Header Ads

ທ່ານ ຈະເລີນ ເຢຍປາວເຮີ ລັດຖະມົນຕີປະຈໍາສໍານັກງານນາຍົກລັດຖະມົນຕີ ເຂົ້າຮ່ວມພິທີກິນຈຽງ ຢູ່ທີ່ແຂວງໄຊສົມບູນ



 ໃນທີ 19 ທັນວາ 2017 ຢູ່ທີ່ ບ້ານ ຫີນສໍ, ເມືອງລ້ອງຊານ, ແຂວງໄຊສົມບູນ ໄດ້ຈັດພິທີເປີດງານບຸນກິນຈຽງ ຫຼື ບຸນປີໃໝ່ຂອງຊົນເຜົ່າມົ້ງຂຶ້ນ, ໂດຍການເປັນປະທານຂອງ ທ່ານ ຕົ່ງ ມົວ ຊົວໂກ້ ກໍາມະການພັກແຂວງ, ເລຂາພັກເມືອງ, ເຈົ້າເມືອງລ້ອງຊານ, ໃຫ້ກຽດເຂົ້າໃນພິທີມີ ທ່ານ ປອ. ຈະເລີນ ເຢຍປາວເຮີ ກໍາມະການສູນກາງພັກ, ລັດຖະມົນຕີປະຈໍາສຳນັກງານນາຍົກລັດຖະມົນຕີ; ທ່ານ ຄໍາໃບ ດໍາລັດ ກໍາມະການສູນກາງພັກ, ຮອງປະທານສູນກາງແນວລາວສ້າງຊາດ, ບັນດາອໍານາດການປົກຄອງແຂວງ, ເມືອງ, ແຂກຖືກເຊີນ ພ້ອມດ້ວຍ ປະຊາຊົນຊາວເມືອງລ້ອງຊານ ເຂົ້າຮ່ວມ.




ໃນໂອກາດກ່າວເປີດພິທີ ທ່ານ ຕົ່ງ ມົວ ຊົວໂກ້ ໄດ້ລາຍໃຫ້ຊາບ ກ່ຽວກັບສະພາບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມຂອງເມືອງລ້ອງຊານ ໃນໄລຍະ 1 ປີ ທີ່ຜ່ານມາ ເຫັນວ່າ: ມີສະຖຽນລະພາບທາງດ້ານການເມືອງ, ສັງຄົມ ມີຄວາມສະຫງົບປອດໄພ, ໜັກແໜ້ນ ແລະ ເຂັ້ມແຂງ; ເສດຖະກິດ ມີການຂະຫຍາຍຕົວຢ່າງຕໍ່ເນື່ອງ ຢູ່ໃນລະດັບ 7,5% ຕໍ່ປີ, ການຜະລິດສະບຽບອາຫານ ຕິດພັນກັບ ການຜະລິດເປັນສິນຄ້າຂອງປະຊາຊົນ ກໍ່ມີທ່ວງທ່າຂະຫຍາຍຕົວ. ພ້ອມດຽວກັນນີ້, ກໍ່ໄດ້ມີການຈັດຕັ້ງປະຕິບັດ ວຽກງານຫັນລົງກໍ່ສ້າງຮາກຖານ ຕິດພັນກັບ ການສ້າງຂະບວນການ ແຂ່ງຂັນຮັກຊາດ, ສ້າງບ້ານພັດທະນາ ແລະ ຊຸກຍູ້ວຽກງານ 3 ສ້າງ ຕາມ 4 ເນື້ອໃນ 4 ຄາດໝາຍ ໃຫ້ເຂົ້າສູ່ລວງເລິກຕົວຈິງ ນັບມື້ນັບຫຼາຍຂຶ້ນ.


