Header Ads

ຊົມເຊີຍ ຂ່າວສານປະເທດລາວ ຄົບຮອບ 50 ປີ! ຢ່າງສຸດໃຈ!


ສຳນັກຂ່າວສານປະເທດລາວ ໄດ້ຮັບການສ້າງຕັ້ງຂຶ້ນໃນວັນທີ 6 ມັງກອນ 1968 ຢູ່ທີ່ເຂດທີ່ໝັ້ນການປະຕິວັດ ເມືອງວຽງໄຊ ແຂວງຫົວພັນ ເຊິ່ງມາຮອດ ປີ 2018 ນີ້ ກໍ່ພໍດີຄົບຮອບ 50 ປີ. ພາຍໃຕ້ການຊີ້ນຳ ນຳພາຂອງພັກ ແລະ ລັດຖະບານ, ຕະຫລອດໄລຍະ 50 ປີຜ່ານມາ ໂດຍປະຕິບັດໜ້າທີ່ການເມືອງອັນມີກຽດສະຫງ່າຂອງຕົນນັ້ນ, ສຳນັກຂ່າວສານປະເທດລາວ ໄດ້ສຸມທຸກກຳລັງແຮງ ເພື່ອພ້ອມກັນຜ່ານຜ່າທຸກອຸປະສັກ, ຄວາມຫຍຸ້ງຍາກ ແລະ ສິ່ງທ້າທາຍຕ່າງໆ ຢ່າງບໍ່ທໍ້ຖອຍ ບໍ່ວ່າແຕ່ໃນໄລຍະການປະຕິບັດພາລະກິດຕໍ່ສູ້ປົດປ່ອຍຊາດ ກໍ່ຄື ປົກປັກຮັກສາ ແລະ ພັດທະນາປະເທດ ຈົນເຖິງປັດຈຸບັນ, ອັນໄດ້ເຮັດໃຫ້ກຳລັງແຮງຂອງສຳນັກຂ່າວສານປະເທດລາວ ມີການພັດທະນາ ແລະ ເຕີບໃຫຍ່ຂະຫຍາຍຕົວເລື້ອຍມາ.

ເມື່ອຫວນຄືນກ່ອນນີ້ກວ່າເຄິ່ງສະຕະວັດ, ພາຍຫລັງໜັງສືພິມ “ລາວອິດສະລະ” ໄດ້ກຳເນີດ ແລະ ສ້າງຕັ້ງຂຶ້ນໃນວັນທີ 13 ສິງຫາ 1950 ເຊິ່ງເປັນຈຸດເລີ່ມຕົ້ນແຫ່ງການຂະຫຍາຍຕົວຢ່າງຕໍ່ເນື່ອງຂອງບັນດາອົງການສື່ມວນຊົນລາວເຮົາໃນເວລານັ້ນ, ເພື່ອເຮັດໜ້າທີ່ເຜີຍແຜ່ແນວທາງນະໂຍບາຍຂອງພັກ ແລະ ການປະຕິວັດລາວ ເພື່ອຕໍ່ຕ້ານກັບສັດຕູ ແລະ ຈັກກະພັດຜູ້ຮຸກຮານ, ປະກອບສ່ວນປຸກລະດົມຂະບວນການປະຊາຊົນເຂົ້າຮ່ວມການປະຕິວັດ, ເຮັດໃຫ້ກຳລັງປະຕິວັດເຕີບໃຫຍ່ຂະຫຍາຍຕົວຢ່າງວ່ອງໄວຢູ່ພາຍໃຕ້ການນຳພາຂອງພັກ ແລະ ມາຮອດວັນທີ 6 ມັງກອນ 1956, ກອງປະຊຸມໃຫຍ່ຜູ້ແທນປະຊາຊົນທົ່ວປະເທດຂອງແນວລາວອິດສະລະ ໄດ້ໄຂຂຶ້ນທີ່ແຂວງຫົວພັນ ແລະ ໄດ້ຕົກລົງປ່ຽນຊື່ໜັງສືພິມ “ລາວອິດສະລະ” ມາເປັນໜັງສືພິມ “ແນວລາວຮັກຊາດ” ເພື່ອແທດເໝາະກັບການເຮັດໜ້າທີ່ໂຄສະນາເປີດກວ້າງ ແລະ ຂະຫຍາຍແນວໂຮມປຸກລະດົມປະຊາຊົນຢ່າງແຂງແຮງ ເຂົ້າໃນຂະບວນການປະຕິວັດ. ໃນລະຫວ່າງປີ 1963-1968 ຈັກກະພັດລ່າເມືອງຂຶ້ນແບບໃໝ່ ໄດ້ເພີ່ມທະວີສົງຄາມຮຸກຮານຕ້ານບັນດາປະຊາຊາດໃນແຫລມອິນດູຈີນຢ່າງປ່າເຖື່ອນທີ່ສຸດ, ດ້ວຍຄຳຂວັນ 3 ກ້ຽງຄື: “ທຳລາຍກ້ຽງ, ດັບສູນກ້ຽງ ແລະ ເຜົາຜານກ້ຽງ”.



