Header Ads

8 ແຂວງພາກເໜືອຮັບຟັງເຜີຍແຜ່ຄູ່ມືແນະນຳກ່ຽວກັບຕົວເມືອງທີ່ມີ ຄວາມຍືນຍົງດ້ານສິ່ງແວດລ້ອມຂອງ ສປປ ລາວ




ໃນລະຫວ່າງ ວັນທີ 23-25 ມັງກອນ 2018 ນີ້, ກົມຄວບຄຸມມົນລະພິດ ກະຊວງຊັບພະຍາ ກອນທຳມະຊາດ ແລະ ສິ່ງແວດລ້ອມ ໄດ້ຈັດກອງປະຊຸມເພື່ອເຜີຍແຜ່ຄູ່ມືແນະນຳກ່ຽວກັບຕົວເມືອງທີ່ມີຄວາມຍືນຍົງດ້ານສິ່ງແວດ ລ້ອມຂອງລາວ ແລະ ສ້າງວິໄສທັດຕົວເມືອງທີ່ມີຄວາມຍືນຍົງດ້ານສິ່ງແວດ ລ້ອມຂຶ້ນ, ທີ່ຫ້ອງປະຊຸມຂອງຫ້ອງວ່າການປົກຄອງເມືອງຫຼວງພະບາງຫຼັງໃໝ່, ໂດຍການເປັນປະທານຮ່ວມຂອງ ທ່ານ ສົມດີ ພອນສະຫວັດ ຮອງເຈົ້າເມືອງຫຼວງພະບາງ, ປະທານບໍລິຫານ ແລະ ພັດທະນາຕົວເມືອງຫຼວງພະບາງ, ທ່ານ ຄຳຈັນ ໂຄດໄຊ ຮອງຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ແຂວງຫຼວງພະບາງ,ມີບັນດາ ຫົວໜ້າ-ຮອງຫົວໜ້າພະແນກການທີ່ກ່ຽວຂ້ອງພ້ອມດ້ວຍວິຊາການ 8 ແຂວງພາກເໜືອເຂົ້າ ຮ່ວມ.



ທ່ານ ສົມດີ ພອນສະຫວັດ ໃນນາມປະທານກອງປະຊຸມກ່າວວ່າ: ຈຸດປະ ສົງຫຼັກໃນການເຜີຍ ແຜ່ຄູ່ມືແນະນຳຕົວເມືອງທີ່ມີຄວາມຍືນຍົງດ້ານສິ່ງ ແວດລ້ອມ ແລະ ການສ້າງວິໄສທັດ ຕົວເມືອງທີ່ມີຄວາມຍືນຍົງ ດ້ານສິ່ງ ແວດລ້ອມ ແມ່ນເພື່ອສ້າງລະບົບການຈັດຕັ້ງສໍາລັບການຄຸ້ມຄອງສິ່ງແວດ ລ້ອມຕົວເມືອງ ແລະ ການວິເຄາະໄຈ້ແຍກບັນຫາສິ່ງແວດລ້ອມຕົວເມືອງເພື່ອສ້າງວິໄສທັດຕົວເມືອງທີ່ມີຄວາມຍືນຍົງດ້ານສິ່ງແວດລ້ອມ ເຊິ່ງເປັນແນວທາງນະໂຍບາຍ ແລະ ບົດຮຽນ ໃຫ້ແຂວງຂອງຕົນ ເພື່ອນຳໄປຜັນຂະ ຫຍາຍໃຫ້ເປັນແຜນການ, ແຜນງານ ແລະ ໂຄງການ ສຳລັບການຄຸ້ມ ຄອງສິ່ງແວດ ລ້ອມຕົວເມືອງ ເປັນຕົ້ນ: ການຄຸ້ມຄອງສິ່ງເສດເຫຼືອ ແລະ ການຄຸ້ມຄອງນ້ຳເປື້ອນ ຕົວເມືອງ ເພື່ອຫຼຸດຜ່ອນບັນຫາມົນລະພິດ, ສ້າງຄຸນນະ ພາບການດຳລົງຊີວິດ ແລະ ສິ່ງແວດລ້ອມທີ່ດີ. 


ກອງປະຊຸມຄັ້ງນີ້ຜູ້ເຂົ້າຮ່ວມຍັງຈະໄດ້ຮັບຟັງການເຜີຍແຜ່ຄວາມເປັນມາ ແລະ ຄວາມສຳຄັນຂອງຄູ່ມືແນະນຳກ່ຽວກັບຕົວເມືອງທີ່ມີຄວາມຍືນຍົງດ້ານສິ່ງແວດລ້ອມຂອງລາວ, ຮັບຟັງບົດຮຽນທີ່ຖອດຖອນໄດ້ໃນການຈັດ ຕັ້ງປະຕິບັດໂຄງການຕົວແບບຮ່ວມມືສາມຝ່າຍຂອງສາມເມືອງຕົວແບບຄື: ນະ ຄອນຫຼວງວຽງຈັນ, ເມືອງຫຼວງພະບາງ ແລະ ເມືອງໄຊຍະບູລີ, ຮັບຟັງການເຜີຍແຜ່ ແລະ ປຶກສາຫາ ລືກ່ຽວກັບ ສະພາບການຄຸ້ມຄອງ ແລະ ການບຳບັດນ້ຳເປື້ອນໃນຕົວເມືອງ, ນອກນີ້ຍັງຈະໄດ້ຮັບຟັງການເຜີຍແຜ່ເອກະສານອື່ນໆ, ແນ່ໃສ່ສ້າງ ສປປ ລາວ ໃຫ້ໄດ້ດັ່ງຄຳຂວັນທີ່ວ່າ: “ຂຽວ, ສະ ອາດ ແລະ ງາມຕາ” ຊຶ່ງກອງປະຊຸມຄັ້ງນີ້ຈະດຳເນີນໄປຈົນເຖິງວັນທີ 25 ມັງກອນນີ້ຈື່ງຈະສຳເລັດ.


ພາບ ແລະ ຂ່າວ: ຂ່າວສານຫຼວງພະບາງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.