Header Ads

ທ່ານນາຍົກລັດຖະມົນຕີ ເນັ້ນໜັກໃຫ້ການນໍາໃຊ້ ແລະ ຄຸ້ມຄອງທີ່ດິນຕ້ອງຫັນເຂົ້າສູ່ລະບົບ




ໃນວັນທີ 22 ທັນວາ 2017 ຢູ່ທີ່ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ໄດ້ຈັດກອງປະຊຸມວຽກງານທີ່ດິນທົ່ວປະເທດ ໂດຍການເປັນປະທານຂອງ ທ່ານ ສົມມາດ ພົນເສນາ ລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ໃຫ້ກຽດເຂົ້າຮ່ວມຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ, ມີບັນດາລັດຖະມົນຕີ, ຮອງລັດຖະມົນຕີ, ແຂກຖືກເຊີນ ພ້ອມດ້ວຍ ພະນັກງານຈາກຂະແໜງການທີ່ກ່ຽວຂ້ອງ ເຂົ້າຮ່ວມ.



ກ່ອນເຂົ້າສູ່ວາລະດໍາເນີນກອງປະຊຸມ ຄະນະຈັດຕັ້ງພິທີ ໄດປະກາດຂໍ້ແຂ່ງຂັນ ຄື: ເຮັດໃຫ້ດີ, ເຮັດໃຫ້ໄວ, ເຮັດໃຫ້ຫຼາຍ ແລະ ເຮັດໃຫ້ຖືກຕ້ອງຕາມກົດໝາຍ ໂອກາດດັ່ງກ່າວ ທ່ານ ສົມມາດ ພົນເສນາ ໄດ້ລາຍງານໃຫ້ຊາບກ່ຽວກັບ ການເຄື່ອນໄຫວວຽກງານທີ່ດິນໃນໄລຍະທີ່ຜ່ານມາ ເຊິ່ງເຫັນວ່າມີຜົນສໍາເລັດໃນຫຼາຍດ້ານ ເປັນຕົ້ນ 1). ເກັບກໍາ ຂໍ້ມູນສະຖິຕິຕອນດິນ ເພື່ອຂຶ້ນສໍາມະໂນທີ່ດິນ ໃນຂອບເຂດທົ່ວປະເທດ ມາຮອດປີ 2016 ສາມາດຈັດຕັ້ງປະຕິບັດໄດ້ຈໍານວນ 150 ເມືອງ, 8.403 ບ້ານ ລວມມີ 3.06 ລ້ານຕອນ ມີເນື້ອທີ່ທັງໝົດ 4.3 ລ້ານເຮັກຕາ; 2). ໄດ້ສໍາເລັດການຈັດສັນທີ່ດິນຂັ້ນບ້ານ ໄດ້ຈໍານວນ 4.600 ບ້ານ, ຂັ້ນເມືອງ ໄດ້ຈໍານວນ 55 ເມືອງ ແລະ ຂັ້ນແຂວງ ໄດ້ຈໍານວນ 1 ແຂວງ ໃນຂອບເຂດທົ່ວປະເທດ; 3). ມາຮອດ ປະຈຸບັນ ສາມາດອອກໃບຕາດິນໄດ້ 1.120.000 ຕອນ, ສໍາເລັດການສ້າງເຂດປະເມີນລາຄາທີ່ດິນ ໄດ້ 09 ແຂວງ, 25 ເມືອງ, ການຈັດເກັບລາຍຮັບຈາກທີ່ດິນ ມີຈໍານວນເພີ່ມຂຶ້ນໃນແຕ່ລະປີ. ພ້ອມດຽວກັນນີ້, ກໍ່ໄດ້ມີການສ້າງ ແລະ ປັບປຸງບັນ ດານິຕິກໍາຈໍານວນໜຶ່ງ ເພື່ອເປັນເຄື່ອງມືໃນການຄຸ້ມຄອງ ແລະ ບໍລິຫານວຽກງານທີ່ດິນ ໃຫ້ມີປະສິດທິຜົນ.

