Header Ads

ງານເທດສະການດອກງິ້ວບານ ແລະ ສະເຫຼີມສະຫຼອງປີທ່ອງ ທ່ຽວລາວ 2018 ທີ່ແຂວງບໍ່ແກ້ວ



ແຂວງບໍ່ແກ້ວ :  ງານເທດສະການດອກງິ້ວບານ ເຊິ່ງເປັນກິດຈະກຳຫຼັກຂອງແຂວງບໍ່ແກ້ວ, ເພື່ອສະເຫຼີມສະຫຼອງປີທ່ອງ ທ່ຽວລາວ 2018 ໄຂຂຶ້ນຢ່າງເປັນທາງການໃນຕອນແລງ ວັນທີ 27 ມັງກອນ2018 ທີ່ດອນຊາວ ເຂດເສດຖະ ກິດພິເສດສາມລ່ຽມຄຳ ເມືອງຕົ້ນເຜິ້ງ ແຂວງບໍ່ແກ້ວ ໂດຍການໃຫ້ກຽດເຂົ້າຮ່ວມຂອງ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ພ້ອມດ້ວຍຮອງນາຍົກລັດຖະມົນຕີ ລັດຖະມົນຕີກະຊວງການເງີນ, ທີ່ປຶກສາຄະນະບໍລິ ຫານງານສູນກາງພັກ, ມີເຈົ້າແຂວງ, ຮອງເຈົ້າແຂວງ ແຂກຮັບເຊີນທັງພາຍໃນ ແລະ ຕ່າງປະເທດ ຕະຫຼອດຮອດ ປະຊາຊົນບັນດາເຜົ່າຊາວແຂວງບໍ່ແກ້ວ. 



ໃນພິທີ ທ່ານ ຈອມສີ ລັດຕະນະປັນ ຮອງເຈົ້າແຂວງໆ ບໍ່ແກ້ວ. ປະທານຄະນະຮັບຜິດຊອບຈັດງານເທດ ສະການດອກງິ້ວບານ ຄັ້ງທີ 18 ໄດ້ຂຶ້ນລາຍງານສະພາບໂດຍຫຍໍ້ກ່ຽວກັບການກະກຽມວຽກງານດ້ານຕ່າງໆຂອງ ເທດສະການດອກງິ້ວບານ, ເພື່ອສະເຫຼີມສະຫຼອງ ເປີດປີທ່ອງທ່ຽວລາວ 2018 ແລະ ສະເຫຼີມສະຫຼອງ ການສ້າງຕັ້ງເຂດເສດຖະກິດພິເສດສາມ ລ່ຽມຄຳ ຄົບຮອບ 10 ປີ ທ່ານໄດ້ຍົກໃຫ້ເຫັນວ່າ ເທດສະການດອກ ງິ້ວບານຄັ້ງທີ 18 ເປັນເຫດການທີມີຄວາມໝາຍຄວາມສຳຄັນຍີ່ງຂອງແຂວງ ກາຍເປັນບາງບຸນປະເພນີ ທີ່ເປັນ ເອກະລັກຂອງຊາວແຂວງບໍ່ແກ້ວ. ໃນຊຸມປີຜ່ານມາ ພັກ ແລະ ລັດຖະບານ ກໍ່ຄືຄະນະພັກຄະນະນຳຂອງແຂວງ ໄດ້ ຖືເອົາການທ່ອງທ່ຽວເປັນບູລິມະສິດໜຶ່ງ ເພື່ອຊຸກຍູ້ການພັດທະນາເສດຖະກິດສັງຄົມຂອງແຂວງ. ເປັນຂະແໜງ ການໜຶ່ງທີ່ເຮັດໃຫ້ເກີດການສະສົມ ແລະ ໝູນວຽນເງິນຕາພາຍໃນແຂວງເປັນຢ່າງດີີ. ສ້າງວຽກເຮັດງານທຳໃຫ້ປະ ຊາຊົນ ໃນຂົງເຂດບໍລິການ ແລະ ການກະຈາຍລາຍໄດ້ໄປສູ່ຄອບຄົວປະຊາຊົນເຂດຊົນນະບົດຫ່າງໄກສອກຫຼີກ. ຈາກນັ້ນ ທ່ານ ຄຳພັນ ເຜີຍຍະວົງ ເຈົ້າແຂວງໆບໍ່ແກ້ວ ໄດ້ຂຶ້ນກ່າວໄຂພິທີຢ່າງເປັນທາງການ. ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງີນ. ທ່ານ ສົມສະຫວາດ ເລັ່ງສະຫວັດ ທີ່ປຶກສາຄະນະ ບໍລິຫານງານສູນກາງພັກ. ທ່ານ ຄຳພັນ ເຜີຍຍະວົງ ເຈົ້າແຂວງໆບໍ່ແກ້ວ, ທ່ານ ອຸ່ນທວງ ຂາວພັນ ຮອງລັດຖະມົນ ຕີກະຊວງຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວ. ທ່ານ ຈ້າວເຫວີຍ ປະທານ ສະພາບໍລິຫານເຂດເສດ ຖະກິດພິເສດສາມລ່ຽມຄຳ ໄດ້ຮ່ວມກັນຕັດແຖບຜ້າ ແລະ ລັ່ນຄອງເກົ້າບາດ ເພື່ອເປີດພິ ທີຢ່າງເປັນທາງການ. 


ງານເທດສະການດອກງິ້ວບານ ຄັ້ງທີ18 ໄດ້ຈັດຫຼາຍກິດຈະກຳ ເປັນຕົ້ນ ການສະແດງສິລະປະວັນນະຄະ ດີ, ປະກວດນາງສາວດອກງິ້ວບານປະຈຳປີ 2018 ຈັດງານຕະຫຼາດນັດວາງສະແດງສິນຄ້າ. ຜະລິດຕະພັນ ໂອດອັບ, ສິນຄ້າກະສິກຳ, ຫັດຖະກໍາ, ວາງສະແດງຜະລິດຕະພັນການທ່ອງທ່ຽວຂອງພາຍໃນ ແລະ ຕ່າງປະເທດ ລວມທັງ ໝົດ 300 ກ່ວາຮ້ານ, ແຂ່ງຂັນກິລາຕີມວຍ 4 ປະເທດ ລາວ, ຈີນ, ໄທ, ມຽນມາ ແລະ ກິດຈະກຳອື່ນໆ ຊື່ງ ງານເທດສະການດອກງິ້ວບານຄັ້ງນີ້ໄດ້ດຳເນີນຮອດວັນທີ 29 ມັງກອນ 2018 ຈຶ່ງສຳເລັດລົງ.


ພາບ ແລະ ຂ່າວ:  ວສລ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.