Header Ads

ການຈັດສົ່ງແຮງງານລາວໄປ ສ. ເກົາຫຼີ




ທ່ານ ຄຳແສນ ໄຊຍະວົງ ຫົວໜ້າສູນບໍລິການ ລາວຈັດຫາງານ ໄດ້ໃຫ້ສຳພາດແກ່ວາລະສານ ແຮງງານ ແລະ ສະຫວັດດີການສັງຄົມ ຂອງພວກເຮົາກ່ຽວກັບການຈັດສົ່ງແຮງງານລາວໄປເຮັດວຽກຢູ່ ສາທາລະນະລັດ ເກົາຫຼີ ໃຫ້ຮູ້ວ່າ: ປະຈຸບັນຫຼັງຈາກເປີດຮັບສະໝັກແຮງງານລາວທີ່ມີຈຸດປະສົງທີ່ຈະໄປອອກແຮງງານຢູ່ ສ. ເກົາຫຼີ, ໄດ້ມີຜູ້ມາລົງທະບຽນແລ້ວຈຳນວນ 741 ຄົນ, ໃນນັ້ນມີເງື່ອນໄຂເຂົ້າເສັງ 609 ຄົນ, ເສັງພາສາເກົາຫຼີຜ່ານ (ຄວາມຮູ້ທົ່ວໄປ) ຈຳນວນ 69 ຄົນ, ໃນຈຳນວນນີ້ເຂົ້າເສັງຮອບທີ່ສອງຕື່ມອີກ ເອີ້ນວ່າເສັງທັກສະ ແລະ ມີຄົນເສັງຜ່ານຮອບສອງ 59 ຄົນ, ໃນຈຳນວນທີ່ເສັງຜ່ານຮອບສອງນີ້ ຕ້ອງໄດ້ກວດພະຍາດ ຕາມລາຍການທີ່ທາງ ສ. ເກົາຫຼີ ກຳນົດ, ຖ້າຜູ້ໃດເປັນພະຍາດຕ້ອງຫ້າມຖືວ່າບໍ່ມີສິດໄປເຮັດວຽກຢູ່ ສ. ເກົາຫຼີ ອີກ.



ທ່ານ ຄຳແສນ ໄຊຍະວົງ ຫົວໜ້າສູນບໍລິການ ລາວຈັດຫາງານ ຍັງແຈ້ງໃຫ້ຮູ້ຕື່ມອີກວ່າ ສຳລັບເງື່ອນໄຂຂອງຜູ້ທີ່ຈະໄປເຮັດວຽກຢູ່ ສ. ເກົາຫຼີ ຕ້ອງມີດັ່ງນີ້: 1/ ເປັນຄົນສັນຊາດລາວ ອາຍຸ 18-39 ປີ, ມີສຸຂະພາບແຂງແຮງບໍ່ເປັນພະຍາດໃດໜຶ່ງທີ່ ສ. ເກົາຫຼີ ຫ້າມເຂົ້າປະເທດ, ມີຄວາມຮູ້ພື້ນຖານທາງດ້ານພາສາເກົາຫຼີ, ບໍ່ເປັນຜູ້ທີ່ຖືກຕ້ອງໂທດ ຫຼື ມີຄະດີ, ບໍ່ເປັນຜູ້ຕ້ອງຫ້າມເຂົ້າປະເທດ ສ. ເກົາຫຼີ ແລະ ມີທຶນສາມາດຊຳລະຄ່າໃຊ້ຈ່າຍດ້ວຍຕົນເອງ. 2/ ຜູ້ສະໝັກຕ້ອງໄດ້ປະກອບເອກະສານ ແລະ ຜ່ານຂັ້ນຕອນຕ່າງໆ ຕາມລະບົບຈັດສົ່ງ, ພາຍຫຼັງທີ່ຖືກຄັດເລືອກຈາກນາຍຈ້າງແລ້ວຜູ້ກ່ຽວຈຶ່ງມີສິດໄປເຮັດວຽກຢູ່ ສ. ເກົາຫຼີ, ກຳນົດ 4 ປີກັບ 10 ເດືອນ, ສ່ວນຜູ້ທີ່ເສັງຜ່ານ ປະກອບເອກະສານຄົບຖ້ວນຕາມລະບົບແຕ່ບໍ່ຖືກຄັດເລືອກຈາກນາຍຈ້າງ ຜູ້ກ່ຽວມີສິດເຂົ້າໃນລາຍຊື່ລໍຖ້າໄປເຮັດວຽກຢູ່ ສ. ເກົາຫຼີ ຕື່ມອີກ 1 ປີ, ຖ້າອີກ 1 ປີ ບໍ່ຖືກຄັດເລືອກ, ຫາກຜູ້ກ່ຽວຍັງຢາກສືບຕໍ່ໄປເຮັດວຽກຢູ່ ສ. ເກົາຫຼີ ຕ້ອງໄດ້ເລີ່ມຕົ້ນປະຕິບັດທຸກຂັ້ນຕອນຄືນໃໝ່. 3/ ຄ່າໃຊ້ຈ່າຍດຳເນີນການທັງໝົດເລີ່ມແຕ່ລົງທະບຽນເຂົ້າສອບເສັງ, ຄ່າປະກອບເອກະສານຕ່າງໆ, ຄ່າວີຊາ, ຄ່າເດີນທາງ ແລະ ອື່ນໆ ແມ່ນຜູ້ອອກແຮງງານເປັນຜູ້ຮັບຜິດຊອບເອງທັງໝົດໂດຍພື້ນຖານແລ້ວປະມານ 1.250 $(ໂດລາສະຫະລັດ) ຕໍ່ຄົນ.


ໃນຕອນທ້າຍນີ້ ທ່ານຍັງໄດ້ຝາກຄຳຄິດເຫັນໃຫ້ຜູ້ທີ່ຕ້ອງການໄປອອກແຮງງານຢູ່ ສ. ເກົາຫຼີ ກໍ່ຄືໄປອອກແຮງງານຢູ່ຕ່າງປະເທດວ່າ: ເພື່ອບໍ່ໃຫ້ເສຍທຶນຮອນຫຼືເສຍເວລາຜູ້ສະໝັກມີຄວາມຈຳເປັນຕ້ອງໄດ້ສຶກສາຂັ້ນຕອນລະອຽດກ່ອນ, ຈຶ່ງຕັດສິນໃຈສະໝັກ ແລະ ບໍ່ໃຫ້ເຊື່ອຟັງ ຄຳຕົວະຍົວະຫຼອກລວງຈາກກຸ່ມຄົນທີ່ເປັນນາຍໜ້າ, ການໄປເຮັດວຽກຢູ່ຕ່າງປະເທດບໍ່ໄດ້ງ່າຍຄືທ່ານຄິດ, ໃຫ້ໝັ້ນໃຈ ແລະ ມີຄວາມພ້ອມທຸກຢ່າງກ່ອນ ຈຶ່ງດຳເນີນການ, ຖ້າສົນໃຈຂໍ້ມູນລະອຽດ ໃຫ້ພົວພັນນຳສູນບໍລິການຈັດຫາງານ (ໂທ 021-250993) ຫຼື ພະແນກ ຮສສ ແຂວງ.


ທີ່ມາ: ກະຊວງແຮງງານ ແລະ ສະຫວັດດີການສັງຄົມ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.