Header Ads

ກໍ່ເຫດຊິງລົດຈັກ ຖືກພົນລະເມືອງຈັບສົ່ງດຳເນີນຄະດີ



ການຂັບຂີ່ລົດຈັກຢູ່ຕາມທ້ອງຖະໜົນໃນຍາມການຄືນ ຍັງມີຄວາມສ່ຽງຫຼາຍທີ່ຈະຖືກກຸ່ມຄົນບໍ່ດີລົງມືຊິງຊັບ ( ຊິງ ເອົາລົດຈັກ ) ໂດຍສະເພາະຜູ້ຂັບຂີ່ທີ່ເປັນຜູ້ຍິງ ຕ້ອງມີຄວາມລະມັດລະວັງ, ຫຼີກລ່ຽງການຂັບຂີ່ຄົນດຽວ ແລະ ໄປເສັ້ນທາງທີ່ມີຄວາມສ່ຽງ, ດັ່ງເຫດການຄົນບໍ່ດີໄດ້ຊິງເອົາລົດຈັກຂອງນາງ ມະນີສອນ ອາຍຸ 24 ປີ ບ້ານໂນນບໍ່ແກ້ວ ເມືອງໄຊທານີ ນະຄອນຫຼວງວຽງຈັນ ໃນຄໍ່າຄືນຂອງວັນທີ 21 ຕຸລາ 2017 ທີ່ຜ່ານມາ ຢູ່ເສັ້ນທາງເລກ 10 ເຂດຕະຫຼາດດົງໝາກຄາຍ ເມືອງໄຊທານີ ແຕ່ໂຊກດີມີພົນລະເມືອງດີພົບເຫັນ ສາມາດສະກັດຄົນຮ້າຍໄວ້ໄດ້ 1 ຄົນ, ສ່ວນອີກຄົນເອົາຕົວຫຼົບໜີ ແລະ ປະສານເຈົ້າໜ້າທີ່ນໍາຕົວໄປດໍາເນີນຄະດີ.
ເຈົ້າໜ້າທີ່ຕໍາຫຼວດວິຊາສະເພາະ ປກສ ເມືອງໄຊທານີ ນະຄອນຫຼວງວຽງຈັນ ໃຫ້ຮູ້ວ່າ: ໃນເວລາປະມານກາງຄືນຂອງມື້ເກີດເຫດ ເຈົ້າໜ້າທີ່ໄດ້ຮັບແຈ້ງຈາກພົນລະເມືອງດີວ່າ ມີເຫດການກໍ່ເຫດຊິງເອົາລົດຈັກ ຢູ່ເຂດຕະຫຼາດດົງໝາກຄາຍ ເມືອງໄຊທານີ ຄົນຮ້າຍກໍາລັງຈະເອົາຕົວຫຼົບໜີ ພ້ອມລົດທີ່ຊິງມາ ໃນຂະນະນັ້ນ ພົນລະເມືອງດີມາພົບເຫັນເຫດການ ຈຶ່ງສະກັດຄົນຮ້າຍເອົາໄວ້ໄດ້ 1 ຄົນ ແລະ ອີກ 1 ຄົນ ເອົາຕົວຫຼົບໜີ, ພໍໄດ້ຮັບແຈ້ງເຈົ້າໜ້າທີ່ກໍລົງໄປສະຖານທີ່ເກີດເຫດທັນທີ ພ້ອມທັງເອົາຕົວຄົນຮ້າຍຈາກພົນລະເມືອງດີ ມາດໍາເນີນການສອບສວນທີ່ກອງບັນຊາການ.