ຕໍ່ສະພາບຮ້າຍແຮງດັ່ງກ່າວ, ສູນກາງແນວລາວສ້າງຊາດໃນເວລານັ້ນ ຈຶ່ງເຫັນວ່າ, ການໂຄສະນາເຜີຍແບໂສມໜ້າອັນໂຫດຮ້າຍປ່າເຖື່ອນຂອງພວກຈັກກະພັດໃຫ້ຊາວໂລກໄດ້ຮັບຮູ້, ພ້ອມເປັນການປຸກລະດົມນ້ຳໃຈຮັກຊາດ, ພິລະອາດຫານຂອງກອງທັບ ແລະ ປະຊາຊົນລາວເຮົາ ປະກອບສ່ວນເຂົ້າໃນຂະບວນການປະຕິວັດ ແມ່ນຄວາມຮຽກຮ້ອງຕ້ອງການ ແລະ ຈຳເປັນພາວະວິໄສ ຂອງການຕໍ່ສູ້ປົດປ່ອຍຊາດ; ສະນັ້ນ, ຈຶ່ງໄດ້ຕົກລົງສ້າງຕັ້ງ “ສຳນັກຂ່າວສານປະເທດລາວ” ຂຶ້ນໃນວັນທີ 6 ມັງກອນ 1968 ຢູ່ທີ່ເຂດປົດປ່ອຍແຂວງຫົວພັນ ເພື່ຶອເຮັດໜ້າທີ່ແຈ້ງຂ່າວ, ສະໜອງຂໍ້ມູນຂ່າວສານຕໍ່ພາຍໃນ ແລະ ຕ່າງປະເທດໄດ້ຢ່າງວ່ອງໄວ ແລະ ທັນການ.



ພາຍຫລັງໄດ້ຮັບສ້າງຕັ້ງຂຶ້ນຢ່າງເປັນທາງການ, ສຳນັກຂ່າວສານປະເທດລາວ ກໍ່ໄດ້ປະຕິບັດໜ້າທີ່ການເມືອງຂອງຕົນຢ່າງເປັນເຈົ້າການ ແລະ ໄດ້ມີຜົນສຳເລັດເປັນຢ່າງດີ, ເຖິງວ່າ ການປະຕິບັດໜ້າທີ່ວຽກງານມີຫຍຸ້ງຍາກກັນດານທີ່ສຸດ ເພາະແມ່ນຍາມສົງຄາມທຳລາຍ, ປ່າດົງພົງໄພ ຮ່ອມຫ້ວຍຜາຊັນ, ທຸກບ່ອນແມ່ນສະໜາມຮົບ. ແຕ່ນັກຂ່າວທຸກຄົນລ້ວນແຕ່ມີຄວາມເດັດດ່ຽວໜຽວແໜ້ນ ແລະ ເສຍສະລະທຸກສິ່ງທຸກຢ່າງ ທັງເຮັດວຽກທັງໄປລຳລຽງຂົນສົ່ງ, ທັງຈັບປືນເວນຍາມ ທັງເວັນ ແລະ ຄືນ.


