Header Ads

ທ່ານ ພັນຄຳ ວິພາວັນ ເນັ້ນໃຫ້ອຳນາດການປົກຄອງເມືອງງາເອົາໃຈໃສ່ແກ້ໄຂຄວາມທຸກຍາກຂອງປະຊາຊົນ



ໃນຕອນເຊົ້າຂອງວັນທີ 24 ມັງກອນ 2018 ນີ້ ທ່ານ ປ ອ ພັນຄຳ ວິພາວັນ ກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ ສປປ ລາວ ພ້ອມດ້ວຍພັນລະຍາແລະຄະນະໄດ້ເດີນທາງຢ້ຽມຢາມເຮັດວຽກທີ່ເມືອງງາແຂວງ ອຸດົມໄຊ ພາຍຫລັງເດີນທາງມາຮອດກໍ່ໄດ້ຮັບການຕ້ອນຮັບຈາກ ທ່ານ ເພັດສາຄອນ ຫລວງອາໄພ ກຳມະການສູນກາງພັກເລຂາພັກແຂວງ ເຈົ້າແຂວງ ອຸດົມໄຊ, ທ່ານ ຄຳແສງ ຢາງຈັກກິ ກຳມະການພັກແຂວງ ເລຂາພັກເມືອງ ເຈົ້າເມືອງເມືອງງາ ມີບັນດາທ່ານການນຳແຂວງ, ອຳນາດການປົກຄອງເມືອງ ທະຫານຕຳຫລວດ ພະນັກງານລັດຖະກອນ ນັກທຸລະກິດຕະຫລອດຮອດພໍແມ່ປະຊາຊົນບັນດາເຜົ່າໃນເທດສະບານເມືອງງາອອກຕ້ອນຮັບຢ່າງອົບອຸ່ນ. 



ຫລັງຈາກນັ້ນໄດ້ເຂົ້າພົບປະໂອລົມກັບອຳນາດການປົກຄອງເມືອງ, ພະນັກງານຫລັກແຫລ່ງ ແລະ ພະນັກງານອາວຸໂສບຳນານທີ່ສະໂມສອນເມືອງງາ, ໂອກາດນີ້ທ່ານ ຄຳແສງ ຢາງຈັກກິ ເຈົ້າເມືອງໆ ງາ ໄດ້ລາຍງານສະພາບການຈັດຕັ້ງແຜນພັດທະນາເສດຖະກິດສັງຄົມຂອງເມືອງໃຫ້ຊາບ. ເມືອງງາເປັນເມືອງໜື່ງຂອງແຂວງ ອຸດົມໄຊເຊີ່ງເປັນເມືອງພູດອຍຫ່າງໄກສອກຫລີກທີ່ຍັງທຸກຍາກປະກອບມີ 61 ບ້ານ 5,700 ຄົວເຮືອນ ມີພົນລະເມືອງ 31,827 ຄົນ ຍິງ 15,3654 ຄົນ ໃນນີ້ມີບ້ານທຸກຍາກ 44 ບ້ານ ກວມ 72% ຄົວເຮືອນທຸກຍາກ 2,922 ຄົວເຮືອນກວມ 56,8% ແລະ ອັດຕາສ່ວນປະຊາກອນທຸກກວມເອົາ 60% ການຈັດຕັ້ງປະຕິບັດວຽກງານຜ່ານມາດ້ານການເມືອງໄດ້ຫັນເອົາຄະນະພັກເມືອງ, ພະນັກງານຫລັກແຫລ່ງ ລົງເປັນເລຂາພັກຮາກຖານກຸ່ມບ້ານ, ສ້າງແຜນເຕົ້າໂຮມບ້ານນ້ອຍເປັນບ້ານໃຫຍ່, ຈັດສັນອາຊີບຄົງທີ່ໃຫ້ປະຊາຊົນ, ສ້າງແຜນພັດທະນາບ້ານໃຫຍ່ໃຫ້ກາຍເປັນຕົວເມືອງນ້ອຍຢູ່ຊົນນະບົດ, ເສດຖະກິດມີການຂະຫຍາຍຕົວໃນລະດັບ 7%ຕໍ່ປີ ລວມຍອດຜະລິດຕະພັນພາຍໃນສະເລ່ຍ 866 ໂດລາສະຫະລັດຕໍ່ຄົນຕໍ່ປີ, ປະຈຸບັນມີຈຳນວນບ້ານທີ່ມີເສັ້ນທາງເຂົ້າເຖີງ 59 ບ້ານກວມ 96%ແຕ່ຈຳນວນໜື່ງເປັນພຽງທາງທະລຸ, ມີໄຟຟ້າເຂົ້າເຖີງ 47 ບ້ານກວມ 76%, ເອົາໃຈໃສ່ຕິດຕາມຊຸກຍູ້ໂຄງການກໍ່ສ້າງເສັ້ນທາງລົດໄຟຊ່ວງຜ່ານເມືອງງາໄລຍະທາງ 51 ກິໂລແມັດ. 



