Header Ads

ໄອໂລ-ພະແນກ ຮສສ ເຊກອງ ຫາລືກໍານົດກິດຈະກໍາປີ 2018




ອົງການແຮງງານສາກົນ ຫຼື (ILO) ຮ່ວມກັບພະແນກແຮງງານ ແລະສະຫວັດດີການສັງຄົມ (ຮສສ) ແຂວງເຊກອງຈັດກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານປະຈຳປີ 2017 ແລະປຶກສາຫາລືຫົວຂໍ້ກິດຈະກຳ ເພື່ອສືບຕໍ່ຈັດຕັ້ງປະຕິບັດໃນປີ 2018 ເມື່ອວັນທີ 25 ມັງກອນ 2018 ທີ່ຫ້ອງປະຊຸມພະແນກແຮງງານ ແລະສະຫວັດດີການສັງຄົມແຂວງ ໂດຍໃຫ້ກຽດເຂົ້າຮ່ວມຂອງທ່ານ ຖາວອນ ພົມມະໄລລຸນ ຮອງເຈົ້າແຂວງເຊກອງ, ທ່ານ ໄທ ແສງອາລຸນ ຮອງຫົວໜ້າກົມພັດທະນາສີມືແຮງງານ ແລະຈັດຫາງານ, ທ່ານ ນາງ ແຊນດຣາຢູ ຜູ້ຕາງໜ້າ ອົງການແຮງງານສາກົນ, ຄະນະຜູ້ປະສານງານໂຄງການຂັ້ນແຂວງ ແລະພາກສ່ວນກ່ຽວຂ້ອງ.



ໂອກາດນີ້ ທ່ານ ພູນສະຫວັດ ແສງພະຈັນ ຄະນະຜູ້ປະສານງານໂຄງການຂັ້ນແຂວງ ໄດ້ນຳສະເໜີຈຸດປະສົງເປົ້າໝາຍ, ຄາດໝາຍ ແລະບັນດາກິດຈະກໍາທີ່ຈະສືບຕໍ່ຈັດຕັ້ງປະຕິບັດໃນປີ 2018 ລວມມີ 14 ກິດຈະກໍາຄື: ກິດຈະກໍາສົ່ງເສີມຕ່ອງໂສ້ກັບການຕະຫຼາດຂອງກາເຟ; ກິດຈະກໍາສົ່ງເສີມການປູກເຫັດໃນເຂດບ້ານເປົ້າໝາຍ; ກິດຈະກຳປັບປຸງສີມືການສ້ອມແປງລົດຈັກ; ກິດຈະກໍາສົ່ງເສີມການລ້ຽງໄກ່ພື້ນເມືອງ; ກິດຈະກຳຝຶກອົບຮົມເຕັກນິກການລ້ຽງປາ; ກິດຈະກໍາການສ້າງຕັ້ງກຸ່ມທຸລະກິດ-ການບໍລິຫານ; ກິດຈະກຳຝຶກອົບກ່ຽວກັບສຸຂະພາບ-ຄວາມປອດໄພໃນການເຮັດວຽກ; ກິດ ຈະກຳຝຶກອົບກົດໝາຍແຮງງານ; ກິດຈະກຳກໍ່ສ້າງຊົນລະປະທານຂະໜາດນ້ອຍ; ກິດຈະກໍາສ້າງຕັ້ງລະບົບຕິດຕາມກິດ ຈະກຳຂອງໂຄງການ; ກິດຈະກຳສ້າງແຜນກິດຈະກຳຂອງບ້ານ; ກິດຈະກໍາສົ່ງເສີມຜະລິດຕະພັນວັດທະນະທໍາ; ກິດຈະກຳຝຶກອົບຮົມບົດບາດຍິງ-ຊາຍ ແລະ ກິດຈະກຳຝຶກອົບຮົມທຸລະກິດ ແລະການເປັນຜູ້ປະກອບການ.



ທ່ານ ພູນສະຫວັດ ແສງພະຈັນໃຫ້ຮູ້ອີກວ່າ: ໂຄງການສົ່ງເສີມການສ້າງລາຍໄດ້ ແລະສົ່ງເສີມການສ້າງວຽກເຮັດງານທຳໃນຊົນນະບົດ ເພື່ອຫຼຸດຜ່ອນຄວາມທຸກຍາກຂອງພໍ່ແມ່ປະຊາຊົນບັນດາເຜົ່າ ແມ່ນໄດ້ຮັບການສະໜັບສະໜູນງົບປະມານຈາກອົງການແຮງງານສາກົນ (ILO) ຊຶ່ງເປົ້າໝາຍຂອງໂຄງການແມ່ນກວມເອົາ 2 ເມືອງລວມມີ 24 ບ້ານຄື: ເມືອງລະມາມມີ 8 ບ້ານ ແລະເມືອງດາກຈຶງມີ 16 ບ້ານ ໂດຍໃນປີ 2017 ຜ່ານມາ ແມ່ນໄດ້ສຸມໃສ່ຈັດຕັ້ງປະຕິບັດ 8 ກິດຈະກໍາ, ໂດຍໄດ້ນໍາໃຊ້ງົບປະມານທັງໝົດ 1,8 ຕື້ກວ່າກີບ.




ພ້ອມດຽວກັນນັ້ນ ຜູ້ແທນທີ່ເຂົ້າຮ່ວມຍັງໄດ້ຄົ້ນຄວ້າປະກອບຄຳຄິດຄຳເຫັນປຶກສາຫາລືປັບປຸງບາງເນື້ອໃນ ແລະບາງຫົວຂໍ້ກິດຈະກຳຂອງໂຄງການໃຫ້ມີຄວາມສົມບູນ ແລະຖືກຕ້ອງຕາມແນວທາງການພັດທະນາ, ທັງນີ້ ກໍເພື່ອແນໃສ່ເຮັດໃຫ້ໂຄງການດຳເນີນໄປຢ່າງມີປະສິດທິພາບ, ມີຄວາມຍືນຍົງ ແລະບັນລຸຕາມຈຸດປະສົງຄາດໝາຍທີ່ກຳນົດໄວ້.


ຂ່າວ : ສັນຍາ/ຂ່າວແຂວງເຊກອງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.