Header Ads

ເປີດປ້າຍບ້ານພັດທະນາ ບ້ານນໍ້າຂາມ ເມືອງຫົງສາ ຢ່າງຟົດຟື້ນ!



ທ່ານ ຮອງເຈົ້າແຂວງໄຊຍະບູລີ ແລະ ທ່ານ ເຈົ້າເມືອງຫົງສາ ແຂວງໄຊຍະບູລີ ເຂົ້າຮ່ວມເປີດປ້າຍບ້ານພັດທະນາ
ບ້ານນ້ຳຂາມ ເມືອງຫົງສາ ແຂວງໄຊຍະບູລີ

ໃນຕອນບ່າຍຂອງວັນທີ 6 ທັນວາ 2017 ຜ່ານມານີ້,  ທ່ານ ເພັງນິລັນ ຄຳພັນເພັງ ກໍາມະການປະຈຳພັກແຂວງ ຮອງເຈົ້າແຂວງໄຊຍະບູລີ ແລະ ທ່ານ ຄຳເພັດ ພົມມະລາດ ເລຂາພັກເມືອງ ເຈົ້າເມືອງຫົງສາ ແຂວງໄຊຍະບູລີ ເຂົ້າຮ່ວມເປີດປ້າຍບ້ານພັດທະນາ ບ້ານ ນ້ຳຂາມ, ໂດຍການໃຫ້ກຽດຕ້ອນຮັບ ຂອງທ່ານ ບຸນທອນ ພອນທະວົງ ເລຂາພັກບ້ານ ນາບບ້ານນ້ຳຂາມ, ມີພະນັກງານນຳພາຜູ້ຮັບຜິດຊອບຂົງເຂດບ້ານນ້ຳຂາມ ແລະ ບ້ານນ້ຳຍາງ, ມີແຂກຖືກເຊີນ ແລະ ປະຊາຊົນບັນດາເຜົ່າຊາວບ້ານນ້ໍາຂາມເຂົ້າຮ່ວມເປັນຂະບວນຢ່າງຫຼວງຫຼາຍ.



ໃນໂອກາດດັ່ງກ່າວ ທ່ານ ຮອງເຈົ້າແຂວງໄຊຍະບູລີ ກໍ່ໄດ້ເປັນກຽດເປີດປ້າຍບ້ານພັດທະນາຢ່າງເປັນທາງການ ພ້ອມທັງຕົບມືຮັບຮອງເອົາບ້ານນ້ຳຂາມເມືອງຫົງສາ ເປັນບ້ານພັດທະນາບ້ານທີ 22 ຂອງເມືອງຫົງສາ ແຂວງໄຊຍະບູລີຢ່າງເປັນທາງການ ຕາມທິດນຳສາມສ້າງ ພາຍໃຕ້ຄຳຂວັນທີ່ວ່າ: ສ້າງແຂວງເປັນຫົວໜ່ວຍຍຸດທະສາດ ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງສ້າງບ້ານເປັນຫົາໜ້ວຍພັດທະນາ, ສ້າງບ້ານໃຫຍ່ໃຫ້ເປັນຕົວເມືອງນ້ອຍໃນຊົນນະບົດ,



ຈາກນັ້ນທ່ານຮອງເຈົ້າແຂວງ ແລະ ທ່ານເຂົ້າເມືອງ ພ້ອມດ້ວຍຂະບວນການກໍ່ໄດ້ຍ່າງຊົມບ້ານ-ເຮືອນປະຊາຊົນບ້ານດັ່ງກ່າວ ເພື່ອໂອ້ລົມນຳປະຊາຊົນບັນດາເຜົ່າ ເພາະບ້ານນ້ຳຂາມນີ້ເປັນບ້ານໜຶ່ງທີ່ເປັນບ້ານຊົນເຜົ່າໄປຼ່ຢູ່ພາຍໃນເມືອງຫົງສາ ກວມເອົາເກືອບ 90 %, ນອກນັ້ນແມ່ນຊົນເຜົາອື່ນທີ່ມາອາໃສຢູ່ຮ່ວມກັນ.


