Header Ads

ພິທີມອບຮັບເຄື່ອງ ຊີທີ ສະແກນ (CT Scaner) ໃຫ້ແກ່ໂຮງໝໍແຂວງຫຼວງພະບາງ


ໂຮງໝໍແຂວງຫຼວງພະບາງມີອຸປະກອນການແພດທີ່ທັນສະໄໝໃນການບໍລິການຄົນເຈັບ ພິທີມອບຮັບເຄື່ອງ ຊີທີ ສະແກນ (CT Scaner) ໃຫ້ແກ່ໂຮງໝໍແຂວງຫຼວງພະບາງ


ໄດ້ມີຂຶ້ນໃນວັນທີ 22 ທັນວານີ້, ທີ່ໂຮງໝໍແຂວງ, ໂດຍການເຂົ້າຮ່ວມຂອງ ທ່ານ ສາຍສະໝອນ ຄົມທະວົງ ປະທານສະພາປະຊາຊົນແຂວງ, ທ່ານ ນາງ ລີນ່າ ບິດເຕີ ເອກອັກຄະລັດທູດສະຫະລັດອາເມລິກາ ປະຈຳລາວ ມີຫົວໜ້າພະແນກການອ້ອມຂ້າງ ຕະຫຼອດຮອດພະນັກງານແພດໝໍເຂົ້າຮ່ວມເປັນສັກຂີພິຍານ. ການມອບເຄື່ອງ ຊີທີ ສະແກນ ໃນຄັ້ງນີ້ ແມ່ນປະຕິບັດຕາມແຜນການພັດທະນາວຽກງານສາທາລະນະສຸກ ແຕ່ປີ 2016 ຫາປີ 2020 ໂດຍເລັ່ງໃສ່ 5 ຍຸດທະສາດການປະຕິຮູບສາທາລະນະສຸກ ໂດຍສະເພາະແມ່ນ ຍຸດທະສາດໃນການຍົກສູງຄຸນນະພາບ ຂອງການບໍລິການສາທາລະນະສຸກດ້ວຍການປັບປຸງ ແລະ ຂະຫຍາຍຕາໜ່າງບໍລິການປົກຄຸມທົ່ວເຖິງ ແລະ ມີຄຸນນະພາບລະດັບມາດຕະຖານ, ຫັນເອົາການບໍລິຫານຄຸ້ມຄອງໂຮງໝໍໄປສູ່ລະບົບ IT ສາມາດເຊື່ອມໂຍງຂົງເຂດ ແລະ ສາກົນ.


ເຄື່ອງ ຊີທີ ສະແກນ ເປັນເຄື່ອງອຸປະກອນການແພດ ທີ່ທັນສະໄໝ ນຳເຂົ້າມາຈາກປະເທດສະຫະ ລັດອາເມລິກາ ໂດຍການຈັດຊື້ດ້ວຍງົບປະມານຂອງລັດ 100% ໃນມູນຄ່າ 5 ຕື້ກວ່າກີບ, ເຄື່ອງ ຊີທີ ສະແກນ ມີຄວາມຈຳເປັນທີ່ສຸດ ທາງດ້ານການແພດ ເພື່ອຊ່ວຍບົ່ງມະຕິພະຍາດໃຫ້ມີຄວາມາຊັດເຈນແຕ່ຫົວທີ ແລະ ໃຫ້ການຊ່ວຍເຫຼືອແຕ່ຫົວທີ, ປິ່ນປົວໃຫ້ວ່ອງໄວທັນການເຊັ່ນ: ກວດເບິ່ງລະບົບສະໝອງ, ລະບົບກະດູກ, ລະບົບຄໍ, ລະບົບເອິກ ແລະ ລະບົບອື່ນໆ ໃຫ້ໄວ ແລະ ຊັດເຈນ ເຮັດໃຫ້ແພດ ສາມາດກອບກູ້ເອົາຊີວິດຄົນເຈັບຄືນມາໄດ້ ໃນເວລາອັນເໝາະສົມ ແກ້ໄຂອັດຕາສ່ຽງຂອງການເສຍຊີວິດໃຫ້ລຸດນ້ອຍລົງ.


ດັງບາງຕອນ ທ່ານ ຈິນດາ ວົງສຸລິ ຜູ້ອຳນວຍການໃຫຍ່ບໍລິສັດຊີບີເອບຟາມາຈຳກັດ ໃນນາມຜູ້ຈັດຊື້ເຄື່ອງ ຊີທີ ສະແກນ ໄດ້ໃຫ້ສຳພາດວ່າ: (ສຸວັນ 01-09) ໂອກາດດັ່ງກ່າວ ທ່ານ ສາຍສະໝອນ ຄົມທະວົງ ໄດ້ມີຄຳເຫັນ ເນັ້ນນັກໃຫ້ຄະນະອຳນວຍການໂຮງໝໍຕະຫຼອດຮອດພະນັກງານແພດ ພາຍໃນໂຮງໝໍແຂວງຫຼວງພະບາງ ຈົ່ງພ້ອມກັນປົກປັກຮັກສາ ແລະ ຄຸ້ມຄອງເຄື່ອງດັ່ງກ່າວ ໃຫ້ນຳໃຊ້ໄດ້ຍາວນານ. ເປັນກຽດກ່າວມອບເຄື່ອງ ຊີທີ ສະແກນ ໂດຍ ທ່ານ ຈິນດາ ວົງສຸລິ ຜູ້ອຳນວຍການໃຫຍ່ບໍລິສັດຊີບີເອບຟາມາຈຳກັດ ໃນນາມຜູ້ຈັດຊື້ເຄື່ອງ ຊີທີ ສະແກນ ແລະ ກ່າວຮັບ ໂດຍ ທ່ານ ອຳພອນ ພະລາມມີໄຊ ຫົວໜ້າພະແນກສາທາລະນະສຸກແຂວງຫຼວງພະບາງ.


ໂດຍ: ສຸວັນ ສີສົມພອນ

No comments

Powered by Blogger.