Header Ads

ຮອງນາຍົກເນັ້ນໃຫ້ຂະແໜງແຮງງານ ແລະ ສະຫວັດດີການສັງຄົມ ເອົາໃຈໃສ່ຫລາຍບັນຫາສຳຄັນ



ທ່ານ ຮອງນາຍົກລັດຖະມົນຕີ ສົມດີ ດວງດີ ໄດ້ໃຫ້ກຽດໂອ້ລົມຕໍ່ກອງປະຊຸມວຽກງານແຮງງານ ແລະ ສະຫວັດດີການສັງຄົມ ທົ່ວປະເທດ ປະຈຳປີ 2017 ທີ່ໄດ້ຈັດຂຶ້ນໃນວັນທີ 21 ທັນວານີ້, ທີ່ນະຄອນຫລວງວຽງຈັນ, ໂດຍທ່ານໄດ້ເນັ້ນໃຫ້ ຂະແໜງແຮງງານ ແລະ ສະຫວັດດີການສັງຄົມດັ່ງກ່າວ ເອົາໃຈໃສ່ພັດທະນາສີມືແຮງງານ, ໃຫ້ມີຄວາມສາມາດ, ເຂັ້ມແຂງ, ມີປະລິມານ ແລະ ຄຸນນະພາບ, ພ້ອມເອົາໃຈໃສ່ການຈັດສັນກຳລັງແຮງງານ, ຕອບສະໜອງຕາມຄວາມຮຽກຮອງຕ້ອງການຂອງຕະຫລາດແຮງງານ ພາຍໃນປະເທດ, ເຊື່ອມໂຍມພາພື້ນ ແລະ ສາກົນ ໂດຍສະເພາະບັນດາປະເທດໃນອາຊຽນ.



ເອົາໃຈໃສ່ຄຸ້ມຄອງແຮງງານລາວ ແລະ ແຮງງານຕ່າງປະເທດ ທີ່ມາເຮັດວຽກຢູ່ ສປປ ລາວ ໃຫ້ໄດ້ຮັບການປົກປ້ອງສິດ, ຜົນປະໂຫຍດ ຕາມລະບຽບກົດໝາຍ, ແຮງງານ ລາວ ທີ່ໄປອອກແຮງງານຢູ່ຕ່າງປະເທດແບບບໍ່ຖືກຕ້ອງຕາມກົດໝາຍ ໃຫ້ເຂົ້າສູ່ລະບົບ, ຂະຫຍາຍລະບົບປະກັນສັງຄົມ ໃຫ້ກວມເອົາກຸ່ມເປົ້າໝາຍຕ່າງໆ ແລະ ໃຫ້ການບໍລິການຢ່າງກ້ວາງຂວາງ ແລະ ມີປະສິດທິຜົນ ສຳລັບວຽກງານສະຫວັດດີການສັງຄົມ, ໂດຍສະເພາະນະໂຍບາຍສະແດງຄວາມກະຕັນຍູຮູ້ບຸນຄຸນຕໍ່ຜູ້ທີ່ມີຜົນງານ ໃນພາລະກິດປະຕິຫວັດຊາດ ໃຫ້ທົ່ວເຖິງເປົ້າໝາຍ ແລະ ສັດເຈນ, ຕັ້ງໜ້າໃນການຊວ່ຍເຫຼືອສົງເຄາະປະຊາຊົນ, ຜູ້ດ້ອຍໂອກາດ, ຜູ້ຖືກໄພພິບັດທາງທຳມະຊາດ ( ນ້ຳຖວ່ມ ແລະ ໄພໜາວ ) ໃຫ້ທ່ວງທັນສະພາບການ, ເອົາໃຈໃສ່ວຽກງານເກັບກູ້ລະເບີດບໍ່ທັນແຕກດ້ວຍການສຳຫຼວດພື້ນທີ່ກວດກູ້ລະເບີດ ແລະ ທຳລາຍລະເບີດໃຫ້ໄດ້ຫລາຍຂື້ນ ແລະ ການພັດທະນາວຽກງານກາແດງໃຫ້ມີການບໍລິການໃຫ້ກ້ວາງອອກ.



ທ່ານຮອງນາຍົກກ່າວວ່າ: ຜ່ານການຮັບຟັງການລາຍງານຂອງ ທ່ານນ. ໃບຄຳ ຂັດທິຍະ ຮອງລັດຖະມົນຕີກະຊວງ ຮສສ ດັ່ງກ່າວເຫັນວ່າ ຂະແໜງແຮງງານ ແລະ ສະຫວັດດີການສັງຄົມ, ມີຄວາມພະຍາຍາມປະຕິບັດພາລະບົດບາດຂອງຕົນຢ່າງຕັ້ງໜ້າ ແລະ ມີຫລາຍວຽກທີ່ໄດ້ຮັບການພັດທະນາດີຂຶ້ນ, ໂດຍສະເພາະການກຳນົດວິໄສທັດຮອດປີ 2020, ຍຸດທະສາດຮອດປີ 2025 ແລະ ແຜນພັດທະນາແຮງງານ ແລະ ສະຫວັດດີການສັງຄົມ 5 ປີຄັ້ງທີ IV ຮອດປີ 2020, ຊຶ່ງໄດ້ປະກອບສ່ວນອັນສຳຄັນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII ໃຫ້ປະກົດຜົນເປັນຈິງ, ພ້ອມນີ້ ຮອງນາຍົກລັດຖະມົນຕີ ຍັງໄດ້ສະແດງຄວາມຍ້ອງຍໍ ຂະແໜງແຮງງານ ແລະ ສະຫວັດດີການສັງຄົມ ທີ່ສູ້ຊົນພັດທະນາກຳລັງແຮງງານລາວ ເມື່ອທຽບໃສ່ຫລາຍປີຜ່ານມາ ເຫັນວ່າມີຄຸນນະພາບດີຂຶ້ນ, ໂດຍສະເພາະພັດທະນາສີມືແຮງງານ, ຄວາມສາມາດ, ຄວາມເຂັ້ມ ດີຂຶ້ນເລື້ອຍໆເມື່ອທຽບໃສ່ປະເທດໃກ້ຄຽງ.



ພາບ-ຂ່າວ: ເພັດສະໄໝ  
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.