Header Ads

ພີທີເປີດງານນະມັດສະການພຣະທາດໂຜ່ນ ແລະ ຕ້ອນຮັບປີທ່ອງທ່ຽວລາວ 2018




ແຂວງສະຫວັນນະເຂດ :  ງານນະມັດສະການພຣະທາດໂຜ່ນ ແລະ ງານຕະຫຼາດນັດວາງສະແດງ - ຈຳໜ່າຍສິນຄ້າ ເນື່ອງໃນໂອກາດຕ້ອນຮັບປີທ່ອງທ່ຽວລາວ 2018 ໄດ້ເປີດຂຶ້ນຢ່າງເປັນທາງການແລ້ວໃນວັນທີ 27 ມັງກອນ 2018 ນີ້ ຢູ່ທີ່ສາລາແຄມໜອງວັດພຣະທາດໂຜ່ນ. ໃຫ້ກຽດເຂົ້າຮ່ວມໃນພິທີຄັ້ງນີ້ໂດຍມີ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ,ທ່ານ ຄຳພູນຕຸໄພທູນ ຮອງເຈົ້າແຂວງ,ມີບັນດາທ່ານເຈົ້າເມືອງ,ຫົວໜ້າພະແນກການຕ່າງໆອ້ອມຂ້າງແຂວງເຂົ້າຮ່ວມນຳ.



ທ່ານ ຄຳວິໄສ ຜຸຍຍະວົງ ເຈົ້າເມືອງໄຊພູທອງ ໄດ້ລາຍງານຈຸດປະສົງຂອງການຈັດງານນະມັດສະການພຣະທາດໂຜ່ນ ແລະ ງານຕະຫຼາດນັດວາງສະແດງ - ຈຳໜ່າຍສິນຄ້າເນື່ອງໃນໂອກາດຕ້ອນຮັບປີທ່ອງທ່ຽວລາວ 2018 ໃນຄັ້ງນີ້ວ່າ: ການຈັດງານນະມັດສະການພຣະທາດໂຜ່ນ ອົງສັກສິດປີນີ້ ນອກຈາກຈະເປັນການອະນຸລັກຮັກສາໄວ້ທາງດ້ານຮີດຄອງປະເພນີອັນດີງາມທາງດ້ານສາສະໜາ ແລະ ວັດທະນະທຳແລ້ວ,ຍັງເປັນສັນຍາລັກແຫ່ງການເຕົ້າໂຮມຄວາມສາມັກຄີ ຂອງປະຊາຊົນຊາວເມືອງໄຊພູທອງ ແລະ ກໍ່ຍັງໄດ້ອາໃສງານປະເພນີທີ່ຍິ່ງໃຫຍ່ນີ້ ເປັນການສະເຫຼີມສະຫຼອງປີທ່ອງທ່ຽວລາວ 2018 ຂອງແຂວງສະຫວັນນະເຂດຕື່ມອີກ. ງານນະມັດສະການພຣະທາດໂຜ່ນຈະໄດ້ມີການຈັດສະເຫຼີມສະຫຼອງຢ່າງຍິ່ງໃຫຍ່ເປັນເວລາ 7 ວັນ ເຊິ່ງເລີ່ມແຕ່ວັນທີ 25 – 31 ມັງກອນ 2018 ນີ້ ພາຍໃນງານຍັງໄດ້ຮັບຊົມການແຂ່ງຂັນກິລາພື້ນບ້ານປະເພດ ດຶງເຊືອກ,ອູ້ມໝາກໂມໃຫຍ່ແລ່ນແຂ່ງກັນ,ຄາບບ່ວງໃສ່ນ້ຳຕານກ້ອນແລ່ນແຂ່ງກັນ ແລະ ຮັບຊົມການສະແດງສິລະປະວັນນະຄະດີ ຈາກພະແນກ ຖວທ ແຂວງສະຫວັນນະເຂດ,ຈາກຊາວບ້ານ,ຂະບວນສິລະປະຂອງນັກຮຽນ ຈາກໂຮງຮຽນມັດທະຍົມແຫ່ງຕ່າງໆໃນ 8 ກຸ່ມບ້ານຂອງເມືອງໄຊພູທອງ ນອກນີ້ຍັງໄດ້ຈັດງານວາງສະແດງສິນຄ້າໂອດ໋ອບຈາກ 15 ຕົວເມືອງຂອງແຂວງສະຫວັນນະເຂດ ແລະ ມີການວາງສະແດງສິນຄ້າຂອງບໍລິສັດ,ຫ້າງຮ້ານ ແລະ ບັນດາຫົວໜ່ວຍທຸລະກິດຕື່ມອີກ. ພິເສດພາຍໃນງານຍັງໄດ້ຮ່ວມຂະບວນພາເລດສະເຫຼີມສະຫຼອງປີທ່ອງທ່ຽວ ແລະ ພິທີ ແຫ່ຜາສາດເຜິ້ງຕາມປະເພນີທີ່ຄີຍປະຕິບັດກັນມາ ເພື່ອນ້ອມນະມັດສະການສັກກະລະບູຊາພຣະທາດໂຜ່ນອົງສັກສິດຮ່ວມກັນ.






ໂອກາດເຂົ້າຮ່ວມທ່ານ ຄຳພູນ ຕຸໄພທູນ ຮອງເຈົ້າແຂວງ ທັງເປັນປະທານຈັດງານສະເຫຼີມສະຫຼອງປີທ່ອງທ່ຽວຂັ້ນແຂວງ ກໍ່ໄດ້ມີຄຳເເຫັນວ່າ: ການຈັດງານນະມັດສະການພຣະທາດໂຜ່ນປີນີ້ແມ່ນມີຄວາມໝາຍສຳຄັນຍິ່ງ ເພາະເປັນການເລີ່ມຕົ້ນຈັດກິດຈະກຳໜຶ່ງໃນຈຳນວນ 7 ກິດຈະກຳເພື່ອກະກຽມໃຫ້ແກ່ງານສະເຫຼີມສະຫຼອງປີທ່ອງທ່ຽວລາວ 2018 ທີ່ແຂວງສະຫວັນນະເຂດ. ເພື່ອແນໃສ່ສົ່ງເສີມຮີດຄອງປະເພນີ ແລະ ຂະນົບທຳນຽມອັນດີງາມຂອງຊາດພ້ອມທັງເປັນການເປີດກວ້າງການທ່ອງທ່ຽວດ້ານວັດທະນະທຳ ຕິດພັນກັບການສະເຫຼີມສະຫຼອງປີທ່ອງທ່ຽວລາວ 2018 ຂອງຊາວແຂວງສະຫວັນນະເຂດ ກໍ່ຄືຊາວເມືອງໄຊພູທອງ ໃຫ້ນັບມື້ຂະຫຍາຍຕົວຢ່າງກວ້າງຂວາງ.



ພາບ ແລະ ຂ່າວ: ອັກສອນສິນ ພົມມະຈັນ/ມີເດຍລາວ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.