Header Ads

ພິທີມອບ-ຮັບຫົວໜ້າກອງບັນຊາການ ປກສ ແຂວງບໍ່ແກ້ວຊຸດໃໝ່



ເພື່ອປັບປຸງລະບົບກົງຈັກການຈັດຕັ້ງຂອງກອງບັນຊາການ ປກສ ແຂວງບໍ່ແກ້ວ ໃຫ້ໜັກແໜ້ນ-ເຂັ້ມແຂງທາງດ້ານການເມືອງ-ແນວຄິດ, ດ້ານການຈັດຕັ້ງ ແລະ ສາມາດຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່. ດັ່ງນັ້ນ, ໃນຄັ້ງວັນທີ 09 ມັງກອນ 2018 ນີ້ ກອງບັນຊາການ ປກສ ແຂວງບໍ່ແກ້ວ ໄດ້ຈັດພິທີມອບ-ຮັບຫົວໜ້າກອງບັນຊາການ ປກສ ແຂວງ ຜູ້ໃໝ່ຂື້ນ ຢູ່ທີ່ຫ້ອງປະຊຸມກອງບັນຊາການ ປກສ ແຂວງບໍ່ແກ້ວ. ໂດຍການເປັນປະທານຂອງທ່ານ ປອ ຄໍາພັນ ເຜີຍຍະວົງ ເລຂາພັກແຂວງ ເຈົ້າແຂວງໆບໍ່ແກ້ວ, ເຂົ້າຮ່ວມມີຄະນະພັກ-ຄະນະບັນຊາກອງບັນຊາການ ປກສ ແຂວງ, 5 ເມືອງ-01 ເຂດ, ພະນັກງານນັກຮົບ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.




ໃນພິທີ, ທ່ານ ພັອ ລໍາໄພ ຍົດປະໄພ ຫົວໜ້າກອງບັນຊາການ ປກສ ແຂວງບໍ່ແກ້ວຜູ້ເກົ່າ ກໍ່ໄດ້ຂື້ນຜ່ານບົດສະຫຼຸບຕີລາຄາການຊີ້ນໍາ-ນໍາພາວຽກງານປ້ອງກັນຄວາມສະຫງົບໃນແຕ່ລະດ້ານແຕ່ປີ 2014-ປັດຈຸບັນ. ຜ່ານມາເຫັນວ່າແຂວງບໍ່ແກ້ວມີຄວາມສະຫງົບ, ມີສະຖຽນລະພາບທາງດ້ານການເມືອງໂດຍພື້ນຖານ, ໄດ້ເອົາໃຈໃສ່ຊີ້ນໍາເລົ່າລົບວິຊາສະເພາະແກ້ໄຂບັນຫາປະກົດການຫຍໍ້ທໍ້ໃນສັງຄົມໃຫ້ຫຼຸດໜ້ອຍຖອຍລົງ. ຜ່ານມາສາມາດມ້າງລາຍຄະດີໄດ້ທັງໝົດ 597 ເລື່ອງ. ໃນນັ້ນ, ມີຄະດີຢາເສບຕິດ 331 ເລື່ອງ ກັກຕົວຜູ້ຖືກຫາໄດ້ 604 ຄົນ, ຍິງ 66 ຄົນ ຂອງກາງຍຶດໄດ້ ເຮໂຣອິນ 109 ແທ່ງ, ຢາບ້າ 1.815.955 ເມັດ, ລົດໃຫຍ່ 13 ຄັນ, ລົດຈັກ 164 ຄັນ, ແປ້ງຝຸ່ນສີຂາວ 20 ເປົາ ແລະ ລາຍຄະດີອື່ນໆອີກ. ຈາກນັ້ນກໍ່ໄດ້ລາຍງານວຽກງານດ້ານຕ່າງໆເພີ່ມເຕີມອີກ ໂດຍສະເພາະແມ່ນດ້ານດີ-ດ້ານອ່ອນ ແລະ ບັນຫາທີ່ຈະຕ້ອງສືບຕໍ່ແກ້ໄຂໃນຕໍ່ໜ້າ.






