຶກສາຫາລືແບບເປີດກວ້າງ, ສ້າງສັນ ແລະ ຮຽນຮູ້ ຈາກການແລກປ່ຽນປະສົບການຂອງແຕ່ລະປະເທດ. ເວທີປຶກສາຫາລືດັ່ງກ່າວ, ຈັດຂຶ້ນທຸກໆປີ ເຊິ່ງປີນີ້ກໍຄົບຮອບ 10 ປີ, ມາຮອດປັດຈຸບັນ ປະເທດເຈົ້າພາບອິນໂດເນເຊຍ ໄດ້ເປີດກວ້າງເຊີນປະເທດໃນພາກພື້ນອື່ນໆ ເຂົ້າຮ່ວມນໍາ. ພິເສດ ໃນປີນີ້ ໄດ້ຈັດ ໃຫ້ມີກອງປະຊຸມນັກສຶກສາປະຊາທິປະໄຕບາຫລີ ຂຶ້ນເປັນຄັ້ງທໍາອິດ ເພື່ອຊຸກຍູ້ ແລະ ສົ່ງເສີມໄວໜຸ່ມໃນການຮຽນຮູ້ ແລະ ເຂົ້າໃຈໃຫ້ຖືກຕ້ອງ ກ່ຽວກັບບັນຫາປະຊາທິປະໄຕ.

ພາບ ແລະ ຂ່າວ : ຂປລ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.