Header Ads

ພັດທະນາລ້ອງຫ້ວຍຊີ ກຸ່ມເມືອງຂາຍ ເມືອງຫຼວງພະບາງ ເປັນແຫຼ່ງທ່ອງທ່ຽວລ່ອງເຮືອ



ຫວ້ຍຊີ ແມ່ນໜຶ່ງໃນສາຍນໍ້າ ທີ່ໄຫຼສູ່ແມ່ນໍ້າຂອງ ເຊິ່ງຕັ້ງຢູ່ເຂດກຸ່ມເມືອງຂາຍ ມີຕົ້ນນໍ້າມາຈາກເຂດບ້ານລອ້ງເລົາ ເປັນສາຍນໍ້າໄຫຼຜ່ານນໍ້າຕົກຕາດກວາງຊີ ໃນນັ້ນໄດ້ຜ່ານ 3 ບ້ານຄື: ບ້ານທ່າແປ້ນ, ບ້ານອູ້ ແລະ ບ້ານປາກຊີ ແມ່ນສາຍນໍ້າທີ່ຈັດຢູ່ໃນປະເພດຫ້ວຍ ທີ່ມີຄວາມອຸດົມສົມບູນໄປດ້ວຍສັດນໍ້ານາໆຊະນິດ ແລະ ອ້ອມຮອບດ້ວຍປ່າໄມ້ທີ່ຂຽວງາມ ແລະ ຊຸມເຢັນ ຕິດພັນກັບວິຖີຊີວິດຂອງປະຊາຊົນຂົງເຂດນີ້,ຜ່ານການສໍາຫຼວດຂອງອົງການທີ່ກ່ຽວຂ້ອງ ແລະ ຜ່ານການຄົ້ນຄວ້າຂອງອົງການປົກແຂວງຫຼວງພະບາງ ເພື່ອຈະພັດທະນາເປັນແຫຼ່ງທ່ອງທ່ຽວທາງທໍາມະຊາດ.ດັ່ງນັ້ນໃນຕອນເຊົ້າຂອງວັນທີ 18 ມັງກອນ 2018 ນີ້ ພະແນກແຜນການ ແລະ ການລົງທືນແຂວງຫຼວງພະບາງ ກໍໄດ້ຮ່ວມລົງນາມ ກັບ ບໍລິສັດທ່ອງທ່ຽວລາວ ເນວິເກເຕີສາກົນຈໍາກັດ ໂດຍແມ່ນທ່ານ ນາງ ສີລິພອນ ສຸພັນທອງ ຫົວໜ້າພະແນກແຜນການ ແລະ ການລົງທືນແຂວງຫຼວງພະບາງ ແລະ ທ່ານ ທອງຈັນ ຄໍາໄຊເຫວີນ ຜູ້ອໍານວຍການບໍລິສັດທ່ອງທ່ຽວລາວ ເນວິເກເຕີສາກົນຈໍາກັດ ເປັນຜູ້ລົງນາມເຊັນສັນຍາ ໂດຍຊ້ອງໜ້າ ທ່ານ ບຸນສົມ ຄຸນມະນີ ຮອງປະທານສະພາປະຊາຊົນແຂວງ ຫຼວງພະບາງ, ມີພາກສ່ວນທີ່ກ່ຽວຂ້ອງທັງສອງຝ່າຍພ້ອມດ້ວຍແຂກຖືກເຊີນ, ອົງການປົກຄອງພາຍໃນ 3 ບ້ານເຂົ້າຮ່ວມເປັນພສັກຂີພະຍານ. 

