Header Ads

ເມືອງເງິນ ແຂວງໄຊຍະບູລີ ໄດ້ຈັດພິທີປາຖະກະຖາວັນສ້າງຕັ້ງກຳມະບານລາວຄົບຮອບ 62 ປີ



ເມືອງເງິນ ແຂວງໄຊຍະບູລີ ໄດ້ຈັດພິທີປາຖະກະຖາວັນສ້າງຕັ້ງກຳມະບານລາວຄົບຮອບ 62 ປີ ໃນຕອນເຊົ້າຂອງວັນທີ 24 ມັງກອນ 2018 ທີ່ສະໂມສອນຂອງເມືອງ, ມີຄະນະບໍລິຫານງານເມືອງ, ຫົວໜ້າຫ້ອງການ, ກົມກອງ ຕະຫຼອດຮອດສະມາຊິກກຳມະບານກຳມະກອນເຂົ້າຮ່ວມທັງໝົດ 180 ກວ່າຄົນຍິງ 60 ກວ່າຄົນ






ພິທີປາຖະກະຖາໃນຄັ້ງນີ້ ທ່ານ ບຸນຈັນ ແສນສະຫວັດ ຄະນະປະຈຳພັກເມືອງ ປະທານກວດກາພັກລັດເມືອງ ຜູ້ຊີ້ນຳວຽກງານອົງການຈັດຕັ້ງມະຫາຊົນ ໄດ້ໃຫ້ກຽດຂື້ນເລົ່າຄືນມູນເຊື້ອຂອງວັນສ້າງຕັ້ງກຳມະບານລາວຄົບຮອບ 62 ປີ (ວັນທີ 1 ກຸມພາ 1956 - ວັນທີ 1 ກຸມພາ 2018) ເຊິ່ງ ທ່ານໄດ້ຍົກໃຫ້ເຫັນການກຳເນີດ ແລະ ເຕີບໃຫຍ່ຂະຫຍາຍຕົວຂອງອົງການສະຫະພັນກຳມະບານລາວໃນແຕ່ລະໄລຍະ ໂດຍສະເພາະແມ່ນປະຊາຊົນລາວບັນດາເຜົ່າເມື່ອກ່ອນ ໄດ້ຖືກກົດຂີ່ຂູດຮີດແຮງງານຢ່າງໜັກໜ່ວງ, ພວກເຂົາໄດ້ບັງຄັບໃຫ້ກຳມະກອນລາວອອກແຮງງານ 14-16 ຊົ່ວໂມງ/ມື້, ອອກແຮງງານຫຼາຍໃຫ້ຄ່າຕອບແທນໜ້ອຍ, ຖືກຕັດເງິນເດືອນ, ໄລ່ອອກຢ່າງບໍ່ມີເຫດຜົນພຽງພໍ, ຖືກທຸບຕີທໍລະມານແສນສາຫັດຈາກນາຍທຶນ, ມີຄວາມສຽ່ງອັນຕະລາຍຕໍ່ການອອກແຮງງານ, ບໍ່ໄດ້ຮັບການດູແລທາງດ້ານສະຫວັດດີການສັງຄົມ, ບໍ່ໄດ້ຮັບການສຶກສາຮ່ຳຮຽນ ຕໍ່ກັບສະພາບດັ່ງກ່າວ ກຳມະກອນລາວ, ຊາວຜູ້ອອກແຮງງານ ແລະ ປະຊາຊົນບັນດາເຜົ່າໄດ້ພ້ອມກັນລຸກຂຶ້ນຕໍ່ສູ້ຢ່າງອົງອາດກ້າຫານ ໂດຍເລີ່ມຈາກການຕໍ່ສູ້ທີ່ມີລັກສະນະເກີດຂຶ້ນເອງ ກາຍເປັນຂະບວນການອັນກວ້າງຂວາງ ນຳພາໂດຍບັນພະບູລຸດຜູ້ຮັກຊາດ ແຕ່ເໜືອຮອດໃຕ້,ເພື່ອຕໍ່ສູ້ຕ້ານກັບພວກລ່າເມືອງຂຶ້ນຢ່າງດຸເດືອດ ແຕ່ຂະບວນການຕໍ່ສູ້ໃນໄລຍະນັ້ນບໍ່ໄດ້ຮັບໄຊຊະຍ້ອນບໍ່ມີພັກນຳພາ.




ມາເຖິງວັນທີ 1 ກຸມພາ 1956 ກົມການເມືອງສູນກາງພັກ ກໍ່ໄດ້ມີມະຕິຕົກລົງສ້າງຕັ້ງອົງການຈັດຕັ້ງກຳມະບານລາວຂຶ້ນຢ່າງເປັນທາງການຢູ່ເຂດທີ່ໝັ້ນ ແຂວງ ຫົວພັນ ໂດຍແມ່ນ ທ່ານ ສີສົມພອນ ລໍວັນໄຊ ເປັນຜູ້ຊີ້ນຳ. ຈາກນັ້ນອົງການຈັດຕັ້ງກຳມະບານ, ກຳມະກອນລາວໄດ້ກາຍເປັນກຳລັງຫຼວງໄດ້ປະກອບສ່ວນຢ່າງສົມກຽດເຂົ້າໃນການຕໍ່ສູ້ກູ້ຊາດເພື່ອຍາດເອົາເອກກະລາດ ອິດສາລະພາບມາສູ່ປວງຊົນລາວທັງຊາດ,ເຮັດໃຫ້ປະຊາຊົນຄົນລາວ ໄດ້ມີໂອກາດ ສ້າງເສດຖະກິດ,ແກ້ໄຂຊີວິດການເປັນຢູ່ດີຂຶ້ນເປັນກ້າວໆໂດຍຕະຫຼອດມາ.ຕອນທ້າຍຂອງພິທີກໍ່ໄດ້ມອບໃບຢັ້ງຍືນກຳມະບານ 5 ເປັນເຈົ້າຈຳນວນ 31 ຮາກຖານໃນທົ່ວເມືອງ


ໂດຍ: ສຸລິຍາ ແສງເດືອນ


No comments

Powered by Blogger.