Header Ads

ລາວ-ການາດາ ຫາລືການຮ່ວມມືວຽກງານອາຊີວະສຶກສາ ແລະ ການສຶກສາຊັ້ນສູງ



ກະຊວງສຶກສາທິການ ແລະ ກີລາ ສປປ ລາວ ແລະ ປະເທດການາດາ ໄດ້ຫາລືກ່ຽວກັບການຮ່ວມມືທາງດ້ານວຽກງານອາຊີວະສຶກສາ ແລະ ຊັ້ນສູງ ໃນວັນທີ 7 ທັນວາ ຜ່ານມາ ທີ່ສໍານັກງານກະຊວງສຶກສາທິການ ແລະ ກີລາ, ທ່ານ ຮສ.ປອ ກອງສີ ແສງມະນີ ຮອງລັດຖະມົນຕີ ກະຊວງສຶກສາທິການ ແລະ ກີລາ ໄດ້ໃຫ້ກຽດການເຂົ້າພົບປະຂອງ ທ່ານ ອາລຽນ ບອຍ ຮອງປະທານຄູ່ຮ່ວມມືສາກົນຂອງວິທະຍາໄລ ແລະ ສະຖາບັນການສຶກສາ ປະເທດການາດາ ພ້ອມດ້ວຍຄະນະ, ມີຫົວໜ້າ-ຮອງຫົວໜ້າກົມ ແລະ ຜູ້ຮັບຜິດຊອບວຽກງານກ່ຽວຂ້ອງເຂົ້າຮ່ວມຢ່າງພ້ອມພຽງ.
ການເຂົ້າພົບປະໃນຄັ້ງນີ້, ແມ່ນເພື່ອຢ້ຽມຢາມ ແລະ ຊອກຮູ້ກ່ຽວກັບການສຶກສາຊັ້ນສູງ ແລ ການສຶກສາອາຊີວະຂອງລາວ ເພື່ອກ້າວໄປເຖິງການຮ່ວມມືກັນໃນອະນາຄົດ ພ້ອມທັງສະເໜີການສ້າງຄູ່ຮ່ວມມື ລະຫວ່າງການສຶກສາຊັ້ນສູງ ແລະ ວຽກງານອາຊີວະສຶກສາຂອງ ປະເທດການາດາ ແລະ ສປປ ລາວ, ເຊິ່ງໃນປັດຈຸບັນ ລະບົບການສຶກສາອາຊີວະສຶກສາ ມີປະເທດເຢຍລະມັນ ແລະ ການາດາ ເປັນປະເທດທີ່ດີທີ່ສຸດໃນວຽກງານອາຊີວະສຶກສາ ແລະ ພ້ອມທີ່ຈະຖອດຖອນໃຫ້ແກ່ ສປປ ລາວ.
ໂອກາດດັ່ງກ່າວ, ທ່ານ ຮສ.ປອ ກອງສີ ແສງມະນີ ກໍ່ໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ພ້ອມທັງສະແດງຄວາມດີໃຈທີ່ໄດ້ຮັບຮູ້ກ່ຽວກັບສະພາບການພັດທະນາ ເລື່ອງອາຊີວະສຶກສາ ແລະ ການສຶກສາຊັ້ນສູງຂອງການາດາ ພ້ອມທັງຈະສະເໜີໃຫ້ສະຖາບັນການສຶກສາຂອງລາວ ໄດ້ມີການພົວພັນປະສານງານເຊິ່ງກັນແລະກັນ ເປັນຕົ້ນແມ່ນການຮ່ວມມື ແລະ ການແລກປ່ຽນທາງດ້ານວິຊາການ.
ຂໍ້ມູນ : ໜັງສືພິມ ສຶກສາ-ກີລາ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.