Header Ads

ເຈົ້າໜ້າທີ່ແຂວງບໍລິຄຳໄຊ ລົງກວດສິນຄ້າທີ່ຫ້າມນຳເຂົ້າປະເພດ



ເພື່ອເປັນການສະກັດກັ້ນ,ປົກປ້ອງຜູ້ບໍລິໂພກ ແລະ ຕ້ານການເອົາລັດເອົາປຽບຂອງຜູ້ຊື້ ແລະ ຜູ້ຂາຍໃນໄລຍະປີໃໝ່ສາກົນ; ດັ່ງນັ້ນ ໃນລະຫວ່າງວັນທີ 18-23 ທັນວານີ້ ເຈົ້າໜ້າທີ່ກວດກາສິນຄ້າ, ພະແນກອຸດສາຫະກຳ ແລະ ການຄ້າແຂວງ, ເມືອງປາກຊັນ ໄດ້ລົງເຄື່ອນໄຫວກວດກາສິນຄ້າຢູ່ບັນດາຫ້າງຮ້ານຕ່າງໆໃນເທດສະບານເມືອງປາກຊັນ ແຂວງບໍລິຄຳໄຊ ເຊັ່ນ: ຢູ່ຕະຫຼາດປາກຊັນໃໝ່, ຕະຫຼາດປາກຊັນເກົ່າ ແລະບັນດາຫ້າງຮ້ານຂາຍເຄື່ອງຍ່ອຍທົ່ວໄປພາຍໃນຕົວເມືອງປາກຊັນ.

ຜ່ານການລົງເຄື່ອນໄຫວຂອງເຈົ້າໜ້າທີ່ສາມາດກວດພົບເຫັນສິນຄ້າຫ້າມນຳເຂົ້າປະເພດ: ຊີ້ນສ່ວນສັດ, ເຄື່ອງໃນສັດ, ຊີ້ນສ່ວນໄກ່ປອກ ແລະ ອາຫານທະເລຈຳນວນໜຶ່ງທີ່ໝົດອາຍຸການບໍລິໂພກ, ເຊື່ອມຄຸນ ແລະ ບໍ່ມີກາເຄື່ອງໝາຍ ອຢ. ນອກນີ້ຍັງສາມາດກວດກາພົບເຫັນສິນຄ້າປະເພດ: ນົມ, ເຂົ້າໜົມ, ໝີ່ສຳເລັດຮູບ ແລະ ເຄື່ອງອຸປະໂພກ-ບໍລິໂພກຈຳນວນໜຶ່ງ ທີ່ໝົດອາຍຸການນຳໃຊ້ທີ່ວາງຂາຍຢູ່ບັນດາຮ້ານຕ່າງໆໃນເທດສະບານເມືອງ.
ພ້ອມນີ້ຄະນະກວດກາສິນຄ້າຍັງໄດ້ກວດກາຊີງຊັງ, ລາຄາສິນຄ້າ ເພື່ອບໍ່ໃຫ້ແມ່ຄ້າຊາວຂາຍສວຍໂອກາດຂຶ້ນລາຄາ ໃນຊ່ວງປີໃໝ່ສາກົນ 2018 ນີ້.
ສຳລັບສິນຄ້າທີ່ໝົດອາຍຸການນຳໃຊ້ໃນການກວດພົບເຫັນຂອງເຈົ້າໜ້າທີ່ໃນຄັ້ງນີ້ແມ່ນໄດ້ຍຶດເອົາມາໄວ້ຢູ່ຫ້ອງການອຸດສາຫະກຳ ແລະການຄ້າເມືອງປາກຊັນ ເພື່ອເອົາໄປທຳລາຍຖິ້ມ,ສ່ວນແມ່ຄ້າຊາວຂາຍຜູ້ທີ່ກະທຳຜິດເຈົ້າໜ້າທີ່ໄດ້ກ່າວເຕືອນ, ສຶກສາອົບຮົມ,ເຮັດບົດບັນທຶກ ແລະ ໃຊ້ມາດຕະການປັບໃໝຕາມລະບຽບກົດໝາຍ.
ຂ່າວ: ເສດຖະກິດການຄ້າ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.