ສໍາລັບເນື້ອໃນຂອງສັນຍາ ວ່າດ້ວຍການສໍາປະທານທີ່ດິນລັດ ອົງການປົກຄອງແຂວງ ແລະ ຄະນະກໍາມະການສົ່ງເສີມການລົງທືນ,ໄດ້ຕົກລົງເຫັນດີໃຫ້ຜູ້ສໍາປະທານພັດທະນາລ້ອງຫ້ວຍຊີ ເພື່ອພັດທະນາເປັນແຫຼ່ງທ່ອງທ່ຽວ ລ່ອງເຮືອຢາງ ຢູ່ເຂດບ້ານທ່າແປ້ນ, ບ້ານອູ້ ແລະ ບ້ານປາກຊີ ເມືອງຫຼວງພະບາງ, ພັດທະນາໃຫ້ກາຍເປັນສະຖານທີ່ທ່ອງທ່ຽວລ່ອງເຮືອຢາງ ເພື່ອສ້າງລາຍຮັບຈາກການພັດທະນາລ້ອງຫ້ວຍຊີໃນໄລຍະຍາວ ຕິດພັນກັບການອະນຸລັກທາງດ້ານທໍາມະຊາດ, ດ້ານວັດທະນະທໍາ, ສິ່ງແວດລ້ອມທີ່ຢຶນຍົງ ແລະ ສີຂຽວຢູ່ບໍລິເວນຂອບເຂດບ້ານດັ່ງກ່າວ,ມີຂອບເຂດທີ່ໄດ້ຮັບສິດສໍາປະທານໃນເນື້ອທີ່ 6 ເຮັກຕາ,540 ຕາແມັດ ມີຄວາມຍາວຂອງສາຍນໍ້າ 3.064 ແມັດ.


 ໂຄງການໄດ້ພັດທະນາບຸກເບີກເນື້ອທີ, ອານາໄມແລວທາງລ່ອງເຮືອຢາງ, ກໍ່ສ້າງຫ້ອງນໍ້າ, ຈຸດພັກເຊົາ, ຈຸດປ່ອຍເຮືອ, ຈຸດສິ້ນສຸດ ແລະ ບ່ອນຮັບແຂກ ຕາມການອະນຸມັດດໍາເນີນທຸລະກິິດຂອງຂະແໜງການທີ່ກ່ຽວຂ້ອງຂອງແຂວງຫຼວງພະບາງ ແລະ ສອດຄ່ອງກັບລະບຽບກົດໝາຍຂອງ ສປປລາວ. ໄລຍະການສໍາປະທານຕາມການສັນຍາແມ່ນ 30 ປີ ນັບແຕ່ມື້ລົງລາຍເຊັນຄື ວັນທີ 18 ມັງກອນ(1) 2018 ເຖິງ 18 ມັງກອນ(1) 2048 ເປັນການລົງທືນຂອງເອກະຊົນພາຍໃນ 100% ໂດຍແມ່ນບໍລິສັດທ່ອງທ່ຽວລາວ ເນວິເກເຕີຈໍາກັດ ໂດຍທ່ານ ທອງຈັນ ຄໍາໄຊເຫວີນ ເປັນຜູ້ຖືຮຸ້ນ ໃນມູນຄ່າການລົງທືນຕາມແຕ່ລະຂັ້ນຕອນ ທັງໝົດຂອງໂຄງການ 82.390 ໂດລາສະຫະລັດ ໃນນັ້ນໄດ້ປະຕິບັດຕາມຫຼັກການລະ ບຽບກົດໝາຍໂດຍສະເພາະແມ່ນມາດຕາ 15 ຂອງກົດໝາຍ ການສົ່ງເສີມການລົງທືນໂຄງການສໍາປະທານເນື້ອທີ່ດິນລັດ ທັງນີ້ກໍ່ເພື່ອໃຫ້ໂຄງການກໍານົດແຜນກິດຈະກໍາຕ່າງໆ ຈັດຕັ້ງປະຕິບັດສອດຄ່ອງຕາມບົດບັນທຶກເຊັນສັນຍາແຜນການພັດທະນາການທ່ອງທ່ຽວໃຫ້ຖືກຕ້ອງຕາມວັດທະນະທໍາອັນດີງາມຂອງທ້ອງຖິ່ນ ເມືອງມໍລະດົກໂລກ ຫຼວງພະບາງ ແລະ ເຮັດໃຫ້ປະຊາຊົນໃນລ້ອງຫ້ວຍຊີມີລາຍຮັບຈາກການທ່ອງທ່ຽວ ສາມາດປັບປຸງຊີວິດການເປັນຢູ່ໃຫ້ດີຂື້ນເທື່ອລະກ້າວ. 

ຂ່າວ: ເພັດສາຄອນ ສິມມະວົງ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.