Header Ads

ສອງໜຸ່ມ ຫຼັງກ້ອງ! ຖ່າຍຮູບໃຫ້ຟຣີ ທີ່ຫຼາຍຄົນຊື່ນຊົມຜົນງານ


ນັບຕັ້ງແຕ່ ສື່ສັງຄົມອ່ອນລາຍ ໄດ້ມີການເຕີບໂຕ ໂດຍສະເພາະ ເຟສບຸກ, ບວກກັບຄວາມສາມາດໃນການຈັດຫາ ອຸປະກອນຖ່າຍຮູບ ທີ່ມີຄວາມທັນສະໄໝ ແລະ ວ່ອງໄວ, ຢູ່ປະເທດລາວເຮົາກໍ່ໄດ້ມີ ບັນດານັກຖ່າຍຮູບ ທັງແບບອາຊີບ, ສະໝັກຫຼິ້ນ ແລະ ມັກເປັນຊີວິດຈິດໃຈ ຢ່າງຫຼວງຫຼາຍ.


ມື້ນີ້ ຮັກລາວໂທລະໂຄ່ງ ຢາກຈະຂໍຊື່ນຊົມ ແລະ ຊົມເຊີຍ ຜູ່ຊາຍຫຼັງກ້ອງສອງທ່ານ ທີ່ ຮັກລາວໂທລະໂຄ່ງ ໄດ້ມີໂອກາດ ນຳເອົາຜົນງານຂອງພວກເພິ່ນທັງສອງ ມາເຜີຍແຜ່, ແຕ່ເຊື່ອວ່າຫຼາຍຄົນຍັງບໍ່ທັນຮູ້ວ່າ ຊາຍທັງສອງນັ້ນ ແມ່ນໃຜ ແລະ ເຫດຜົນອັນໃດ ຈິ່ງເຮັດໃຫ້ພວກເພິ່ນທັງສອງ ມີແຮງບັນດານໃຈ ແລະ ເສຍສະຫຼະ ທັງຊັບສິນຕົນເອງ ແລະ ເວລາ ໄປຖ່າຍພາບອັນງົດງາມໃນຂອບເຂດທົ່ວປະເທດລາວ ບໍ່ວ່າຈະເປັນພາບ ວັດວາອາຮາມ, ຊີວິດການເປັນຢູ່ ແລະ ບຸນປະເພນີ.



ທ່ານທັງສອງໄດ້ປະກອບສ່ວນໃນການສະທ້ອນຄວາມງົດງາມ, ເອກະລັກ, ຄວາມພູມໃຈ ແລະ ມົນສະເໜ່ ຂອງລາວ. ສອງທ່ານ ທີ່ຮັກລາວໂທລະໂຄ່ງ ຈະຂໍຊື່ນຊົມມື້ນີ້ ຫຼາຍຄົນຄົງຈະຮູ້ເຟສບຸກ ຂອງເພິ່ນເປັນຢ່າງດີ ຄືທ່ານ Houmphet Manisouk ແລະ Kham Kham.



ມາຮູ້ຈັກກັບອ້າຍ Kham Kham ກັນກ່ອນເນາະ.... ເພິ່ນ່ເປັນບຸກຄົນຜູ້ມັກຮັກການຖ່າຍຮູບດ້ວຍໃຈໂດຍແທ້ຈິງ
ບຸກຄົນຫນຶ່ງທີ່ມັກບັນທຶກຮູບພາບ ໃນບຸນ ໃນງານຕ່າງໆ ເຊັ່ນ : ບຸນກິນຈຽງ ບຸນປະເພນີ ບຸນວັດທະນະທຳ ວິຖີການດຳລົງຊີວິດຂອງຜູ້ຄົນ ວິວທິວທັດທຳມະຊາດແລະສັດຕ່າງໆ ຜູ້ຢູ່ເບື້ອງຫລັງຂອງຮູບພາບຄວາມງົດງາມ ຫລາຍໆຮູບທີ່ເຄີຍເຫັນຜ່ານມາຫລາຍໆຮູບແລ້ວ ເຊິ່ງຮູບເຫລົ່ານັ້ນ ມັກຈະມີຕົວຫນັງສືສີຟ້າ ຂຽນໃສ່ກ້ອງຮູບພາບວ່າ :
TJEW68 ໂດຍເຟດບຸກຂອງເພິ່ນໃສ່ຊື່ວ່າ : Kham Kham (https://www.facebook.com/kham.kham.18) ແລະ ເຟດ ສີສັນເມືອງລາວ  Colorful Laos ( https://www.facebook.com/ColorfulLaos/ )
ຜູ້ທີ່ສ້າງສັນຜົນງານດັ່ງກ່າວ ແມ່ນທ່ານ ຕຽນຄຳ ວັດທະນະພອນ ຊື່ຫລິ້ນວ່າ ຄຳ ຄົນທົ່ວໄປໃນວົງການຮູບພາບມັກຈະເອິ່ນເພິ່ນວ່າ ອ້າຍຄຳ , ອ້າຍຄຳເກີດເມື່ອປີ 1961 ທີ່ນະຄອນຫລວງວຽງຈັນ.


