Header Ads

ການບິນລາວ ໄດ້ຮັບໃບຢັ້ງຢືນດ້ານຄວາມປອດໄພຂໍ້ມູນຂ່າວສານ



ລັດ​ວິ​ສາ​ຫະ​ກິດ​ການບິນ​ລາວ ໄດ້​ຮັບ​ໃບຢັ້ງຢືນ​ມາດຕະຖານ​ສາກົນ​ດ້ານ​ຄວາມ​ປອດ​ໄພ​ຂໍ້​ມູນຂ່າວສານ ISO 27001:2013 ເຊິ່ງ​ເປັນ​ຜົນສຳເລັດ​ອີກ​ບາດກ້າວໜຶ່ງ​ໃນ​ການ​ພັດທະນາ​ລະບົບການ​ບໍລິຫານ​ຈັດການ ເພື່ອ​ແນໃສ່​ສ້າງ​ຄວາມ​ສະດວກ​ສະບາຍສ້າງ​ຄວາມ​ໝັ້ນ​ໃຈ​ໃຫ້​ລູກ​ຄ້າ ຄູ່ຮ່ວມ​ທຸລະ​ກິດ ແລະ ເວທີ​ສາກົນ ທັງ​ສອດຄ່ອງ​ກັບ​ມາດຕະຖານ​ສາກົນ​ຢ່າງ​ຕໍ່​ເນື່ອງ ແລະ ສອດຄ່ອງກັບ​ທິດ​ຊີ້​ນຳ​ຂອງ​ລັດຖະບານ​ທີ່​ໄດ້​ຊຸກຍູ້-ສົ່ງເສີມ​ການ​ພັດທະນາຮອບດ້ານ ແລະ ເປັນ​ການ​ເລີ່ມ​ຕົ້ນທີ່​ດີ ​ໃນ​ການ​ສານ​ຕໍ່​ຄວາມ​ສຳເລັດ​ອື່ນໆ​ທີ່​ຈະ​ຕາມ​ມາ.

ພິທີ​ມອບ-ຮັບ​ໃບຢັ້ງຢືນ​ໄດ້​ຈັດຂຶ້ນ​ວັນ​ທີ 14 ທັນວາ 2017 ຢູ່​ສຳນັກ​ງານ​ໃຫຍ່​ລັດ​ວິ​ສາ​ຫະ​ກິດການບິນ​ລາວ ມອບ​ໂດຍ​ທ່ານ ປະກາສິດ ມາກ​ສີ ຜູ້​ຈັດການຝ່າຍ​ຮັບຮອງ​ບໍລິສັດ SGS ປະເທດ​ໄທ ແລະ ຮັບ​ໂດຍ​ທ່ານ ຂຸນພົນ ພິລາ​ກອນ ຮອງ​ຜູ້​ຈັດການພະແນກການ​ຄ້າ ແລະ ການ​ຕະຫຼາດ ຜູ້​ຮັບຜິດຊອບ​ສູນ​ຂໍ້​ມູນ​ຂ່າວສານ​ລັດ​ວິ​ສາ​ຫະ​ກິດ​ການບິນລາວ ມີ​ທ່ານ ບຸນ​ເຖິງ ສຸ​ມົນ​ທາ ຮອງ​ຫົວໜ້າ​ກົມ​ການບິນ​ພົນ​ລະເຮືອນ ທ່ານ ແສງ​ປະເສີດ ມາ​ຖຸຈັນ ຮອງ​ຜູ້ອຳນວຍການ​ໃຫຍ່​ລັດວິ​ສາ​ຫະ​ກິດ​ການບິນ​ລາວ ພ້ອມດ້ວຍ​ພາກສ່ວນ​ກ່ຽວຂ້ອງ​ເຂົ້າຮ່ວມ.

ທ່ານ ແສງ​ປະເສີດ ມາ​ຖຸ​ຈັນ ກ່າວ​ວ່າ: ການ​ໄດ້​ຮັບ​ໃບຢັ້ງຢືນຄັ້ງ​ນີ້ ນັບ​ວ່າ​ເປັນ​ປາກົດການ​ໜຶ່ງຂອງ​ການ​ມຸ່ງ​ໝັ້ນ ​ພັດທະນາ​ຮອບດ້ານ​ຂອງ​ການບິນ​ລາວ ​ທີ່​ໄດ້​ຈັດຕັ້ງ​ປະຕິບັດ​ມາ​ໃນ​ຫຼາຍ​ດ້ານ ເປັນຕົ້ນ ການ​ປັບປຸງ​ຄຸນະພາບ​ການໃຫ້​ບໍລິການ​ຂາຍ​ປີ້-ຈອງ​ບ່ອນການ​ບໍລິການ​ພາກ​ພື້ນ​ດິນ ຕະຫຼອດ​ຮອດ​ການ​ບໍລິການ​ເທິງ​ເຮືອບິນ ເຮັດ​ໃຫ້​ສາມາດ​ຍາດ​ໄດ້​ໃບຢັ້ງຢືນ​ມາດຕະຖານ​ສາກົນ​ດ້ານຄຸນະພາບ ​ການ​ບໍລິການ​ຫຼາຍ​ຢ່າງມາ​ຮອດ​ມື້ນີ້ ລັດ​ວິ​ສາ​ຫະ​ກິດ​ການບິນ​ລາວ​ໄດ້​ພິສູດ​ໃຫ້​ສັງຄົມ ແລະ ທົ່ວ​ໂລກ​ເຫັນ​ວ່າ​ສາມາດ​ບໍ​ລິຫານ​ຈັດການ ແລະ ຄຸ້ມ​ຄອງ​ບັນດາ​ຂະ​ບວນ​ການ ການ​ນຳ​ໃຊ້​ລະບົບ ແລະ ຂໍ້​ມູນ​ຂ່າວສານ​ໄດ້​ຢ່າງຖືກຕ້ອງ ແລະ ສອດຄ່ອງ​ກັບມາດຕະຖານ​ສາກົນ​ໃນ​ລະດັບ​ທີ່ສາກົນ​ຍອມຮັບ.

ການ​ໄດ້​ຮັບ​ໃບຢັ້ງຢືນ ISO 27001:2013 ເປັນຄວາມ​ສຳເລັດ​ອີກ​ບາດກ້າວ​ໜຶ່ງ​ທີ່​ລັດ​ວິ​ສາຫະ​ກິດ​ການບິນ​ລາວ​ ໄດ້​ມີ​ການພັດທະນາ​ລະບົບ​ການ​ບໍລິຫານງານ​ໃນ​ອົງ​ກອນ ​ໃຫ້​ສອດຄ່ອງ​ກັບມາດຕະຖານ​ສາກົນ​ຢ່າງ​ຕໍ່​ເນື່ອງ ແລະ ເປັນຄວາມ​ສຳເລັດ​ທີ່​ໜ້າພາກພູມ​ໃຈ ເພື່ອ​ສ້າງ​ຄວາມ​ເຊື່ອໝັ້ນ​ໃນ​ການ​ບໍລິຫານ​ຄວາມ​ປອດໄພ​ຂອງ​ຂໍ້​ມູນ​ຕໍ່​ລູກ​ຄ້າ ເຊິ່ງ​ແມ່ນການ​ຮ່ວມ​ມື ແລະ ມຸ່ງ​ໝັ້ນ​ເຮັດວຽກ​ຂອງ​ຜູ້​ບໍລິຫານ ແລະ ພະນັກ​ງານ​ທຸກ​ຄົນ.

ພາບ-ຂ່າວ: ນສພ ວຽງຈັນໃຫ່ມ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.