Header Ads

ພິທີເຊັນບົດບັນທຶກຄວາມເຂົ້າໃຈວ່າດ້ວຍການຮ່ວມມື MOU ລະຫວ່າງ ທະນາຄານແຫ່ງ ສປປ ລາວ (BOL) ແລະ ທະນາຄານກາງ ສ. ເກົາຫຼີ (BOK)


ພິທີເຊັນບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ລະຫວ່າງ ທະນາຄານ ແຫ່ງ ສປປ ລາວ ແລະ ທະນາຄານກາງ ສ. ເກົາຫຼີ ໄດ້ຈັດຂຶ້ນໃນວັນທີ 4 ທັນວາ 2017 ຢູ່ທີ່ໂຮງແຮມຫຼວງພະບາງວິວ, ແຂວງຫຼວງພະບາງ, ສປປ ລາວ ຕາງໝ້າໃຫ້ຝ່າຍ ທະນາຄານ ແຫ່ງ ສປປ ລາວ ໂດຍແມ່ນ ທ່ານ ສົມພາວ ໄຟສິດ ຜູ້ວ່າການ ທະນາຄານ ແຫ່ງ ສປປ ລາວ ແລະ ຕ່າງໝ້າໃຫ້ຝ່າຍ ທະນາຄານກາງ ສ. ເກົາຫຼີ ໂດຍແມ່ນ ທ່ານ ຈູໂຢ ລີ, Juyeol LEE ຜູ້ວ່າການ ທະນາຄານກາງ ສ.ເກົາຫຼີ



ຈຸດປະສົງຂອງການລົງນາມໃນບົດບັນທຶກຄວາມເຂົ້າໃຈດັ່ງກ່າວ ແມ່ນເພື່ອເສີມຂະຫຍາຍການພົວພັນຮ່ວມມື ໃນຂະແໜງການທະນາຄານ ໃຫ້ກວ້າງຂວາງຍິ່ງຂື້ນກວ່າເກົ່າ, ນອກນັ້ນ,ກໍ່ເປັນການສ້າງໂອກາດໃຫ້ພະນັກງານຂອງທັງສອງທະນາຄານກາງໄດ້ມີການພົບປະ, ແລກປ່ຽນບົດຮຽນເຊິ່ງກັນ ແລະ ກັນ, ການແລກປ່ຽນຂໍ້ມູນຂ່າວສານ ແລະ ວັດທະນະທຳ, ການສຶກສາຄົ້ນຄວ້າ ມີຄວາມຮູ້ຈັກຮັກແພງ ແລະ ສະໜິດສະໜົມກັນຫຼາຍຂື້ນ.




ນອກຈາກພິທີເຊັນບົດບັນທຶກຄວາມເຂົ້າໃຈວ່າດ້ວຍການຮ່ວມກັນແລ້ວ ໃນວັນທີ 5 ທັນວາ 2017 ທີ່ໂຮງແຮມຫຼວງພະບາງວິວ, ທະນາຄານກາງຂອງທັງສອງປະເທດ ກໍ່ຍັງຮ່ວມມືກັນຈັດສຳມະນາ ພາຍໃຕ້ໂຄງການແລກປ່ຽນທາງດ້ານວິຊາການຮ່ວມກັນ ລະຫວ່າງ ສອງຝ່າຍ (BOK-KPP 2017) ໃນຫົວຂໍ້: “ການສ້າງແຜນຫັນເປັນທັນສະໄໝຂອງລະບົບຊໍາລະສະສາງ ສປປ ລາວ ເພື່ອສົ່ງເສີມການຫຼຸດຜ່ອນການນໍາໃຊ້ເງິນສົດ” ຈຸດປະສົງແມ່ນເພື່ອແລກປ່ຽນບົດຮຽນ ແລະ ປະສົບການທາງດ້ານວິຊາການ ໃນຂະແໜງການທະນາຄານຮ່ວມກັນ ລະຫວ່າງສອງຝ່າຍ, ຊຶ່ງການສຳມະນາໃນຄັ້ງນີ້ ທ່ານ ຜູ້ວ່າການຂອງທັງສອງທະນາຄານກາງ ແລະ ບັນດາຄະນະນຳຂອງທັງສອງຝ່າຍ ກໍ່ຍັງໄດ້ໃຫ້ກຽດເຂົ້າຮ່ວມ ເພື່ອເປີດການສຳມະນາ ທີ່ເຕັມໄປດ້ວຍບັນຍາກາດ ແລະ ປະສົບຜົນສໍາເລັດຢ່າງຈົບງາມ.



ພ້ອມນີ້ ທ່ານ ຈູໂຢ ລີ, Juyeol LEE ຜູ້ວ່າການ ທະນາຄານກາງ ສ.ເກົາຫຼີ ກໍ່ໄດ້ໃຫ້ກຽດໄປເປີດບັນຍາຍການພັດທະນາດ້ານເສດຖະກິດຂອງປະເທດເກົາຫຼີ ໃຫ້ນັກສຶກສາຢູ່ທີ່ມະຫາວິທະຍາໄລສຸພານຸວົງ,ໂດຍການຕ້ອນຮັບຂອງທ່ານ ວິລະ ອາໂນລັກ ຮອງອາທິການບໍດີມະຫາວິທະຍາໄລສຸພານຸວົງ,ຜູ້ຊີ້ນໍາວຽກງານຝ່າຍວິຊາການ ພ້ອມດ້ວຍ ອາຈາານ ແລະ ນັກສຶກສາເຂົ້າຮ່ວມຮັບຟັງຕື່ມອີກ.

ຂ່າວ: ເພັດສາຄອນ ສິມມະວົງ
 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.