Header Ads

ເມືອງພູຄູນຕ້ອນຮັບປີໃໝ່ ແລະ ລັ່ນຄ້ອງເປີດປີທ່ອງທ່ຽວລາວ 2018 ທ່າມກາງສາຍໝອກ! ຢ່າງຟົດຟື້ນ!



ເມືອງ ພູຄູນ ລັ່ນຄ້ອງເປີດປີທ່ອງທ່ຽວລາວ 2018 ຢ່າງເປັນທາງການ.

     ເນື່ອງໃນໂອກາດຕ້ອນຮັບປີໃຫມ່ສາກົນ ກໍ່ຄື ວັນທີ່ 1 ມັງກອນ  2018 ນີ້ ເມືອງ ພູຄູນ ແຂວງ ຫຼວງພະບາງ  ໄດ້ຈັດພິທີເປີດປີທ່ອງທ່ຽວລາວ ຂຶ້ນຢ່າງເປັນທາງການ. ໂດຍການໃຫ້ກຽດເຂົ້າຮ່ວມຂອງ ທ່ານ ມອນໄຊ ລາມົວຊົງ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງ, ທ່ານ ປອ ຈັນ ແສງ ພົມມະວົງ ຮອງລັດຖະມົນຕີ ກະຊວງ ວິທະຍາສາດ ແລະ ເຕັກໂນໂລຊີ ພ້ອມທັງການນຳຂອງແຂວງ, ເມືອງ, ຕະຫຼອດຮອດພໍ່ແມ່ປະຊາຊົນພາຍໃນເມືອງເຂົ້າຮ່ວມ.



     ພິທີ ໄດ້ຮັບຊົມການເດີນຂະບວນຈາກກ້ອນກຳລັງຂອງນັກຮຽນ, ຊາວໜຸ່ມ, ຊົນເຜົ່າຈາກບ້ານອ້ອຂ້າງ ຕະຫຼອດຮອດກຳລັງປະກອບອາວຸດ ຢ່າງຄຶກຄຶ້ນ.

     ຈາກນັ້ນ  ທ່ານ ປທ ເພັດສະໝອນ ຮອງເຈົ້າເມືອງໆພູຄູນ ໄດ້ຂຶ້ນລາຍງານໃຫ້ຮູ້ວ່າ: ການເປີດປີທ່ອງທ່ຽວລາວ 2018 ທີ່ເມືອງພູຄູນຄັ້ງນີ້ໄດ້ຈັດໃຫ້ມີຫຼາຍກິດຈະກຳໃນເວລາດຽວກັນ ເຊັ່ນ: ການຈັດງານຕະຫຼາດນັດວາງສະແດງສິນຄ້າກະສິກຳ ແລະ ຫັດທະກຳ, ງານປະກວດນາງສາວຊົນເຜົ່າ ແລະ ບຸນປະເພນີອັນດີງາມຂອງຊົນເຜົ່າ ກໍ່ຄື ບຸນປົດປີ ຂອງຊົນເຜົ່າ ກືມມຸ ແລະ ບຸນກິນຈຽງຂອງຊົນເຜົ່າມົ້ງ ນອກນັ້ນຍັງມີກິດຈະກຳຍ່ອຍຂອງຊົນເຜົ່າ ຄື: ກິລາງົວຊົນງົວ, ໄກ່ຕໍ່ຕີໄກ່ຕໍ່ ແລະ ອື່ນໆ.



ນອກນັ້ນ ທາງອົງການປົກຄອງເມືອງພູຄູນ ຍັງໄດ້ກຳນົດທິດທາງໃນການຂະຫຍາຍການທ່ອງທ່ຽວຕາມແຫຼ່ງທ່ອງທ່ຽວທຳມະຊາດ, ປະຫວັດສາດ, ວັດທະນະທຳ ແລະ ຕິດພັນກັບການກະສິກຳ ດັ່ງຄຳຂວັນໃນປີ 2018 ໄດ້ເວົ້າວ່າ: “ ທ່ອງທ່ຽວເມືອງພູຄູນ ຮຽນຮູ້ປະຫວັດສາດ ຊື່ນຊົມທຳມະຊາດຕິດພັນກັບການກະສິກຳ ແລະ ອານຸລັກສົ່ງເສີມວັດທະນະທຳບັນດາເຜົ່າ.”



     ສຳລັບ ເມືອງ ພູຄູນ ກໍ່ມີສະຖານທີ່ແຫຼ່ງທ່ອງທ່ຽວຫຼາຍແຫ່ງທີ່ໜ້າສົນໃຈ ເຊັ່ນ: ທ່ຽວຊົມທຳມະຊາດ ແລະ ສຳພັດອາກາດສົດ ທີ່ ສາລາຄຳພູຄູນ, ທ່ຽວຊົມສວນກະສິກະສະຕໍເບີຣີ, ທ່ຽວຊົມແຫຼ່ງທ່ອງທ່ຽວທາງທຳມະຊາດ ຖ້ຳນ້ຳລອດ, ເຄື່ອນນ້ຳງື່ມ 5 , ທ່ຽວຊົມແຫຼ່ງທ່ອງທ່ຽວບູຮານນະຄະດີ ທົ່ງໄຫຫີນເມືອງພູຄູນ ແລະ ສະຖານທີ່ອື່ນໆອີກທີ່ໜ້າສົນໃຈ. ຈາກນັ້ນ ທ່ານ ວຽງທອງ ຫັດສະຈັນ ກຳມະການພັກແຂວງ ເລຂາພັກເມືອງ ເຈົ້າເມືອງພູຄູນໄດ້ຂຶ້ນກ່າວເປີດພິທີຢ່າງເປັນທາງການ ແລະ ໃຫ້ກຽດລັ່ນຄ້ອງ 9 ບາດ ເພື່ອເປັນສີລິມຸງຄຸນໃຫ້ແກ່ການເປີດປີທ່ອງທ່ຽວລາວ 2018 ທີ່ ເມືອງ ພູຄູນ ຄັ້ງນີ້ ໂດຍ ທ່ານ ມອນໄຊ ລາມົວຊົງ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງ ຫຼວງພະບາງ.



       ພາບ-ຂ່າວ: ຕ່າມ ສອນເພັດ



------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.