ອ້າຍຄຳເກີດມີຄວາມມັກຮັກດ້ານການຖ່າຍຮູບມາແຕ່ອາຍຸໄດ້ 14 ປີ ເພາະສາເຫດໄດ້ອ່ານປື້ມການຖ່າຍຮູບ ຈຶ່ງເກີດແຮງບັນດານໃຈໃນການຖ່າຍຮູບຂຶ້ນມາ ຕອນນັ້ນກໍ່ມັກຈະໄປຂໍຢືມກ້ອງຖ່າຍຮູບຂອງຫມູ່ເພື່ອນເພຶ່ອມາຖ່າຍຮູບ ເລື້ອຍມາ ແລະມາໃນຍຸກຂອງ ຫລັງຈາກນັ້ນກໍ່ຫ່າງຫາຍຈາກການຖ່າຍຮູບມາເປັນເວລາ 20 ປີ  ແຕ່ຫລັງຈາກ ສ້າງຄອບຄົວມາແລ້ວ ຈຶ່ງຫວນກັບຄືນມາສູ່ການຖ່າຍຮູບອີກຄັ້ງ



ນັບແຕ່ປີ 2010 ເປັນຕົ້ນມາກໍ່ເລິ່ມມີຜົນງານທາງສື່ອອນໄລ ໃຫ້ເຫັນຜົນງານຂອງອ້າຍຄຳ ມາໂດຍຕະຫລອດແລະມັກຈະເຫັນອ້າຍເພິ່ນໃນພິທີທາງສາສະໜາ ປະເພນີ ວັດທະນະທຳ ການປະກວດສາວງາມ ແລະທຳມະຊາດ ເຊັ່ນ : ຖ່າຍຮູບການປະກວດນາງສາວລາວ ສາວມົ້ງ ສາວສົງການ.



ບຸນນະມັດສະການພຣະທາດຫລວງ ວັດວາສາສະໜາ ທຳມະຊາດ...ທີ່ຖ່າຍມາທັງຫມົດນີ້ບໍ່ໄດ້ອາມິດສິນຈາກຈາກໃຜຫມົດ ໄປຖ່າຍດ້ວຍໃຈມັກຮັກ ລ້ວນໆໆໆ ເຊັ່ນ: ບຸນກິນຈຽງ ການປະກວດສາວມົ້ງ ອ້າຍຄຳ ກໍ່ຈະໄປຖ່າຍໃຫ້ລ້າໆ ຕັ້ງແຕ່ກຽມງານ ຈົນຮອດສິ້ນສຸດ ໄປດ້ວຍໃຈລ້ວນໆ ບໍ່ມີອາມິດສິນຈ້າງໃດໝົດ ເພາະອ້າຍຄຳ ມີປະນິທານວ່າ : ເຮົາມັກຮັກ ມີພອນສະຫວັນດ້ານນີ້ ກໍ່ຢາກປະກອບສ່ວນສົ່ງເສີມ ຄວາມງົດງາມດ້ານຕ່າງໆ ໃຫ້ທຸກຄົນໄດ້ເຫັນຄວາມງົດງາມນັ້ນ ໆ ໂດຍສະເພາະ ປີ 2018 ນີ້ ປະເທດລາວຕັ້ງເປົ້າຫມາຍໃຫ້ເປັນປີ ແຫ່ງການທ່ອງທ່ຽວລາວ ຮູບພາບງົດງາມທັງຫລາຍ ກໍ່ເປັນສິ່ງກະຕຸ້ນ ແລະເປັນສິ່ງສົ່່ງຕໍ່ໃຫ້ຄົນທົ່ວໂລກໄດ້ເຫັນແງ່ມູມຄວາມງົດງາມ ຂອງລາວເຮົາທີມີ.