ຈາກນັ້ນຊາວບ້ານນ້ຳຂາມກໍ່ໄດ້ຈັດພິທີບາສີສູ່ຂວນໃຫ້ແກ່ຄະນະປະທານ, ແຂກຖືກເຊີນ ແລະ ຄະນະບ້ານລວມໄປຮອດປະຊາຊົນບັນດາເຜົ່າຊາວບ້ານນ້ຳຂາມ ບາສີສູ່ຂວັນຮ່ວມກັນຢ່າງເປັນຂະບວນຟົດຟື້ນ ພ້ອມນີ້ທ່ານຮອງເຈົ້າແຂວງໄຊຍະບູລີ ກໍ໋ໄດ້ໃຫ້ກຽດໂອ້ລົມຕໍ່ຊາວ ບ້ານນ້ຳຂາມ ເຊິ່ງເພິ່ນໄດ້ຍົກໃຫ້ເຫັນ ແລະ ຍ້ອງຍໍຊົມເຊີຍເຖິງສາມບັນຫາໃຫຍ່ຄື:



ບັນຫາທີ 1. ຊົມເຊີຍຕໍ່ຜົນງານຂອງບ້ານທີ່ສາມາດປະຕິບັດໄດ້ວຽກງານຮອບດ້ານຈົນໄດ້ກາຍເປັນບ້ານພັດທະນາ ຍ້ອນຄວາມດູໝັ່ນອົດທົນ, ເຊື່ອໝັ້ນຕໍ່ແນວທາງຂອງພັກ ແລະ ລັດ ຂອງພວກເຮົາ ກໍ່ຄືອໍານາດການປົກຄອງເມືອງຫົງສາ ແຕ່ເຖິງຢ່າງໄດກໍຕາມມາຮອດນີ້ກໍ່ເປັນພຽງຈຸດເລີ່ມຕົ້ນຂອງການພັດທະນາພາຍໃນບ້ານ ຈຶ່ງຂໍໃຫ້ປະຊາຊົນຊາວບ້ານນ້ຳຂາມ ຈົ່ງພ້ອມກັນສືບຕໍ່ພັດທະນາໃຫ້ດີຂື້ນໄປເລື້ອຍໆຢ່າງບໍ່ຢຸດຢັງ,



ບັນຫາທີ 2. ຊາວບ້ານນ້ຳຂາມມີຄວາມສາມະຄີປອງດອງພາຍໃນບ້ານ ເຫັນວ່າມີຄວາມເປັນອັນໜຶ່ງອັນດຽວກັນບໍ່ຈຳແນກຊົນຊັ້ນວັນນະ, ບໍ່ຈຳແນກເຜົ່າ ເຊິ່ງຍາມໄດກໍ່ໃຫ້ຄວາມຊ່ວຍເຫຼືອເກື້ອກູນກັນເປັນຢ່າງດີ, ແຕ່ພວກເຮົາກໍ່ພະຍາຍາມຫຼຸດນ້ອຍຖອຍລົງໃນການເຊື່ອຖືແບບງົມງວາຍ ໃຫ້ມີຂອບເຂດມີກາລະເວລາໃນການປະຕິບັດບໍ່ໃຫ້ຂັດຕໍ່ແນວທາງຂອງພັກຂອງລັດ,


ບັນຫາທີ 3. ການພັດທະນາບຸກຕະລາກອນພາຍໃນບ້ານ ອັນນີ້ເປັນປັດໃຈຫຼັກຕໍ່ການພັດທະນາພື້ນຖານໂຄງລ່າງ ທີ່ເຮັດໃຫ້ພວກເຮົາໄດ້ມີຄວາມຮູ້ຄວາມສາມາດ ມີສະຕິປັນຍາ ສາມາດປະກອບສາລະປະໂຫຍດໃຫ້ແກ່ຕົນເອງກໍ່ຄືຂອງພັກຂອງລັດເຮົາ ເດັກທີ່ມີເກນອາຍຸເກນເຂົ້າໂຮງຮຽນ ກໍ່ຕ້ອງໄດ້ເຂົ້າໂຮງຮຽນຕາມເກນອາຍຸຕາມຂັ້ນຕອນການສຶກສາຮ່ຳຮຽນ ຕື່ມອີກ.



ໃນຕອນທ້າຍ ກໍ່ໄດ້ຮັບຊົມສິນລະປະວັນນະຄະດີ ໃນບົດຟ້ອນທີ່ວ່າ ຊົມເຊີຍບ້ານພັດທະນາ ຈາກນ້ອງນ້ອຍອະນຸບານ ໂຮງຮຽນບ້ານນ້ຳຂາມ, ຮັບຊົມສິນລະປະວັນນະຄະດີປະເພນີຕີເກີ່ງຂອງເຜົ່າໄປຼ່ ພ້ອມນີ້ ກໍ່ຍັງໄດ້ເຂົ້າຮ່ອມຂະບວນການຟ້ອນສາມະຄີດົນຕີເກີ່ງ ແລະ ທົດລອງຕີເກິ່ງຮ່ວມຂະບວນການຟ້ອນຢ່າງຄຶກຄື້ນມ່ວນຊື່ນຕື່ມອີກ.

ພາບຂ່າວ: ສົມປອງ ປະເສີດກຸນ





------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.