Header Ads

ສະມາຊິກສະພາປະຊາຊົນເພດຍິງ ແຂວງຄຳມ່ວນ ສະຫຼຸບຜົນງານປີ 2017




ການ​ເຄື່ອນ​ໄຫວ​ວຽກງານ​ຂອງ​ຄະນະ​ສະມາຊິກ​ສະພາ​ປະຊາຊົນ​ເພດ​ຍິງ​ ​ແຂວງ​ຄຳ​ມ່ວນ ປະຈຳ​ປີ 2017 ​ແມ່ນ​ໄດ້​ຖື​ສຳຄັນ​ຕໍ່ວຽກງານ​ການ​ເມືອງ-​ແນວ​ຄິດ​ໃຫ້​ມີ​ການ​ດຳ​ເນີນ​ຊີວິດ​ການ​ເມືອງ​ຢ່າງ​ເປັນ​ປົກກະຕິ, ປັບປຸງ​ກົງຈັກ​ການຈັດ​ຕັ້ງ ​ແລະ  ​ແບບ​ແຜນ​ວິທີ​ເຮັດ​ວຽກ​ໃຫ້​ສອດຄ່ອງ ​ແລະ ​ເຂົ້າ​ສູ່​ລະບົບ​ຕາມ​ກົດໝາຍ, ລະບຽບການ ​ເຮັດ​ໃຫ້​ມີ​ຄວາມ​ເຊື່ອໝັ້ນຕໍ່ການ​ນຳພາ​ຂອງ​ພັກ-ລັດ, ມີ​ຄວາມ​ກະຕືລື​ລົ້ນ ​ແລະ ມີ​ຄວາມ​ຮັບຜິດຊອບ​ສູງ​ຕໍ່ໜ້າທີ່​ວຽກງານ​ທີ່​ຂັ້ນ​ເທິງມອບໝາຍ. 



ຜ່ານ​ການຈັດ​ຕັ້ງ​ປະຕິບັດ​ວຽກງານ 1 ປີຜ່ານມາ ຄະນະ​ສະ​ມາຊິກສະພາ​ເພດ​ຍິງ​ແຂວງ​ໄດ້​ເຂົ້າ​ຮ່ວມ​ຄົ້ນຄວ້າ​ການ​ປະກອບ​ຄຳ​ຄິດ​ຄຳ​ເຫັນ​ໃສ່​ຮ່າງ​ກົດໝາຍ, ນິຕິ​ກຳຂອງ​ບັນດາ​ພະ​ແນ​ກການ​​ຕ່າງໆ ​ເພື່ອ​ນຳ​ເຂົ້າ​ຄົ້ນຄວ້າ​ພິຈາລະນາ​ເຂົ້າ​ໃນ​ກອງ​ປະຊຸມ​ຂອງ​ສະພາ​ແຫ່ງ​ຊາດ​ ​ແລ​ະ ກອງ​ປະຊຸມ​ຂອງ​ສະພາ​ຂັ້ນ​ແຂວງ ພ້ອມ​ທັງ​ການ​​ເຂົ້າ​ຮ່ວມ​ຮັບຮອງ​ເອົາ​ແຜນ​ພັດທະນາ​ເສດຖະກິດ-ສັງຄົມ, ​ແຜນ​ງົບປະມານ​ແຫ່ງ​ລັດ, ​ໂຄງການ​ກໍ່ສ້າງ​ ​ແລະ ບັນຫາ​ສຳຄັນ​ອື່ນໆຂອງ​ແຂວງ, ຕິດຕາມ, ​ຊຸກຍູ້ ຈັດ​ຕັ້ງ​ປະຕິບັດກົດໝາຍ, ນິຕິ​ກຳ, ລະບຽບການ​ຕ່າງໆ ​ແລະ ​ແຜນ​ຍຸດ​ທະ​ສາດ​ກ່ຽວກັບ​ການ​ສົ່ງ​ເສີມ​ຄວາມ​ສະ​ເໝີພາບ​ຍິງ-ຊາຍ, ການ​ສົ່ງ​ເສີມ​ຄວາມ​ກ້າວໜ້າຂອງ​ແມ່ຍິງ​ ​ແລະ ​ການ​ປົກ​ປ້ອງ​ສິດຜົນປະ​ໂຫຍ​ດອັນ​ຊອບ​ທຳ​ຂອງ​ແມ່ຍິງ ​ແລະ ​ເດັກ​ຂອງ​ບັນດາ​ພະ​ແນ​ກການ ​ແລະ ບັນດາ​ເມືອງ, ​ໄດ້​ນຳ​ເອົາ​ຜົນສຳ​ເລັດ​ຂອງ​ກອງ​ປະຊຸມ​​ສະພາ​ແຫ່ງ​ຊາດ, ສະພາ​ປະຊາຊົນ​ແຂວງ​ລົງ​ໄປ​ເຜີຍ​ແຜ່ ​ເຊິ່ງລວມມີ 159 ຈຸດ​ໃຫຍ່, ມີ​ຜູ້​ເຂົ້າ​ຮ່ວມ​ຮັບ​ຟັງ​ທັງໝົດ 43 ພັນ​ກວ່າ​​ເທື່ອຄົນ ​ໃນ​ນັ້ນ​ມີຍິງ 27 ພັນ​ກວ່າ​ເທື່ອ​ຄົນ ພ້ອມ​ທັງ​ນຳ​ເອົາ​ວັດຖຸ ​ແລະ ​ເຄື່ອງ​ອຸປະ​ໂພ​ກ-ບໍລິ​ໂພ​ກຈຳນວນໜຶ່ງ ລົງ​ມອບ​ໃຫ້​ແກ່​ປະຊາຊົນ​ທີ່​ຖືກ​ຜົນ​ກະທົບ​ຈາກ​ໄພ​ທຳ​ມະ​ຊາດ, ພ້ອມ​ນັ້ນ​ກໍ່​ໄດ້​ຍາດ​ແຍ່ງທຶນຮອນ​ຈາກ​ຕ່າງປະ​ເທດ​ເພື່ອ​ປະກອບສ່ວນ​ເຂົ້າ​ໃນ​ການ​ພັດທະນາ​ເຂດ​ເລືອກ​ຕັ້ງ​ຂອງ​ຕົນ ລວມມູນ​ຄ່າ 105 ລ້ານ​ກວ່າ​ກີບ ​ແລະ 66 ພັນ​ກວ່າ​​ໂດ​ລາ​ສະຫະລັດ ​ແລະ ວຽກງານ​ອື່ນໆອີກ​ຈຳນວນໜຶ່ງ. 