ຜ່ານການສອບສວນ ຜູ້ກໍ່ເຫດຊື່ທ້າວ ໂຕ້ໂນ ອາຍຸ 23 ປີ ບ້ານໂພນງາມ ເມືອງປາກເຊ ແຂວງຈໍາປາສັກ ສາລະພາບວ່າ: ໄດ້ຮ່ວມມືກັບທ້າວ ເສືອ ອາຍຸ 25 ປີ ບ້ານໄຮ່ ເມືອງປາກງື່ມ ທີ່ກໍາລັງເອົາຕົວຫຼົບໜີ ຊິງຊັບຂອງພົນລະເມືອງແທ້, ເຊິ່ງກ່ອນກໍ່ເຫດຕອນຫົວຄໍ່າ ທ້າວ ເສືອ ໄດ້ຂັບຂີ່ລົດຈັກມາຫາຕົນ ແລ້ວຢືມເງິນຈໍານວນ 10.000 ກີບ ຈາກນັ້ນ ກໍຂັບຂີ່ລົດອອກໄປ, ຮອດເວລາປະມານ 22:00 ໂມງ ຂອງວັນດຽວກັນ ທ້າວ ເສືອ ໄດ້ຂັບຂີ່ລົດຈັກມາຫາຕົນ ແລະ ກໍພາກັນຂັບຂີ່ລົດຈັກເລາະໄປຕາມເສັ້ນທາງເລກ 10 ເພື່ອກໍ່ເຫດຊິງຊັບ, ພໍຂັບຂີ່ມາຮອດເຂດຕະຫຼາດດົງໝາກຄາຍ ໄດ້ພົບເຫັນຜູ້ຍິງຄົນໜຶ່ງກໍາລັງຂັບຂີ່ລົດຈັກເວບ 100 ມາຄົນດຽວ ມຸ່ງໜ້າໄປທາງໄຟອໍານາດບ້ານໂນນສະອາດ ເມືອງໄຊທານີ, ຈາກນັ້ນ ທ້າວ ເສືອ ຈຶ່ງຂັບຂີ່ລົດຈັກຕາມຫຼັງເປົ້າໝາຍໄປຊ້າໆ ເພື່ອຫາໂອກາດລົງມືກໍ່ເຫດ, ພໍຮອດຈຸດເກີດເຫດ ທ້າວ ເສືອ ໄດ້ຂີ່ລົດຈັກຕັດໜ້າເປົ້າໝາຍຢ່າງກະທັນຫັນ ເຮັດໃຫ້ເປົ້າໝາຍຢຸດລົດ, ຈາກນັ້ນ ໄດ້ມີການຂົ່ມຂູ່ ເຮັດໃຫ້ເປົ້າໝາຍຢ້ານ ແລະ ຍອມມອບລົດໃຫ້, ໃນຂະນະທີ່ກໍາລັງຈະເອົາລົດຫຼົບໜີ ໄດ້ມີພົນລະເມືອງດີມາພົບເຫັນເຫດການ ຈຶ່ງໄດ້ສະກັດຈັບຕົວຕົນເອງ ພ້ອມຂອງກາງທີ່ເປັນລົດຈັກ 1 ຄັນ ສ່ວນທ້າວ ເສືອ ໄດ້ເອົາຕົວຫຼົບໜີຈາກສະຖານທີ່ເກີດເຫດ, ຈາກນັ້ນ ພົນລະເມືອງດີໄດ້ປະສານຫາເຈົ້າໜ້າທີ່ຕໍາຫຼວດ ມາຄວບຄຸມຕົວໄປດໍາເນີນຄະດີ.
ຜ່ານມາ, ຕົນໄດ້ຮູ້ຈັກກັບທ້າວ ເສືອ ໄດ້ຮູ້ຈັກກັນຕອນໄປເຮັດວຽກຢູ່ປາກເຊ ພໍຂຶ້ນມາເຮັດວຽກຢູ່ວຽງຈັນ ໄດ້ມີການຕິດຕໍ່ພົວພັນກັບທ້າວ ເສືອ ຢ່າງເປັນປະຈໍາ, ຈຸດປະສົງໃນການກໍ່ເຫດຄັ້ງນີ້ ເພື່ອນໍາຊັບສິນທີ່ໄດ້ມາໄປຂາຍ ແລະ ນໍາເອົາເງິນມາຈ່າຍຫຼິ້ນກິນຟຸມເຟືອຍ, ຕໍ່ກັບຄະດີດັ່ງກ່າວ ເຈົ້າໜ້າທີ່ຍັງເລັ່ງຕິດຕາມຕົວທ້າວ ເສືອ ທີ່ກໍາລັງເອົາຕົວຫຼົບໜີມາດໍາເນີນຄະດີ ພ້ອມທັງຝາກເຕືອນມາຍັງພໍ່-ແມ່ປະຊາຊົນ ແລະ ທຸກຊັ້ນຄົນໃນສັງຄົມ ຈົ່ງມີສະຕິໃນການຂັບຂີ່ ເພາະອາດຈະເປັນເປັນເປົ້າໝາຍຂອງກຸ່ມຄົນບໍ່ດີໄດ້.
ທີ່ມາ: ນສພ ຄວາມສະຫງົບ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.