Header Ads

ທ່ານອາຊາງລາວລີເນັ້ນໃຫ້ແຂວງໄຊຍບູລີເອົາໃຈໃສ່ວຽກງານ 3 ສ້າງ



ແຂວງ ໄຊຍະບູລີ : ໃນລະຫວ່າງວັນທີ 25-27 ມັງກອນ 2018 ນີ້ ທ່ານ ອາຊາງ ລາວລີ ອາດີດກຳມະການກົມການເມືອງສູນກາງພັກ, ອາດີດຮອງນາຍົກລັດຖະມົນຕີ, ທີ່ປຶກສາດ້ານວຽກງານກໍ່ສ້າງຮາກຖານການເມືອງ ຂອງຄະນະບໍລິຫານງານສູນກາງພັກສະໄໝທີ Xພ້ອມດ້ວຍຄະນະ, ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງ ໄຊຍະບູລີ, ໃຫ້ການຕ້ອນຮັບໂດຍ ທ່ານ ພົງສະຫວັນ ສິດທະວົງ ກໍາມະການສູນກາງພັກ, ເລຂາພັກແຂວງ, ເຈົ້າແຂວງ ໄຊຍະບູລີ, ມີບັນດາກໍາມະການປະຈໍາພັກແຂວງ, ກໍາມະການພັກແຂວງ ແລະ ພະນັກງານຫຼັກແຫຼ່ງຂອງແຂວງ ໃຫ້ການຕ້ອນຮັບຢ່າງອົບອຸ່ນ.



ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ, ໄດ້ລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງໂດຍຫຍໍ້, ທ່ານໄດ້ກ່າວວ່າ: ຜ່ານມາອົງການປົກຄອງແຂວງ ໄດ້ເອົາໃຈໃສ່ຊີ້ນໍາຜັນຂະຫຍາຍ ມະຕິ ຂອງສະພາແຫ່ງຊາດ, ດໍາລັດຂອງນາຍົກ ແລະ ບົດແນະນໍາຂອງກະຊວງແຜນການ ແລະ ການລົງທຶນ, ກະຊວງການເງິນ ແລະ ທະນາຄານ ແຫ່ງ ສ ປປ ລາວ ວ່າດ້ວຍການຮັບຮອງ ແລະ ຜັນຂະຫຍາຍ ແຜນພັດທະນາເສດຖະກິດ-ສັງຄົມ, ແຜນງົບປະມານ ແລະ ເງິນຕາ ປະຈໍາປີ 2015-2016 ແລະ ແຜນປີ 2017 ມາເປັນຄໍາແນະນໍາ ເພີ່ມເຕີມຂອງເຈົ້າແຂວງ ແລະ ເລີ່ມຈັດຕັ້ງປະຕິບັດ, ຜ່ານການຈັດຕັ້ງປະຕິບັດ 1 ປີຜ່ານມາເຫັນວ່າ ເສດຖະກິດຂອງແຂວງ ແມ່ນສືບຕໍ່ຂະຫຍາຍຕົວໃນລະດັບ 8,5% ຍອດຜະລິດຕະພັນພາຍໃນບັນລຸ 8,234 ຕື້ກີບ




