Header Ads

ປີ 2018 ອັດຕະປື ວາງຄາດໝາຍຈະມີນັກທ່ອງທ່ຽວ 160.000 ຄົນ



ໃນປີ 2018 ນີ້ ແຂວງອັດຕະປື ກໍຄື ພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວແຂວງ ໄດ້ຄາດໝາຍສູ້ຊົນ ໃຫ້ນັກທ່ອງທ່ຽວເຂົ້າມາ 160.000 ຄົນເນື່ອງຈາກວ່າ ປີ 2018 ນີ້ ເປັນປີທ່ອງທ່ຽວລາວ ເຊິ່ງແຂວງອັດຕະປື ກໍໄດ້ກຽມສະເຫລີມສະຫລອງ 20 ກິດຈະກຳ ທີ່ຕິດພັນກັບ ການທ່ອງທ່ຽວ ເພື່ອດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາຮ່ວມຊົມ.



ຂໍ້ມູນດັ່ງກ່າວ ໄດ້ການຢືນຢັນຈາກ ທ່ານາງ ບຸນນານ ບຸນນະແສງ ຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຂວງອັດຕະປື ໃນກອງປະຊຸມສະໄໝສາມັນ ເທື່ອທີ 4 ຂອງສະພາ ປະຊາຊົນແຂວງ ຊຸດທີ I ເມື່ອບໍ່ດົນຜ່ານມາ. ເພື່ອບັນລຸຕາມຄາດໝາຍດັ່ງກ່າວ ທາງແຂວງຈະຕ້ອງໄດ້ມີຈຸດສຸມລົງທຶນ ຂອງພາກລັດໃສ່ບາງກິດຈະການ ເພື່ອກະຕຸກຊຸກຍູ້ ໃຫ້ການ ທ່ອງທ່ຽວ ຂະຫຍາຍຕົວ ເປັນຕົ້ນ ແມ່ນເສັ້ນທາງຜ່ານ ແຫລ່ງທ່ອງທ່ຽວ ແຊພະ-ແຊປ້ອງໄລ, ເສັ້ນທາງບໍລິການໜ້າເຂື່ອນເຊກະ  ໝານໄປຫາໜອງຟ້າ, ສຸມໃສ່ວາງແຜນພັດທະນາ ຜູ້ປະກອບ ການ ບໍລິການແຫລ່ງທ່ອງທ່ຽວ ວັດທະ ນະທຳ ທີ່ເປັນບູລິມະສິດຂອງແຂວງ ເຊັ່ນ: ວັດທາດພະໄຊ, ວັດສະເເຄະ ແລະ ແຫລ່ງທ່ອງທ່ຽວອື່ນໆ ໃຫ້ກາຍເປັນຈຸດໝາຍປາຍທາງ ຂອງນັກ ທ່ອງທ່ຽວມາ ແຂວງອັດຕະປື. ດັ່ງນັ້ນ ວຽກທ່ອງທ່ຽວ ແມ່ນໜ້າທີ່ຂອງທົ່ວສັງຄົມ, ອົງການຈັດຕັ້ງທຸກພາກສ່ວນ, ອຳນາດການປົກຄອງ ແລະ ຫົວໜ່ວຍຜູ້ປະກອບການ, ພົນລະເມືອງ ທຸກຄົນ ຕ້ອງໄດ້ມີສ່ວນຮ່ວມ ໃນການພັດທະນາ ແລະ ຮັບຜົນປະໂຫຍດ ຈາກການທ່ອງທ່ຽວ.

ແຂວງອັດຕະປື ມີຈັງຫວະຕົວເລກນັກທ່ອງທ່ຽວ ເພີ່ມຂຶ້ນໃນແຕ່ລະປີ ເປັນຕົ້ນ ປີ 2012 ມີນັກທ່ອງທ່ຽວສູງເຖິງ 95.404 ຄົນ, ປີ 2013 ມີ 113.151 ຄົນ, ປີ 2014 ມີ 154.846 ຄົນ, 2015 ມີ 160.223 ຄົນ, ມີ 2016 ມີ 130.773 ຄົນ, ສ່ວນປີ 2017 (ແຜນປີໃຫ້ໄດ້ 56.878 ຄົນ) ແຕ່ຕົວຈິງມີນັກທ່ອງທ່ຽວ ພຽງແຕ່ 54.000 ຄົນ ເຊິ່ງເປັນຕົວເລກທີ່ຄາດເຄື່ອນ ຍ້ອນສາເຫດ ໃນຕົວ-ນອກຕົວ ແລະ ບັນຫາລວມຂອງໂລກ.


ໂດຍ: ມາລາທິບ (ຂປລ)

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.