Header Ads

ເຈົ້າໜ້າທີ່ເປີດເຜີຍຂໍ້ມູນກ່ຽວກັບຜູ້ເສຍຊີວິດຢູ່ຂົວຂ້າມນໍ້າຂອງບໍ່ແມ່ນຍ້ອນລົດໃຫຍ່




ພາຍຫຼັງມີສຽງວິພາກວິຈານ ແລະ ກາຍເປັນຂ່າວລືກ່ຽວກັບອຸບັດເຫດລົດຈັກຕຳລົດຈັກ ເສຍຊີວິດຄາທີ 2 ຄົນ, ບາດເຈັບສາຫັດ 1 ຄົນ ຢູ່ຂົວຂ້າມນໍ້າຂອງປາກເຊ-ໂພນທອງ ໃນຄືນຂອງວັນທີ 19 ມັງກອນ 2018 ຜ່ານມາ ວ່າເປັນຍ້ອນລົດໃຫຍ່ຕຳແລ້ວໜີ ພາໃຫ້ເກີດອຸບັດເຫດຮ້າຍແຮງດັ່ງກ່າວ. ທາງເຈົ້າໜ້າທີ່ໆກ່ຽວຂ້ອງອອກມາເປີດເຜີຍວ່າບໍ່ແມ່ນຄວາມຈິງ ພາຍຫຼັງເຈົ້າໜ້າທີ່ສືບສວນ-ສອບສວນລົງກວດສອບສະຖານທີ່ເກີດເຫດ ແລະ ກ້ອງວົງຈອນປິດໃນບໍລິເວນອ້ອມຂ້າງ.

ທ່ານ ພັນໂທ ສະຫວັດ ແສງຈັນປະເສີດ ຫົວໜ້າພະແນກຈະລາຈອນແຂວງຈຳປາສັກໃຫ້ສຳພາດຕໍ່ນັກຂ່າວໜັງສືພິມຈຳປາໃໝ່ໃນວັນທີ 23 ມັງກອນ 2018 ນີ້ວ່າ:ຜ່ານການສືບສວນ-ສອບສວນຂອງເຈົ້າໜ້າທີ່ໆກ່ຽວຂ້ອງຂັ້ນແຂວງ, ສົມທົບກັບເມືອງ ແລະ ຍາດພີ່ນ້ອງຂອງຜູ້ເສຍຊີວິດ ກ່ຽວກັບສາເຫດທີ່ພາໃຫ້ເກີດອຸບັດເຫດແມ່ນຍ້ອນລົດຈັກຕຳລົດຈັກແລ້ວມີຜູ້ເສຍຊີວິດຄາທີ່ 2 ຄົນ, ບາດເຈັບສາຫັດ 1 ຄົນ ໃນເວລາ 23 ໂມງ ຂອງວັນທີ 19 ມັງກອນ 2018 ຜ່ານມາທີ່ຂົວຂ້າມແມ່ນໍ້າຂອງ ວ່າເປັນຍ້ອນລົດໃຫຍ່ຕຳລົດຈັກແລ້ວຫຼົບໜີ ຖືວ່າບໍ່ແມ່ນຄວາມຈິງ. ໂດຍອີງໃສ່ຂໍ້ມູນຫຼັກຖານຂອງເຈົ້າໜ້າທີ່ໄດ້ລົງກວດກາສະຖານທີ່ເກີດເຫດບໍ່ພົບສິ້ນສວນຂອງລົດໃຫຍ່ ແລະ ຫຼັກຖານອື່ນໆທີ່ກ່ຽວຂ້ອງກັບລົດໃຫຍ່; ບວກກັບການກວດກາຂໍ້ມູນຈາກກ້ອງວົງຈອນປິດບໍລິເວນອ້ອມຂ້າງທາງເຂົ້າຂົວ ( ກ້ອງ 3 ໜ່ວຍຢູ່ຂົວສອງຟາກ ແລະ ຢູ່ກາງຂົວແມ່ນໃຊ້ການບໍ່ໄດ້ )ແມ່ນບໍ່ພົບເຫັນວ່າເປັນຍ້ອນລົດໃຫຍ່ຕຳລົດຈັກແລ້ວຫຼົບໜີ. ແຕ່ສາເຫດຂອງການເກີດອຸບັດເຫດທີ່ແທ້ຈິງຈະເກີດຈາກບັນຫາຫຍັງແນວໃດນັ້ນ ຍັງຢູ່ໃນຂັ້ນຕອນການສືບສວນ-ສອບສວນຂອງເຈົ້າໜ້າທີ່ ແລະ ຄຳໃຫ້ການຂອງຜູ້ລອດຊີວິດທີ່ຍັງໃຫ້ການບໍ່ທັນໄດ້. ສຳລັບຜູ້ເສຍຊີວິດ 2 ຄົນແມ່ນທ້າວຂຽວ ແລະ ທ້າວ ພິລາລົມ ອາຊີບນັກສຶກສາ, ສ່ວນຜູ້ລອດຊີວິດແມ່ນທ້າວ ໝູຫິງ ອາຊີບນັກສຶກສາ ເຊັ່ນດຽວກັນ.


ທ່ານ ພັນໂທ ສະຫວັດ ແສງຈັນປະເສີດ ໃຫ້ຮູ້ຕື່ມວ່າ: ພຽງ 2 ວັນ ຂອງເດືອນມັງກອນ 2018 ມີຜູ້ເສຍຊີວິດຈາກອຸບັດເຫດຄາທີ່ເຖິງ 5 ຄົນຄື: ໃນວັນທີ 19 ຕາຍ 4 ຄົນ. ໃນນັ້ນເກີດຈາກອຸບັດເຫດເທິງຂົວຂ້າມນ້ຳຂອງລົດຈັກຕຳລົດຈັກເສຍຊີວິດຄາທີ 2 ຄົນ, ລົດຈັກຕຳກົ້ນລົດໃຫຍ່ຢູ່ບ້ານຫວ້ຍຍາງຄຳຕາຍ 1 ຄົນ, ລົດຈັກເສຍຫຼັກລົ້ມເອງຢູ່ເມືອງໂຂງຕາຍ 1 ຄົນ ແລະ ວັນທີ 20 ມັງກອນ ລົດຈັກຕໍາຂົວບ້ານຫຼັກ 30 ເມືອງປະທຸມພອນ ຕາຍຄາທີ່ 1 ຄົນ.


ຂ່າວ-ພາບ : ຄຳຫຼ້າ ( ໜັງສືພິມຈໍາປາໃໝ່)

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.