ທ່ານສາມາດຕິດຕາມຜົນງານຂອງ ອ້າຍຄຳ ໄດ້ທີ່ຂ້າງລຸ່ມເດີ





ອ້າຍໂກ້ ຫຼື ອ້າຍຫຸມເພັດ ມະນີສຸກ (https://www.facebook.com/houmphet.manisouk )ທາງຮັກລາວໂທລະໂຄ່ງໄດ້ນຳເອົາຜົນງານຂອງເພິ່ນ ມາລົງໂທລະໂຄ່ງເລື້ອຍໆ. ສິ່ງທີ່ຢາກຈະຍົກຍ້ອງ ອ້າຍໂກ້ບໍ່ແມ່ນສະເພາະການຖ່າຍຮູບທີ່ງາມ, ແຕ່ອ້າຍໂກ້ ຄືນັກປະຫວັດສາດ, ນັກບູຮານນະຄະດີ ແລະ ຜູ່ທີ່ຫວງແຫນ ມໍລະດົກຂອງຊາດ. ຜ່ານເພຈ Art and Culture of Laos ( https://www.facebook.com/Art-and-Culture-of-Laos-173817926014885/ ) ອ້າຍໂກ້ ໄດ້ນຳເອົາເລື່ອງລາວ ວັດທະນະທຳ,​ ສະຖານທີ່ວັດວາອາຮາມ ແລະ ເລື່ອງລາວສຳຄັນໆ ມາລົງໄວ້ໃຫ້ຄົນລຸ້ນຫຼັງໄດ້ອ່ານໄດ້ສຶກສາ. ສຳຄັນ,​ ອ້າຍໂກ້ ເປັນຄົນທີ່ສຶກສາ ໃຫ້ຮູ້ເລື່ອງລາວ ແລະ ພ້ອມຈະຮັບຟັງ ທ່ານຜູ່ມີຄວາມຮູ້ກວ່າໄດ້ໃຫ້ການປະກອບສ່ວນ ເພີ່ມເຕີມ ເນື້ອໃນສະຖານທີ່ ແລະ ເລື່ອງລາວຕ່າງໆ.



ບໍ່ຕ່າງຫຍັງໄປຈາກ ອ້າຍຄຳ,​ ອ້າຍໂກ້ ຈະມັກເລາະຖ່າຍຮູບ ແບບຟຣີໆ ໃຫ້ກັບບຸນງານຕ່າງໆ ແລະ ບໍ່ເຄີຍຫວງຮູບ ທຸກຄັ້ງທີ່ມີບຸນງານສຳຄັນ ພວກເຮົາຈະໄດ້ຮັບຊົມຮູບພາບເປັນຫຼາຍຮ້ອຍພາບ ທີ່ຊ່າງພາບຄົນນີ້ ໄດ້ຖ່າຍທອດ ອອກມາຢ່າງວິຈິດບັນຈົງ ເປັນເລື່ອງລາວ,  ເຖິງວ່າບໍ່ໄດ້ໄປຮ່ວມງານ ຫຼື ໄປສະຖານທີ່ນັ້ນ ພຽງເບິ່ງພາບທ່ານກໍ່ປານວ່າໄດ້ໄປແລ້ວ.



ອ້າຍໂກ້ ເປັນຄົນຫຼວງພະບາງ ແຕ່ມາສ້າງຄອບຄົວ ແລະ ດຳລົງຊີວິດ ຢູ່ນະຄອນຫຼວງວຽງຈັນ. ນອກຈາກຈິດໃຈຮັກເລື່ອງວັດທະນະທຳ, ປະຫວັດສາດ ແລະ ມໍລະດົກແລ້ວ. ຍັງໄດ້ຊ່ວຍການຮັກສາບັນດາພຣະພຸດທະຮູບ ແລະ ວັດວາອາຮາມຕ່າງໆ.



ຜົນງານເລື່ອງການຖ່າຍຮູບນີ້ ນັບບໍ່ຖ້ວນ ເຊິ່ງສິ່ງທີ່ອ້າຍເພິ່ນໄດ້ຖ່າຍ ແລະ ສະສົມໄວ້ນີ້ ຈະກາຍເປັນມໍລະດົກ, ຄວາມຊົງຈຳ ເພື່ອສົ່ງຕໍ່ໃຫ້ຄົນຮຸ່ນຕໍ່ໆໄປໄດ້ຮຽນຮູ້ສຶກສາ.

ເອົາລະ ຖ້າຢາກຮູ້ຜົນງານຂອງ ອ້າຍຫຸມເພັດ (ອ້າຍໂກ້) ສາມາດຕິຕາມເພຈຂ້າງລຸ່ມ)


ອີກຄັ້ງໜຶ່ງ ຂອບໃຈ ທັງນັກຖ່າຍຮູບທັງສອງ ອ້າຍຄຳ ແລະ ອ້າຍໂກ້ ທີ່ໄດ້ສ້າງສັນຜົນງານ ທີ່ງົດງາມ, ມີຄຸນຄ່າ ແກ່ສັງຄົມ. ຂໍເປັນກຳລັງໃຈ ໃຫ້ພວກອ້າຍໆ ທັງສອງ ແລະ ບັນດານັກຖ່າຍຮູບທຸກທ່ານເດີ...

ດ້ວຍຄວາມຮັກແພງ
ຮັກລາວ ໂທລະໂຄ່ງ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com







No comments

Powered by Blogger.