Header Ads

ກຸ່ມໂຮງຮຽນປະຖົມເທດສະບານເມືອງເງິນ ຈັດງານຖາມ-ຕອບ ຄຳຖາມວິທະຍາສາດ ແລະ ປະກວດສິລະປະ


ເພື່ອເປັນການເສີມສ້າງບັນຍາກາດໃນຂະບວນການຮຽນ-ການສອນ ທັງເປັນການກະຕຸກຊຸກຍູ້ໃຫ້ນັກຮຽນໄດ້ຄົ້ນຄວ້າ ຄວາມຮູ້ ແລະ ປະສົບການອັນໃໝ່ໆ ອີກຢ່າງກໍ່ເພື່ອເປັນການຄັດເລືອກນັກຕອບ-ຖາມ ຂອງໂຮງຮຽນ ເພື່ອກະກຽມເຂົ້າແຂ່ງຂັນງານຖາມ-ຕອບ ຄຳຖາມວິທະຍາສາດຂັ້ນເມືອງ ແລະ ແຂວງ ທີ່ຈະມາເຖິງໃນມໍ່ໆນີ້ ແລະ ເພື່ອສົ່ງເສີມວຽກງານສິລະປະໃນໂຮງຮຽນປະຖົມ-ອານຸບານຢູ່ພາຍໃນກຸ່ມໃຫ້ມີຂະບວນຟົດຟື້ນ ແລະ ມີການພັດທະນາຂຶ້ນເລື້ອຍໆ.






         
ມາໃນວັນທີ 27 ທັນວາ 2017ນີ້ຢູ່ທີ່ຫໍປະຊຸມບ້ານ ຂອນ ເມືອງເງິນ ແຂວງ ໄຊຍະບູລີ ໄດ້ຈັດງານຖາມ-ຕອບ ຄຳຖາມວິທະຍາສາດ ແລະ ງານແຂ່ງຂັນປະກວດສິລະປະຂອງນ້ອງນ້ອຍນັກຮຽນກຸ່ມໂຮງຮຽນປະຖົມ-ອານຸບານ ເທດສະບານເມືອງ. ພາຍໃຕ້ການເປັນປະທານຂອງທ່ານ ຈັນເພັງ ຈັນຖາວອນ ປະທານກຸ່ມປະຖົມເທດສະບານ, ເຂົ້າຮ່ວມເປັນກຽດມີທ່ານ ພັດ ບົວສະຫວັນ ຮອງຫົວໜ້າຫ້ອງການສຶກສາທິການ ແລະ ກິລາເມືອງ, ມີປະທານສະມາຄົມພໍ່ແມ່ນັກຮຽນ, ຫົວໜ້າໜ່ວຍງານ, ອຳນວຍການໂຮງຮຽນປະຖົມ-ອານຸບານ ເທດສະບານ, ແຂກ, ສະມາຄົມພໍ່ແມ່ນັກຮຽນ ແລະ ນ້ອງນັກຮຽນເຂົ້າຮ່ວມ.





ງານຖາມ-ຕອບຄຳຖາມວິທະຍາສາດໃນຄັ້ງນີ້ມີທິມເຂົ້າຮ່ວມແຂ່ງຂັນທັງໝົດ 14 ທິມ, ທິມລະ 3 ນ້ອງ, ມີ 7 ໂຮງຮຽນ, ໂຮງຮຽນລະ 2 ທິມຄື: ທິມ ປ4 ແລະ ປ5, ປະເພດຄຳຖາມແມ່ນໃຊ້ວິຊາສະເພາະ ແລະ ຄວາມຮູ້ຮອບຕົວ. ສຳລັບຜົນຂອງການແຂ່ງຂັນງານຖາມ-ຕອບ ຄຳຖາມວິທະຍາສາດ ກຸ່ມໂຮງຮຽນປະຖົມ ເທດສະບານ ປະຈຳສົກປີ 2017-2018 ນີ້ ອັນດັບທີ 1 ຫ້ອງ ປ4 ໄດ້ແກ່ໂຮງຮຽນ ປະຖົມສົມບູນປະຊາຮ່ວມໃຈ ແລະ ທີ 1 ຫ້ອງ ປ5 ໄດ້ແກ່ໂຮງຮຽນປະຖົມສົມບູນບ້ານຂອນ.

       

ຕອນບ່າຍຂອງວັນດຽວກັນນີ້ກໍ່ຊົມການແຂ່ງຂັນປະກວດສິລະປະຂອງນ້ອງນັກຮຽນ ປະຖົມ-ອານຸບານ ຈຳນວນ 13 ລາຍການຄື: ປະຖົມ 7 ລາຍການ ແລະ ອານຸບານ 6 ລາຍການ, ເຊິ່ງອັນດັບທີ 1 ຊັ້ນອານຸບານແມ່ນ ໂຮງຮຽນອານຸບານເມືອງ, ທີ 1 ຊັ້ນປະຖົມ ໄດ້ແກ່ໂຮງຮຽນປະຖົມສົມບູນນ້ຳເງິນ. ຕອນທ້າຍກໍ່ໄດ້ມອບຂອງຂວັນໃຫ້ນັກຖາມ-ຕອບ ແລະ ສິລະປະອີກດ້ວຍ.




 ໂດຍ: ອິນແປງ ແຫວນຄຳ




------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.