ນອກ​ນັ້ນ​ຄະນະ​ສະມາຊິກ​ສະພາ​ເພດ​ຍິງ​ຍັງ​ໄດ້​ຜ່ານ​ແຜນການ​ເຄື່ອນ​ໄຫວ​ປະຈຳ​ປີ 2018 ​ເພື່ອ​ໃຫ້​ສອດຄ່ອງ​ກັບ​ແຜນ 5 ປີ​ຂອງ​ສະມາຊິກ​ສະພາ​ແຫ່ງ​ຊາດ​ເພດ​ຍິງ, ສະມາຊິກ​ສະພາ​ປະ​ຊາ​ຊົນ​ເພດ​ຍິງ ທີ່​ໄດ້​ກຳນົດ​ໄວ້ ​ເພື່ອ​ເພີ່ມ​ທະວີ​ຄວາມ​ຮັບຜິດຊອບ, ​ແນ​ໃສ່​ຮັບປະກັນ​ການຈັດ​ຕັ້ງ​ປະຕິບັດ​ພາລະ​ບົດບາດ​ຂອງ​ຕົນ​ໃນ​ແຕ່ລະ​ໄລຍະ​ໃຫ້​ສຳ​ເລັດ​ຜົນ, ​ເພື່ອ​ຍົກ​ສູງ​ຄວາມ​ຮັບຜິດຊອບ ​ແລະ ​ຄຸນນະພາ​ບ​ໃນ​ການ​ເຄື່ອນ​ໄຫວ ຂອງ​ຄະນະ​ສະມາຊິກ​ສະພາ​ປະຊາຊົນ​ເພດ​ຍິງ ​ໃນ​ການ​ເປັນ​ເສນາ​ທິການ​ໃຫ້​ແກ່​ຄະນະ​ປະຈຳ​ສະພາ​ປະຊາຊົນ​ແຂວງ ​ໃນ​ຂົງ​ເຂດ​ວຽກງານ​ແມ່ຍິງ ​ແລະ ​ເດັກ ​ແລະ ວຽກງານ​ອື່ນໆຕາມ​ການ​ມອບໝາຍ.


ກອງ​ປະຊຸມ​ດັ່ງກ່າວ​ໄດ້​ຈັດ​ຂຶ້ນ​ໃນ​ວັນ​ທີ 29 ມັງກອນ 2018 ທີ່​ສະພາ​ປະຊາຊົນ​ແຂວງ​ຄຳ​ມ່ວນ ​ໂດຍ​ມີ​ທ່ານ ນາງ ວຽງມະນີ ຈັນທະນະ​ສິນ ຮອງ​ປະທານ​ສະພາ​ປະຊາຊົນ​ແຂວງ, ທ່ານ ນາງ​ກ້ອນ​ແກ້ວ ຫຼວງ​ໄຊ​ມຸງຄຸນ ປະທານ​ສະມາຊິກ​ສະພາ​ປະຊາຊົນ​ເພດ​ຍິງ​ແຂວງ​ຄຳ​ມ່ວນ, ມີ​ຕາງໜ້າຈາກ​ພະ​ແນ​ກການ​ອ້ອມ​ຂ້າງ ແລະ ຄະນະ​ສະມາຊິກ​ສະພາ​ປະຊາຊົນ​ປະຈຳ​ບັນດາ​ເມືອງ​ເຂົ້າ​ຮ່ວມ.

ພາບ ແລະ ຂ່າວ: ຂ່າວຄໍາມ່ວນ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.