ໃນຕອນທ້າຍຂອງກອງປະຊຸມ ທ່ານນາຍົກລັດຖະມົນຕີ ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງ ຕໍ່ຜົນສໍາເລັດຂອງການຈັດຕັ້ງປະຕິບັດ ວຽກງານທີ່ດິນ ໃນໄລຍະຜ່ານມາ ອັນເປັນການປະ ກອບສ່ວນສໍາຄັນເຂົ້າໃນການຄຸ້ມຄອງ ແລະ ພັດທະນາວຽກງານທີ່ດິນໃຫ້ດີຂຶ້ນ. ພ້ອມດຽວກັນນັ້ນ, ທ່ານນາຍົກລັດຖະມົນຕີ ຍັງໄດ້ຊີ້ນໍາ ແລະ ເນັ້ນໜັກ ໃຫ້ຂະແໜງ ຊັບພະຍາກອນທໍາມະຊາດ ແລະ ສິ່ງແວດລ້ອມ ສືບຕໍ່ເອົາໃຈໃສ່ ເປັນຕົ້ນ ການຄຸ້ມຄອງ ແລະ ການນໍາໃຊ້ທີ່ດິນ ຕ້ອງມີຄວາມຮັດກຸມ, ຖືກຕ້ອງຕາມລະບຽບການ ແລະ ມີການນໍາໃຊ້ໃຫ້ຖືກຕາມເປົ້າໝາຍ, ເຮັດໃຫ້ລັດ ກໍ່ຄື ປະຊາຊົນ ໄດ້ຮັບຜົນປະໂຫຍດສູງສຸດ ຢ່າງແທ້ຈິງ; ເອົາໃຈໃສ່ໃນການວາງແຜນ ເພື່ອພັດທະນາທີ່ດິນ ຄຽງຄູ່ກັບການສ້າງ ແລະ ປັບປຸງ ບັນດານິຕິກໍາທີ່ກ່ຽວຂ້ອງ ໃຫ້ມີຄວາມຊັດເຈນ ແລະ ສອດຄ່ອງກັບຄວາມເປັນຈິງ ທີ່ສາມາດຄຸ້ມຄອງໄດ້. ພ້ອມດຽວກັນນີ້, ຂະແໜງການທີ່ກ່ຽວຂ້ອງ ຈົ່ງສືບຕໍ່ໃນການປະສານສົມທົບ ແລະ ປຶກສາຫາລືກັນ ເພື່ອເຮັດໃຫ້ວຽກງານການຄຸ້ມຄອງທີ່ດິນໄດ້ຮັບຜົນດີ ຕາມມະຕິ ຄັ້ງທີ 3 ສະໄໝທີ X ຂອງສູນກາງພັກ. ສໍາຄັນແມ່ນ ຕ້ອງປະຕິບັດນະໂຍບາຍ ມອບດິນ-ມອບປ່າ ໃຫ້ປະຊາຊົນ ໂດຍມີການຄຸ້ມຄອງຂອງລັດ ເພື່ອໃຫ້ປະຊາຊົນ ມີສ່ວນຮ່ວມໃນການປົກປັກຮັກສາ ແລະ ນໍາໃຊ້ ຫຼາຍຂຶ້ນ ພ້ອມທັງ ໄດ້ມີການຫັນລົງຮາກຖານ ເພື່ອໃກ້ສິດຕິດແທດກັບປະຊາຊົນ ແນໃສ່ໂຄສະນາເຜີຍແຜ່ ທັງເປັນການສຶກສາອົບຮົມ ໃຫ້ປະຊາຊົນໄດ້ຮັບຮູ້ ແລະ ເຂົ້າໃຈ, ຮູ້ຈັກຫວງແຫນ ແລະ ປົກປັກ ຮັກສາປ່າໄມ້, ດິນດອນຕອນຫຍ້າ ທັງນີ້ກໍ່ເພື່ອນໍາໃຊ້ໃຫ້ເກີດປະໂຫຍດສູງສຸດ ແລະ ມີຄວາມຍືນຍົງຕະຫຼອດໄປ.

ແຫລ່ງ: ຫ້ອງວ່າການສຳນັກງານນາຍົກລັດຖະມົນຕີ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.