ໃນພິທີ, ກໍ່ໄດ້ເຊັນບົດບັນທຶກມອບ-ຮັບ ຂອງລັດທະມົນຕີກະຊວງປ້ອງກັນຄວາມສະຫງົບ ວ່າດ້ວຍການໂຍກຍ້າຍນາຍຕໍາຫຼວດທີ່ຂື້ນກັບກອງບັນຊາການ ປກສ ແຂວງບໍ່ແກ້ວ ສະບັບເລກທີ 2070, 2067/ປກສ ແລະ ແຕ່ງຕັ້ງນາຍຕໍາຫຼວດທີ່ຂື້ນກັບກອງບັນຊາການ ປກສ ແຂວງບໍ່ແກ້ວ ສະບັບເລກທີ 2069/ປກສ, ລົງວັນທີ 13 ພະຈິກ 2017 ຢ່າງເປັນທາງການ.





ທ້າຍພິທີ, ທ່ານ ປອ ຄໍາພັນ ເຜີຍຍະວົງ ກໍ່ໄດ້ໃຫ້ກຽດໂອ້ລົມຕໍ່ພິທີ. ກ່ອນອື່ນ, ທ່ານກໍ່ໄດ້ຍ້ອງຍໍຊົມເຊີຍຕໍ່ຜົນງານຂອງຄະນະພັກກອງບັນຊາການຊຸດເກົ່າທີ່ໄດ້ປະຕິບັດໜ້າທີ່ສ້າງໄດ້ຜົນງານໃນໄລຍະທີ່ຜ່ານມາ ແລະ ທ່ານກໍ່ຍັງໄດ້ສະເໜີບາງບັນຫາເຊັ່ນ: ພາຍຫຼັງທີ່ມອບ-ຮັບໜ້າທີ່ແລ້ວໃຫ້ຄະນະພັກຜູ້ເກົ່າ ແລະ ໃໝ່ສືບຕໍ່ພົວພັນວຽກງານນໍາກັນຕື່ມ, ສືບຕໍ່ປັບປຸງກົງຈັກການຈັດຕັ້ງໃຫ້ເຂົ້າສູ່ລະບົບລະບຽບສອດຄ່ອງກັບສະພາບຕົວຈິງ, ສືບຕໍ່ສຶກສາ-ອົບຮົມວຽກງານການເມືອງ-ນໍາພາແນວຄິດຢ່າງເປັນປົກກະຕິ, ສືບຕໍ່ປະຕິບັດຫັນກໍາລັງປ້ອງກັນຄວາມສະຫງົບລົງຮາກຖານໃກ້ຊິດຕິດແທດກັບປະຊາຊົນ, ເພີ່ມທະວີຄວາມສາມັກຄີ-ເອກະພາບພາຍໃນໃຫ້ມີຄວາມໜັກແໜ້ນເຂັ້ມແຂງ, ປັບປຸງແບບແຜນວິທີເຮັດວຽກ, ເອົາໃຈໃສ່ວຽກງານຕິດຕາມກວດກາລະອຽດ ແລະ ຊີ້ນໍາ-ນໍາພາກໍາລັງປ້ອງກັນຄວາມສະຫງົບແຂວງບໍ່ແກ້ວໃຫ້ປະສົບຜົນສໍາເລັດໜັກແໜ້ນຂື້ນໄປເລື້ອຍໆ.





ຂ່າວ: ຮຕ ນາຊູ ອິນທະບັນດິດ

-----------------------



------------------------------

ສະບາຍດີປີທ່ອງທ່ຽວລາວ 2018
Sabaidee Visit Laos Year 2018 

"ຢູ່ເຂດບ້ານເມືອງຂອງທ່ານ ມີສະຖານທີ່ໜ້າສົນໃຈຫຍັງແດ່ ຢາກໃຫ້ໂທລະໂຄ່ງ ຊ່ວຍປະຊາສຳພັນໃຫ້ ສົ່ງຂໍ້ມູນມາເລີຍ ທີ່ ອີເມວ tholakhong@gmail.com | LINE ID: @tholakhong ຫຼື ອິນບ໋ອກ ມາກໍ່ໄດ້.


ມາພ້ອມກັນເປັນເຈົ້າພາບທີ່ດີ ແບບຄົນລາວຂອງແທ້! ຕ້ອນຮັບແຂກທັງພາຍໃນແລະຕ່າງປະເທດ ດ້ວຍຮອຍຍິ້ມ, ຄວາມຈິງໃຈ ແລະ ມິດຕະພາບ ຕະຫຼອດປີທ່ອງທ່ຽວລາວ 2018 ແລະ ຕະຫຼອດໄປ

ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ ແລະ ຂໍຮ່ວມເປັນສ່ວນໜື່ງ ຕ້ອນຮັບປີທ່ອງທ່ຽວລາວ 2018 ຢ່າງຟົດຟື້ນ!





------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com







No comments

Powered by Blogger.