Header Ads

ຕາດໄຟໄໝ້ ເມືອງທ່າແຕງ ແຂວງເຊກອງ ຄວາມງາມທ່າມກາງທຳມະຊາດ (ມີຄລິບ)



ໄປທ່າແຕງ ຢ່າລືມແວ່ຕາດໄຟໄໝ້ ແຫຼ່ງທ່ອງທ່ຽວທຳມະຊາດທີ່ສວຍງາມ

ໂດຍ : ສັນຍາ

ທ່າແຕງນັບວ່າ ເປັນອີກເມືອງໜຶ່ງຂອງແຂວງເຊກອງທີ່ເຕັມໄປດ້ວຍຊັບພະຍາ ກອນທຳມະຊາດ ແລະ ຊີວະນາໆພັນອັນອຸດົມສົມບູນ, ດ້ານສະຖານທີ່ທ່ອງທ່ຽວກໍບໍ່ໄດ້ເປັນສອງຮອງຈາກເມືອງອື່ນໃດ, ບໍ່ວ່າຈະເປັນທາງດ້ານວັດ ທະນະທຳຮີດຄອງປະເພນີ, ຮ່ອງຮອຍປະຫວັດສາດ ແລະ ທຳມະຊາດທີ່ສວຍງາມ ໂດຍສະເພາະແມ່ນ “ ນ້ຳຕົກຕາດໄຟໄໝ້ ”.

“ ຕາດໄຟໄໝ້ ” ຖືເປັນອີກສະຖານທີ່ທ່ອງທ່ຽວທາງທໍາມະຊາດທີ່ສວຍງາມອີກແຫ່ງໜຶ່ງຂອງເມືອງທ່າແຕງ ທັງນີ້ ກໍເນື່ອງຈາກວ່າ ຍັງຄົງມີຄວາມອຸດົມສົມບູນແບບທຳມະຊາດເປັນຢ່າງດີ, ບໍ່ວ່າຈະເປັນພູຜາປ່າໄມ້, ຫ້ວຍນ້ຳລຳທານ ແລະ ໂງ່ນຫີນທີ່ຢູ່ຕາມຕາດ ກໍຍັງຄົງມີສະພາບເດີມໂດຍບໍ່ໄດ້ມີການດັດສ້າງ ຫຼື ຕົບແຕ່ງແຕ່ຢ່າງໃດເວົ້າໄດ້ວ່າ: “ ຍັງງົດງາມດ້ວຍທຳມະຊາດໂດຍແທ້ ” ຊຶ່ງການເປັນມົນສະ ເໜ່ດຶງດູດຈິດໃຈຜູ້ທີ່ໄດ້ພົບເຫັນໃຫ້ຄິດຮອດຈົນຍາກທີ່ຈະລືມ.



ຕາດໄຟໄໝ້ມີເລື່ອງເລົ່າກັນວ່າ: ແຕ່ກ່ອນໄດ້ມີບ່າວ-ສາວຄູ່ໜຶ່ງມາຫຼິ້ນນ້ຳຢູ່ຕາດແຫ່ງນີ້ ເຮັດໃຫ້ເຄື່ອງນຸ່ງຫົ່ມປຽກໝົດຈິ່ງໄດ້ພາກັນດັງໄຟຝີງ ແລະ ຕາກເຄື່ອງນຸ່ງປະໄວ້, ແຕ່ບັງເອີນໃນເວລານັ້ນມີລົມພັດມາຢ່າງແຮງ ແລະ ພັດເອົາເຄື່ອງນຸ່ງຮົ່ມທັງໝົດຂອງຄູ່ບ່າວ-ສາວທີ່ຕາກໄວ້ນັ້ນເຂົ້າກອງໄຟ ເຮັດໃຫ້ໄຟໄໝ້ຈົນໝົດກ້ຽງ, ນັບແຕ່ນັ້ນມາຊາວບ້ານຈິ່ງໄດ້ເອີ້ນຊື່ຕາດນີ້ວ່າ: “ ຕາດໄຟໄໝ້ ” ຈົນເຖິງປັດຈຸບັນ.



ຕາດໄຟໄໝ້ແຫຼ່ງທ່ອງທ່ຽວທາງທຳມະຊາດທີ່ສວຍງາມດັ່ງກ່າວ ມີທີ່ຕັ້ງຢູ່ໃນເຂດບ້ານປະແຫຼງໃຕ້ເມືອງທ່າແຕງແຂວງເຊກອງ ຊຶ່ງຫ່າງຈາກເທສະບານເມືອງທ່າແຕງໄປທາງທິດເໜືອປະມານ 8 ກິໂລແມັດ, ຕາດທີ່ວ່ານີ້ ມີຄວາມສູງປະມານ 100 ແມັດ, ກວ້າງປະມານ 20 ແມັດ ແລະ ໄດ້ເປີດໃຫ້ບໍລິການໃຫ້ນັກທ່ອງທ່ຽວເຂົ້າທ່ຽວຊົມ ແລະຫຼິ້ນນ້ຳຢ່າງເປັນທາງການນັບແຕ່ປີ 2008 ເປັນຕົ້ນມາ.



ຢ່າງໃດກໍຕາມ ສຳລັບທ່ານໃດທີ່ສົນໃຈກໍສາມາດໄປທ່ຽວໄປຊົມກັນໄດ້ ຫຼື ບັນດານັກທ່ອງທ່ຽວທັງພາຍໃນ ແລະ ຕ່າງປະເທດທ່ານໃດທີ່ໄດ້ມີໂອກາດເດີນທາງໄປແຂວງພາກໃຕ້ ໂດຍສະເພາະແຂວງເຊກອງ ກໍຄືເມືອງທ່າແຕງ ກໍຢ່າພາດໄປທ່ຽວໄປຊົມກໍແລ້ວກັນ ແລະ ເຊື່ອແນ່ວ່າ ຈະສາມາດຜ່ອນຄາຍຄວາມຕຶງຄຽດຂອງທ່ານໄດ້ບໍ່ຫຼາຍກໍໜ້ອຍຢ່າງແນ່ນອນ.

ໂດຍ: ສັນຍາ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com




No comments

Powered by Blogger.