ສໍາລັບງານບຸນກິນຈຽງ ຫຼື ບຸນປີໃໝ່ ຂອງຊົນເຜົ່າມົ້ງເມືອງລ້ອງຊານນີ້ ກໍ່​ຄື​ກັບ​ການ​ສະ​ເຫຼີມ​ສະ​ຫຼອງ ບຸນ​ກິນ​ຈຽງ​ຂອງ​ຊົນ​ເຜົ່າ​ມົ້ງໃນ​ຂອບ​ເຂດ​ທົ່ວ​ປະ​ເທດ ເພື່ອເປັນການສະເຫຼີມສະຫຼອງ ພາຍຫຼັງ ທີ່ປະຊາຊົນ ໄດ້ເກັບກູ້ຜົນຜະລິດ, ເຂົ້າໄຮ່-ເຂົ້ານາ ຂອງຕົນສໍາເລັດໃນໄລຍະ 1 ປີຜ່ານມາ ເຊິ່ງການຈັດພິທີດັ່ງກ່າວ ແມ່ນໄດ້ມີການຈັດຕັ້ງປະຕິບັດ ມາແຕ່ບູຮານນະການ ກາຍມາເປັນຮີດຄອງ ປະເພນີ ຂອງເຜົ່າມົ້ງ ແລະ ສືບທອດມາຈົນເຖິງປະຈຸບັນ. ເຊິ່ງປະເພນີກິນຈຽງ ຈະຈັດເປັນ 03 ໄລຍະ ຄື: ໄລຍະທີ 1: ຫົວໜ້າຄອບຄົວຈະເປັນຜູ້ປັດເປົ່າສິ່ງທີ່ບໍ່ດີ, ຄວາມທຸກຍາກ ໃນຄອບຄົວ ແລະ ໄປສົ່ງທ້າຍປີເກົ່າ ຕ້ອນຮັບປີໃໝ່ຢູ່ໃນຈຸດລວມຂອງແຕ່ລະຊິງຊາວ; ໄລຍະທີ 2: ແມ່ນໄລຍະທີ່ຫົວໜ້າຄອບຄົວ ໄດ້ມາເອີ້ນຂວັນຢູ່ເຮືອນໃຫ້ແຕ່ ລະຄົນໃນຄອບຄົວ ໃຫ້ຢູ່ດີມີແຮງ, ປັດເປົ່າສິ່ງທີ່ບໍ່ດີ ອອກໄປຈາກຄອບຄົວ ແລະ ມີການເຮັດພາເຂົ້າສາມັກຄີໃນຄອບຄົວ ເອີ້ນກັນວ່າ: ຈຽງໄກ່; ໄລຍະທີ 3: ແມ່ນໄລຍະພົບປະສ້າງສັນກັບຜູ້ເຖົ້າ-ຜູ້ແກ່ຊິງຊາວ, ພົບປະສ້າງສັນ ລະຫວ່າງ ໝູ່ຄູ່, ບ່າວສາວ ໂດຍການໂຍນໝາກຄອນ ເພື່ອຜູກມັດຄວາມສາມັກຄີຮັກແພງເຊິ່ງກັນ ແລະ ກັນ. ພ້ອມດຽວກັນນັ້ນ, ຍັງໄດ້ມີການສະແດງສິລະປະ ແລະ ສ້າງຂະບວນການກິລາ ທີ່ເປັນເອກກະລັກຂອງຊົນເຜົ່າມົ້ງ ເຊັ່ນ: ຂັບລໍາເຜົ່າມົ້ງ, ເປົ່າປີ່, ເປົ່າແຄນ, ງົວຊົນງົວ, ຕີໝາກຂ່າງ, ຍິງໜ້າເກັກ ແລະ ອື່ນໆ




ໃນໂອກາດເຂົ້າຮ່ວມພິທີ ໃນຄັ້ງນີ້, ທ່ານ ຈະເລີນ ເຢຍປາວເຮີ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່​ອຳ​ນາດ​ການ​ປົກ​ຄອງ ກໍ່​ຄື ປະ​ຊາ​ຊົນເມືອງລ້ອງຊານສາມາດຍາດມາໄດ້ ໃນໄລຍະ ໜຶ່ງປີຜ່ານມາ ອັນເປັນການປະກອບສ່ວນສໍາຄັນ ເຂົ້າໃນການພັດທະນາເສດຖະກິດ-ສັງຄົມຂອງແຂວງໄຊສົມບູນ ໃຫ້ມີການຂະຫຍາຍຕົວຢ່າງຕໍ່ເນື່ອງ. ພ້ອມດຽວກັນນີ້, ​ທ່ານ ຈະ​ເລີນ ເຢຍ​ປາວ​ເຮີ ຍັງ​ໄດ້​ຮຽກ​ຮ້ອງ​ໃຫ້​ສືບຕໍ່ຮັກສາມູນເຊື້ອ, ຄວາມສາມັກຄີ ແລະ ຮີດຄອງປະເພນີອັນດີງາມ ຂອງຊົນເຜົ່າມົ້ງໄວ້ຕໍ່ໄປ ທັງນີ້ກໍ່ເພື່ອ ພ້ອມກັນສ້າງໃຫ້ເມືອງລ້ອງຊານ ມີຄວາມໜັກແໜ້ນ, ເຂັ້ມແຂງ ແລະ ມີການພັດ ທະນາໃນທຸກດ້ານ, ປະຊາຊົນ ຫຼຸດພົ້ນອອກຈາກຄວາມທຸກຍາກ ແລະ ມີໃບໜ້າອັນໃໝ່.

ແຫລ່ງ: ຫ້ອງວ່າການສຳນັກງານນາຍົກລັດຖະມົນຕີ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.