ເວົ້າລວມແລ້ວ, ໄລຍະແຫ່ງການຕໍ່ສູ້ປົດປ່ອຍຊາດ, ນັກຂ່າວຂອງສຳນັກຂ່າວສານປະເທດລາວ ກໍ່ຄືນັກຂ່າວສື່ມວນຊົນປະຕິວັດເວລານັ້ນ ໄດ້ອຸທິດຊີວິດຂອງຕົນເພື່ອຮັບໃຊ້ພາລະກິດປະຕິວັດ ຢ່າງບໍ່ຮູ້ອິດເມື່ອຍ ແລະ ມີຜົນສຳເລັດ; ປະກອບສ່ວນເຂົ້າໄຊຊະນະອັນຍິ່ງໃຫຍ່ຂອງການປະຕິວັດເຮົາ. ພາຍຫລັງປະເທດຊາດໄດ້ຮັບການປົດປ່ອຍຢ່າງສົມບູນ ແລະ ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975;




ສຳນັກຂ່າວສານປະເທດລາວ ກໍ່ໄດ້ສືບຕໍ່ປະຕິບັດໜ້າທີ່ການເມືອງຂອງຕົນ ໃນການໂຄສະນາເຜີຍແຜ່ແນວທາງ-ນະໂຍບາຍຂອງພັກ-ລັດ, ປຸກລະດົມນ້ຳໃຈຮັກຊາດຂອງປະຊາຊົນລາວບັນດາເຜົ່າ ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຢ່າງເປັນຂະບວນຟົດຟື້ນໃນທົ່ວປະເທດ. ພ້ອມດຽວກັນ ສຳນັກຂ່າວສານປະເທດລາວ ກໍ່ໄດ້ສືບຕໍ່ປັບປຸງພັດທະນາຕົນເອງ ໃຫ້ເຕີບໃຫຍ່ຂະຫຍາຍຕົວ ທັງປະລິມານ ແລະ ຄຸນນະພາບ, ນັບທັງພື້ນຖານວັດຖຸເຕັກນິກ ແລະ ວິຊາການ ເພື່ອຕອບສະໜອງກັບຄວາມຮຽກຮ້ອງຕ້ອງການໃນແຕ່ລະໄລຍະ ແລະ ມີຜົນສຳເລັດໃໝ່ ຍິ່ງໃຫຍ່ກວ່າເກົ່າ.

ມູນເຊື້ອຜົນງານ ແລະ ກຽດຊື່ສຽງຂອງສຳນັກຂ່າວສານປະເທດລາວ ເຫລົ່ານັ້ນ ພວກເຮົາລຸ້ນສືບທອດ ຕ້ອງພ້ອມກັນປົກປັກຮັກສາ ແລະ ເສີມຂະຫຍາຍ ໃຫ້ແຕກດອກອອກຜົນງອກງາມຕະຫລອດໄປ.

------------------------------

ສະບາຍດີປີທ່ອງທ່ຽວລາວ 2018
Sabaidee Visit Laos Year 2018 

"ຢູ່ເຂດບ້ານເມືອງຂອງທ່ານ ມີສະຖານທີ່ໜ້າສົນໃຈຫຍັງແດ່ ຢາກໃຫ້ໂທລະໂຄ່ງ ຊ່ວຍປະຊາສຳພັນໃຫ້ ສົ່ງຂໍ້ມູນມາເລີຍ ທີ່ ອີເມວ tholakhong@gmail.com | LINE ID: @tholakhong ຫຼື ອິນບ໋ອກ ມາກໍ່ໄດ້.


ມາພ້ອມກັນເປັນເຈົ້າພາບທີ່ດີ ແບບຄົນລາວຂອງແທ້! ຕ້ອນຮັບແຂກທັງພາຍໃນແລະຕ່າງປະເທດ ດ້ວຍຮອຍຍິ້ມ, ຄວາມຈິງໃຈ ແລະ ມິດຕະພາບ ຕະຫຼອດປີທ່ອງທ່ຽວລາວ 2018 ແລະ ຕະຫຼອດໄປ

ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ ແລະ ຂໍຮ່ວມເປັນສ່ວນໜື່ງ ຕ້ອນຮັບປີທ່ອງທ່ຽວລາວ 2018 ຢ່າງຟົດຟື້ນ!





------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com








No comments

Powered by Blogger.