Header Ads

ແຂວງເຊກອງ ສ້າງສີມືແຮງງານໄດ້ 800 ກວ່າຄົນ





ແຂວງເຊກອງ ກໍຄືພະແນກແຮງງານ ແລະສະຫວັດດີການສັງຄົມ ໄດ້ຖືສຳຄັນການສ້າງແຮງງານໃຫ້ມີສີມື ເພື່ອສະໜອງຄວາມຮຽກຮ້ອງຕ້ອງການຂອງຕະຫຼາດທີ່ນັບມື້ນັບເພີ່ມຂຶ້ນ ແລະມີການພັດທະນາຫຼາຍຂື້ນ ໂດຍສະເພາະບັນດາໂຄງ ການລົງທຶນ ຊຶ່ງໃນປີ 2017 ຜ່ານມາ ສາມາດສ້າງໄດ້ 800 ກວ່າຄົນຫຼາຍສຸດແມ່ນຂະແໜງກະສິກຳ. 



ທ່ານ ສຸວັນຄຳ ຄຳຄູນເມືອງ ຫົວໜ້າພະແນກແຮງງານ ແລະສະຫວັດດີການສັງຄົມແຂວງເຊກອງໃຫ້ຮູ້ວ່າ: ໃນໄລຍະໜຶ່ງປີຜ່ານມາ ພະແນກ ຮສສ ແຂວງໄດ້ເອົາໃຈໃສ່ປະສານສົມທົບກັບພາກສ່ວນກ່ຽວຂ້ອງຝຶກອົບຮົມວິຊາຊີບ ແລະພັດທະນາສີມືແຮງງານຢູ່ຕາມສະຖາບັນການຝຶກຕ່າງໆໄດ້ທັງໝົດ 824 ຄົນ, ຍິງ 414 ຄົນ, ລື່ນແຜນ 4,08% ໂດຍນອນໃນ 3 ຂະແໜງການຄື: ຂະແໜງກະສິກຳ-ປ່າໄມ້, ຂະແໜງອຸດສາຫະກຳ ແລະ ຂະແໜງການບໍລິການ.

ພ້ອມດຽວກັນນັ້ນ ຍັງໄດ້ຈັດຫາວຽກເຮັດງານທຳໃຫ້ແກ່ແຮງງານລາວທັງພາຍໃນ ແລະຕ່າງປະເທດ, ຂຶ້ນທະ ບຽນອອກບັດ-ຕໍ່ບັດອະນຸຍາດໃຫ້ແຮງງານຕ່າງປະເທດໄດ້ 51 ຫົວໜ່ວຍ, ຊຸກຍູ້ຫົວໜ່ວຍແຮງງານປະຕິບັດກົດໝາຍແຮງງານ, ກວດຜ່ານ ແລະອະນຸຍາດນຳໃຊ້ກົດລະບຽບພາຍໃນ 57 ຫົວໜ່ວຍ, ຂຶ້ນທະບຽນຄຸ້ມຄອງຊົ່ວຄາວໃຫ້ແຮງງານຕ່າງປະເທດໄດ້ 22 ຫົວໜ່ວຍ, ມີແຮງງານ 273 ຄົນ, ຍິງ 32 ຄົນ.
ແນວໃດກໍຕາມ ເພື່ອສືບຕໍ່ປະຕິບັດແຜນພັດທະນາເສດຖະກິດ-ສັງຄົມ 5 ປີຄັ້ງທີ 8 ຂອງແຂວງໃຫ້ບັນລຸເປົ້າໝາຍທີ່ວາງໄວ້. ທ່ານ ສຸວັນຄຳ ຄຳຄູນເມືອງ ກ່າວວ່າ: ພະແນກ ຮສສ ແຂວງຈະປະສານສົມທົບ ແລະຮ່ວມມືກັບພາກສ່ວນກ່ຽວຂ້ອງສືບຕໍ່ກໍສ້າງກຳລັງແຮງງານລາວໃຫ້ມີຄວາມຮູ້ຄວາມສາມາດ, ສືບຕໍ່ຝຶກ ແລະພັດທະນາສີມືແຮງງານໃຫ້ໄປຕາມໂຄງປະກອບເສດຖະກິດດ້ານຕ່າງໆ ໂດຍຕັ້ງເປົ້າຮອດປີ 2020 ໃຫ້ໄດ້ 50 ພັນກວ່າຄົນ, ໃນນັ້ນຂະແໜງກະສິກຳ 32 ພັນກວ່າຄົນ, ຂະແໜງອຸດສາຫະກໍາ 8,5 ພັນຄົນ ແລະຂະແໜງການບໍລິການ 9 ພັນຄົນ.
ພ້ອມທັງຈັດຫາວຽກເຮັດງານທຳໃຫ້ແຮງງານທີ່ເພີ່ມຂຶ້ນໃໝ່ໃຫ້ໄດ້ 1.967 ຄົນ, ຂຶ້ນທະບຽນຜູ້ອອກແຮງງານໃຫ້ໄດ້ 100% ຂອງຜູ້ອອກແຮງງານໃນກຸ່ມເປົ້າໝາຍ ແລະຂະຫຍາຍເຂດປົກຄຸມປະກັນສັງຄົມ-ປະກັນສຸຂະພາບຮ່ວມກັບຂະແໜງການກ່ຽວຂ້ອງໃຫ້ກວມເອົາ 80%.


 ຂ່າວ : ສັນຍາ/ຂ່າວແຂວງເຊກອງ , ພາບປະກອບ : ອິນເຕີເນັດ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.