Header Ads

ນາຍົກລັດຖະມົນຕີ ຕ້ອນຮັບຄະນະຜູ້ແທນນະຄອນໂຮ່ຈິມິນ



ໃນຕອນເຊົ້າ ຂອງວັນທີ 23 ມັງກອນ 2018 ທີ່ສຳນັກງານນາຍົກລັດຖະມົນຕີ, ສະຫາຍ ທອງລຸນ ສີສຸລິດ ກຳມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບ ຂອງສະຫາຍ ຫງວຽນ ທ້ຽນ ເຍີນ ກຳມະການກົມການເມືອງສູນກາງພັກ, ເລຂາຄະນະພັກ, ຫົວໜ້າຄະນະສະມາຊິກສະພາແຫ່ງຊາດ ນະຄອນໂຮ່ຈິມິນ ແຫ່ງ ສສ ຫວຽດນາມ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ນະຄອນຫຼວງວຽງຈັນ ໃນລະຫວ່າງ ວັນທີ 22-26 ມັງກອນ 2018.



 ​ໃນໂອກາດດັ່ງກ່າວ, ສະຫາຍ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ການມາຢ້ຽມ ຢາມ ແລະ ເຮັດວຽກ ຢູ່ນະຄອນຫຼວງວຽງຈັນ ຂອງສະຫາຍ ຫງວຽນ ທ້ຽນ ເຍີນ ໃນຄັ້ງນີ້. ພ້ອມທັງ ຕີລາຄາສູງ ຕໍ່ການພັດທະນາເສດຖະກິດ-ສັງຄົມ ຂອງນະຄອນໂຮຈິມິນ ພາຍໃຕ້ການນຳພາຊີ້ນຳ ຂອງສະຫາຍ ຫງວຽນ ທ້ຽນ ເຍີນ ທີ່ມີບົດຮຽນ ແລະ ປະສົບການ ຈາກການເຄີຍດຳລົງຕຳແໜ່ງ ໃນຫຼາຍຂົງເຂດວຽກງານ ທັງສູນກາງ ແລະ ທ້ອງຖິ່ນ ເຊິ່ງເຊື່ອໝັ້ນໄດ້ວ່າ ນະຄອນຫຼວງວຽງຈັນ ຍັງຈະຕ້ອງໄດ້ຂໍການສະໜັບສະໜູນ-ຊ່ວຍເຫຼືອ ແລະ ໄປຖອດຖອນບົດຮຽນຫຼາຍຢ່າງ ຈາກນະຄອນໂຮຈິມິນ. ນອກນັ້ນ, ສະຫາຍ ທອງລຸນ ສີສຸລິດ ກໍ່ໄດ້ສະແດງຄວາມຂອບໃຈ ຕໍ່ການສະໜັບສະໜູນ-ຊ່ວຍເຫຼືອ ຂອງຝ່າຍ ສສ ຫວຽດນາມ ແກ່ ສປປ ລາວ ໃນດ້ານຕ່າງໆ ເຊິ່ງໄດ້ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາ ສປປ ລາວ ເວົ້າລວມ, ເວົ້າສະເພາະ ກໍ່ຄື ນະຄອນຫຼວງວຽງຈັນ, ເຮັດໃຫ້ວຽກງານຮອບດ້ານ ໄດ້ຮັບການພັດທະນາດີຂຶ້ນເປັນກ້າວໆ.



ໃນໂອກາດດຽວກັນ, ສະຫາຍເລຂາຄະນະພັກນະຄອນໂຮ່ຈິມິນ ກໍ່ໄດ້ສະແດງຄວາມຂອບໃຈ ຕໍ່ການຕ້ອນຮັບຢ່າງອົບອຸ່ນ ຂອງສະຫາຍນາຍົກລັດຖະມົນຕີ ໃນຄັ້ງນີ້ ພ້ອມທັງ ແຈ້ງໃຫ້ສະຫາຍນາຍົກລັດຖະມົນຕີ ໄດ້ຮັບຊາບ ກ່ຽວກັບແຜນການເຄື່ອນໄຫວຢ້ຽມຢາມ ແລະ ເຮັດວຽກຢູ່ນະຄອນຫຼວງວຽງຈັນ ກໍ່ຄື ຜົນສຳເລັດໃນການພົວພັນຮ່ວມມື ລະຫວ່າງ ນະຄອນໂຮຈິມິນ ແລະ ນະຄອນຫຼວງວຽງຈັນ ໃນໄລຍະຜ່ານມາ ລວມທັງ ທິດທາງແຜນການພົວພັນຮ່ວມມືກັນໃນຕໍ່ໜ້າ. ນອກນັ້ນ, ກໍ່ຍັງໄດ້ແຈ້ງໃຫ້ຊາບ ຕໍ່ກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງນະຄອນໂຮ່ຈິມິນ ໃນຊຸມປີທີ່ຜ່ານມາ ໂດຍໄດ້ຍົກໃຫ້ເຫັນຜົນສຳເລັດອັນພົ້ນເດັ່ນ ແລະ ສິ່ງທີ່ນະຄອນໂຮ່ຈິມິນ ມີທ່າແຮງ, ເຊິ່ງໄດ້ຖອດຖອນ ຜົນສຳເລັດດັ່ງກ່າວ ເປັນບົດຮຽນ ແລະ ພວມຈັດຕັ້ງຜັນຂະຫຍາຍສູ່ທ້ອງຖິ່ນຕ່າງໆ ໃຫ້ກວ້າງຂວາງອອກຕື່ມ.​





ແຫລ່ງ: ຫ້ອງວ່າການສຳນັກງານນາຍົກລັດຖະມົນຕີ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.