ສະເລ່ຍຕໍ່ຫົວຄົນເທົ່າກັບ 2,596 ໂດລາສະຫະ, ຄວາມທຸກຍາກຂອງປະຊາຊົນ ໄດ້ຮັບການແກ້ໄຂຢ່າງເປັນຮູບປະທໍາ, ບັນດາໂຄງການລົງທຶນຂອງລັດ, ທຶນຊ່ວຍເຫຼືອກູ້ຢືມ, ທຶນຂອງເອກະຊົນ ພາຍໃນ ແລະ ຕ່າງປະເທດ ທີ່ໄດ້ຮັບອະນຸມັດ ມາຈັດຕັ້ງປະຕິບັດຢູ່ພາຍໃນແຂວງ ໄດ້ຮັບການຄຸ້ມຄອງ, ຕິດຕາມ, ຊຸກຍູ້ ແລະ ດໍາເນີນໄປຕາມຂັ້ນຕອນ ຂອງລະບຽບກົດໝາຍ, ໂຄງການສ່ວນໃຫຍ່ ແມ່ນມີປະສິດທິຜົນ ແລະ ປະກອບສ່ວນ ເຂົ້າໃນການແກ້ໄຂ ຄວາມທຸກຍາກຂອງປະຊາຊົນ, ພື້ນຖານໂຄງລ່າງທີ່ຈໍາເປັນ ສືບຕໍ່ໄດ້ຮັບການ ປັບປຸງ-ແກ້ໄຂ ເປັນຕົ້ນ ສໍາເລັດການປູຢ່າງທາງ 2 ຊັ້ນ ເມືອງເງິນ-ຊຽງຮ່ອນ, ຊຽງຮ່ອນ-ເມືອງຄອບ, ປາງມອນ-ກ່ອນຕື້ນ (ເມືອງປາກທາ ແຂວງບໍ່ແກ້ວ), ປູຢາງທາງ 2 ຊັ້ນ ເມືອງປາກລາຍ-ເມືອງທົ່ງມີໄຊ ຄາດວ່າທ້າຍປີ 2018 ຈະສໍາເລັດ, ໄດ້ຂະຫຍາຍຕາຄ່າຍໄຟຟ້າ ສູ່ຊົນນະບົດຕື່ມອີກຈໍານວນ 6 ບ້ານ, ແລະ ຈໍານວນ 8.466 ຄອບຄົວ, ເຮັດໃຫ້ອັດຕາການຊົມໃຊ້ໄຟຟ້າໃນທົ່ວແຂວງເພີ່ມຂຶ້ນເປັນ 97,78%ຂອງຄອບຄົວທັງໝົດໃນທົ່ວແຂວງ.


ໂອກາດດັ່ງກ່າວ ທ່ານ ອາຊາງ ລາວລີ ກໍ່ໄດ້ໃຫ້ກຽດໂອ້ລົມຕໍ່ພະນັກງານຫຼັກແຫຼ່ງຂອງແຂວງ, ກ່ອນອື່ນ ທ່ານໄດ້ຍ້ອງຍໍຊົມເຊີຍຕໍ່ຜົນງານທີ່ແຂວງຍາດມາໄດ້, ພ້ອມທັງໄດ້ຮຽກຮ້ອງໃຫ້ການນໍາຂອງແຂວງທຸກຂັ້ນຈົ່ງສືບຕໍ່ ເຮັດໃຫ້ເສດຖະກິດຂອງແຂວງມີການຂະຫຍາຍຕົວຕໍ່ເນື່ອງ, ເຮັດໃຫ້ປະຊາຊົນມີຢູ່ມີກິນກ້າວໄປສູ່ການລຸດພົ້ນອອກຈາກຄວາມທຸກຍາກໃຫ້ໄດ້ຢ່າງສິ້ນເຊີງ, ເອົາໃຈໃສ່ສຶກສາອົບອົບ ພະນັກງານ ແລະ ປະຊາຊົນໃຫ້ສາມັກຄີປອງດອງເປັນຈິດໜຶ່ງໃຈດຽວກັນ, ເອົາໃຈໃສ່ຕໍ່ວຽງານ 3 ສ້າງຄື: ສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ໃຫ້ສໍາເລັດດ້ວຍໝາກຜົນອັນຈົບງາມ ໂດຍການ
ຫັນພະນັກງານທີ່ມີລະດັບຄວາມຮູ້-ຄວາມສາມາດ, ມີປະສົບການ ລົງກໍ່ສ້າງຮາກຖານຊ່ວຍປະຊາຊົນ, ເຮັດໃຫ້ປະຊາຊົນເຂົ້າໃຈຕໍ່ການປ່ຽນແປງໃໝ່ຂອງພັກ-ລັດຢ່າງແທ້ຈິງ, ຈາກນັ້ນທ່ານ ອາຊາງ ລາວລີພ້ອມດ້ວຍຄະນະກໍ່ໄດ້ຢ້ຽມຢາມໂຮງງານປຸງແຕ່ງໄມ້ຄົບວົງຈອນ ແລະ ຢ້ຽມຢາມໂຄງການກໍ່ສ້າງເຂື່ອນໄຟຟ້າພະລັງງານນໍ້າ-ນໍ້າຂອງຕື່ມອີກ.




ທີ່ມາ: ຂ່າວແຂວງ ໄຊຍະບູລີ(ມີເດຍລາວ)


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.