Header Ads

ລົດຂົນນໍ້າມັນຕົກບັກ ກີດຂວາງການສັນຈອນ ທີ່ທ່າຫຼວງ ຫຼວງພະບາງ!​ ປະຊາຊົນຮຽກຮ້ອງໃຫ້ ຍທຂ ກວດສອບ!


ຫຼວງພະບາງ: ລາຍງານຈາກນັກຂ່າວສັນຈອນ ໂທລະໂຄ່່ງ ໃຫ້ຮູ້ວ່າ ວັນທີ 22​ ທັນວາ 2017 ເວລາປະມານ 9:30​ ເກີດເຫດ ລົດຂົນນໍ້າມັນ ເຂົ້າບັກ ແລ້ວເກີດອຸບັດຕິເຫດ ທີ່ທ່າຫຼວງ,​ ເມືອງຫຼວງພະບາງ, ແຂວງຫຼວງພະບາງ.


ອຸບັດຕິເຫດດັ່ງກ່າວ ໄດ້ເປັນເຫດໃຫ້ກີດຂວາງການສັນຈອນ ຂອງບັນດາພາຫະນະ ທີ່ຈະຂຶ້ນບັກຂ້າມໄປມາ ລະຫວ່າງ ຕົວເມືອງຫຼວງພະບາງ ຫາ ທ່າຊຽງແມນ ເມືອງຈອມເພັດ. ອີກຢ່າງ ທ່າຫຼວງແຫ່ງນີ້ ກໍ່ຖືວ່າຢາກຄັບແຄບ ເນື່ອງຈາກ ການເພີ່ມຂຶ້ນຂອງພາຫະນະ ໂດຍສະເພາະລົດໃຫຍ່.

ລົດຂົນນໍ້າມັນ ບໍ່ສາມາດເຄື່ອນຍ້າຍອອກ ຈົນຮອດຄໍ່າຄືນຂອງວັນທີ 23 ທັນວາ 2017. ເຮັດໃຫ້ລົດຈຳນວນຫຼາຍບໍ່ສາມາດຂ້າມບັກໄດ້.  


ປະຊາຊົນ ທີ່ເດີນທາງຜ່ານບັກເຂດນີ້ ຍັງຈົ່ມວ່າ ຫຼາຍຄັ້ງຕ້ອງໄດ້ຖ້າເປັນເວລາຫຼາຍຊົ່ວໂມງ ຍ້ອນການຈັດສັນບັກບໍ່ທັນມີປະສິດທິພາບ, ໂດຍສະເພາະ ວັນເສົາອາທິດ ທີ່ມີການເດີນທາງຂອງພາຫະນະຫຼາຍ ທັງລົດຂອງນັກທ່ອງທ່ຽວ ແລະ ປະຊາຊົນ. 

ເຮືອບັກມີຫຼາຍລຳ ແຕ່ວ່າບໍລິການພຽງສອງສາມລຳ ໃນແຕ່ລະມື້ ເຮັດໃຫ້ການລໍາລຽງຕ້ອງໄດ້ລໍຖ້າ. ແລະ ເຫດທີ່ລົດສະແຕັກ ກໍ່ແມ່ນຍ້ອນ ບັກນ້ອຍ ແລະ ລົດໃຫຍ່ຫຼາຍສິບລໍ້ແບບນີ້ ແມ່ນມີຄວາມສ່ຽງ.​ເພາະຜ່ານມາກໍ່ມີເຫດ ລົດໃຫຍ່ຂົນສົ່ງ ຕົກບັກ ຫຼາຍຄັ້ງ.

ປະຊາຊົນຈິ່ງຮຽກຮ້ອງມາຍັງໜ່ວຍງານຄົມມະນາຄົມຂອງແຂວງຫຼວງພະບາງໄດ້ມາກວດສອບ ແລະ ຫາວິທີທາງ ອຳນວຍຄວາມສະດວກໃນການສັນຈອນ. ໂດຍສະເພາະ ຕໍ່ກັບນັກທ່ອງທ່ຽວ ໃຫ້ມີຄວາມສະດວກ ແລະ ປະຢັດເວລາ.

ພາບແລະຂ່າວ: ນັກຂ່າວສັນຈອນ ໂທລະໂຄ່ງ





------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com




No comments

Powered by Blogger.