ດ້ານວັດທະນະທຳສັງຄົມໄດ້ເອົາໃຈໃສ່ຈັດຕັ້ງປະຕິບັດຍຸດທະສາດແຜນການສຶກສາ ອັດຕາເຂົ້າຮຽນຂອງເດັກໃນເກນອາຍຸບັນລຸ 98,6%, ຕາໜ່າງສາທາລະນະສຸກກວມ 100% ປະກາດເປັນບ້ານວັດທະນະທຳໄດ້ 23 ບ້ານ, ວຽກງານປ້ອງກັນຊາດ, ປ້ອງກັນຄວາມສະຫງົບໄດ້ເອົາໃຈໃສ່ໃນການສ້າງບ້ານປ້ອມໝັ້ນສູ້ຮົບຕິດລຽນ, ສະກັດກັ້ນ ແລະ ປາບປາມຢາເສບຕິດ, ຫັນເອົາວຽກງານປ້ອງກັນຊາດປ້ອງກັນຄວາມສະຫງົບເປັນຂອງປວງຊົນ ເຮັດໃຫ້ເມືອງງາມີຄວາມສະຫງົບໂດຍພື້ນຖານ. 





ໂອກາດນີ້ທ່ານ ພັນຄຳ ວິພາວັນ ໄດ້ໂອ້ລົມໃຫ້ທິດຊີ້ນຳແກ່ການຈັດຕັ້ງປະຕິບັດແຜນພັດທະນາເສດຖະກິດສັງຄົມຂອງອຳນາດການປົກເມືອງເຊີ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດໃນການຈັດຕັ້ງປະຕິບັດໄລຍະຜ່ານມາພ້ອມນັ້ນທ່ານຍັງໄດ້ແຈ້ງສະພາບການພາຍໃນປະເທດແລະສາກົນໃຫ້ຊາບພ້ອມນັ້ນຍັງໄດ້ເນັ້ນໃຫ້ອຳນາດການປົກຄອງເມືອງສືບຕໍ່ເອົາໃຈໃສ່ໃນການພັດທະນາເສດຖະກິດສັງຄົມໂດຍສະເພາະແມ່ນການແກ້ໄຂຄວາມທຸກຍາກຂອງປະຊາຊົນໃຫ້ຫລຸດພົ້ນອອກຈາກຄວາມທຸກຍາກ, ຊຸກຍູ້ປະຊາຊົນໃຫ້ຜະລິດເປັນສິນຄ້າ, ຊອກຕະຫລາດເພື່ອຮອງຮັບການຜະລິດຂອງປະຊາຊົນ ແລະ ເອົາໃຈໃສ່ຫັນລົງກໍ່ສ້າງຮາກຖານການເມືອງໃຫ້ບ້ານມີຄວາມເຂັ້ມແຂງ

ໂອກາດລົງມາຢ້ຽມຢາມເມືອງງາຄັ້ງນີ້ທ່ານ ພັນຄຳ ວິພາວັນ ພ້ອມດ້ວຍພັນລະຍາໄດ້ນຳເອົາເຄື່ອງກັນຫນາວຈຳນວນໜື່ງມອບໃຫ້ອຳນາດການປົກຄອງເມືອງງາເພື່ອແຈກຢາຍໃຫ້ແກ່ປະຊາຊົນຜູ້ທີ່ທຸກຍາກຂາດເຂີນເຊີ່ງປະກອບດ້ວຍຜ້າຫົ່ມແລະເສື້ອກັນຫນາວ ຫລັງຈາກສຳເລັດການຢ້ຽມຢາມເມືອງງາທ່ານພ້ອມດ້ວຍຄະນະໄດ້ສືບຕໍ່ເດີນທາງເຮັດວຽກທີ່ແຂວງ ອຸດົມໄຊ.


ພາບ ແລະ ຂ່າວ:ຄຳພູສະຫວັນ ເພັນສະຫວັດ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.