Header Ads

ສະຫະພັນແມ່ຍິງ ໜ່ວຍຮາກຖານພະແນກການເງິນແຂວງເຊກອງສຳເລັດກອງປະຊຸມໃຫຍ່ຄັ້ງທີ VI



ກອງປະຊຸມໃຫຍ່ຄັ້ງທີ VI ຂອງສະຫະພັນແມ່ຍິງໜ່ວຍຮາກຖານພະແນກການເງິນແຂວງເຊກອງໄດ້ໄຂຂຶ້ນ ແລະສໍາເລັດລົງໃນວັນທີ 26 ມັງກອນ ນີ້ ຢູ່ທີ່ຫ້ອງປະຊຸມພະແນກດັ່ງກ່າວ ໂດຍການເຂົ້າຮ່ວມຂອງສະຫາຍ ນາງ ວິໄລວັນ ດາລາສິນ ຮອງປະທານສະຫະພັນແມ່ຍິງແຂວງ ແລະ ສະຫາຍ ນາງ ອ່ອນນັນ ພົມມະຫາໄຊ ຄະນະພັກຮາກຖານ, ຫົວໜ້າຄັງເງິນແຫ່ງຊາດ ພ້ອມດ້ວຍຄະນະໜ່ວຍ ຕະຫຼອດຮອດສະມາຊິກສະຫະພັນແມ່ຍິງພາຍໃນໜ່ວຍຮາກຖານພະແນກດັ່ງກ່າວ ພ້ອມດ້ວຍແຂກຖືກເຊີນຈາກໜ່ວຍສະຫະພັນແມ່ຍິງພະແນກການອ້ອມຂ້າງເຂົ້າຮ່ວມ.



ສະຫາຍ ນາງ ວິໄລພອນ ໄຊຍະສຸກ ປະທານສະຫະພັນແມ່ຍິງ( ສຍ)ໜ່ວຍຮາກຖານພະແນກການເງິນແຂວງເຊກອງ ໄດ້ຜ່ານບົດລາຍງານການເຄື່ອນໄຫວວຽກງານຂອງໜ່ວຍຕົນໃນໄລຍະ 3 ປີ( 2014-2017) ຜ່ານມາໃຫ້ຮູ້ວ່າ: ປະຈຸບັນໜ່ວຍຮາກຖານຂອງພະແນກການງິນແຂວງເຊກອງ ມີສະມາຊິກທັງໝົດ 29 ສະຫາຍ, ໄລຍະ 3 ປີຜ່ານມາຄະນະໜ່ວຍຮາກຖານພວກເຮົາຍາມໃດກໍ່ເອົາໃຈໃສ່ຕໍ່ການສຶກສາອົບຮົມການເມືອງແນວຄິດໃຫ້ແກ່ສະມາຊິກພາຍໃນໜ່ວຍ ໂດຍນໍາເອົາບັນດາແນວທາງ, ມະຕິ, ຄໍາສັ່ງ, ຂໍ້ກໍານົດ ແລະ ນິຕິກໍາຕ່າງໆຂອງພັກ-ລັດ ແລະເອກກະສານທີ່ພົວພັນເຖິງການພັດທະນາ ແລະ ການປົກປ້ອງສິດຜົນປະໂຫຍດຂອງແມ່ຍິງ-ເດັກນ້ອຍ ມາເຜີຍແຜ່,ປາຖະກະຖາ ແລະ ສຳມະນາໄດ້ 2 ຄັ້ງ ມີຜູ້ເຂ້າຮ່ວມ 115 ເທື່ອຄົນ, ໄດ້ເຂົ້າຮ່ວມການເຜີຍແຜ່ເອກກະສານສໍາຄັນຕ່າງໆຂອງພັກ-ຂອງຊາດ ທີ່ແຂວງ, ພະແນກ, ອົງການຈັດຕັ້ງມະຫາຊົນຈັດຂຶ້ນຢ່າງເປັນປກກະຕິ; ເຮັດໃຫ້ເອື້ອຍ-ນ້ອງແມ່ຍິງຈຳນວນຫຼາຍໄດ້ເຊື່ອມຊຶມຢ່າງເລິກເຊິ່ງ ສາມາດຈຳແນກໄດ້ມິດ-ສັດຕູຈະແຈ້ງ, ມີຄວາມເປັນເຈົ້າການ, ເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ, ນອກນີ້ຍັງໄດ້ຕິດຕາມ, ກວດກາ, ຊຸກຍູ້ ແລະ ເກັບກຳຜົນງານການເຄື່ອນໄຫວວຽກງານ 




ພ້ອມທັງປະເມີນຜົນງານຂອງເອື້ອຍ-ນ້ອງສະມາຊິກສະຫາພັນແມ່ຍິງ ຜູ້ທີ່ມີຜົນງານທີ່ດີເດັ່ນເຊັ່ນ: ມີຜູ້ໄດ້ຮັບຫຼຽນໄຊອິດສະຫຼະຊັ້ນ II ມີ 1 ສະຫາຍ, ໃບຍ້ອງຍໍຈາກລັດຖະບານ 2 ສະຫາຍ, ຈາກກະຊວງການເງິນ 15 ສະຫາຍ, ຈາກທ່ານເຈົ້າແຂວງ 2 ສະຫາຍ, ຈາກສູນກາງ ສຍ ລາວ 20 ສະຫາຍ, ຈາກ ສຍ ແຂວງ 20 ສະຫາຍ, ໃບຊົມເຊີຍຈາກ ສຍ ແຂວງ 3 ສະຫາຍ, ຍ້ອງຍໍຈາກສູນກາງສະຫະພັນກຳມະບານລາວ 24 ສະຫາຍ, ຈາກຄະນະບໍລິຫານງານ ຊປປ ລາວ ແຂວງ 24 ສະຫາຍ; ນອກນີ້ຍັງໄດ້ຊຸກໃຫ້ເອື້ອຍນ້ອງແມ່ຍິງເອົາໃຈໃສ່ສ້າງເສດຖະກິດ, ພັດທະນາຊີວິດການເປັນຢູ່, ພັດທະນາຕົນເອງ ແລະ ຄອບຄົວໃຫ້ດີຂື້ນເທື່ອລະກ້າວ ໂດຍອີງໃສ່ເງື່ອນໄຂ ແລະ ຄວາມສາມາດຕົວຈິງຂອງແຕ່ລະຄອບຄົວ ເຊິ່ງແຕ່ລະຄອບຄົວສາມາດສ້າງລາຍຮັບໄດ້ແຕ່ 10 – 40 ລ້ານກີບ ຕໍ່ປີ; ນອກນີ້ຍັງໄດ້ຈັດຕັ້ງກຸ່ມທ້ອນເງິນ ເຊິ່ງມີສະມາຊິກກອງທຶນ 48 ຄົນ, ຍິງ 35 ຄົນ, ມີເງິນທ້ອນທັງໝົດ 39 ລ້ານກວ່າກີບ; ໄດ້ຈັດຕັ້ງເຜີຍແຜ່ເຊື່ອມຊຶມຂໍ້ແຂ່ງຂັນ 3 ດີ ໄດ້ 5 ຄັ້ງ, ມີຜູ້ເຂົ້າຮ່ວມທັງໝົດ 115 ເທື່ອຄົນ, ໄດ້ເປີດບັ້ນຂໍ້ແຂ່ງຂັນ 3 ດີ ໄດ້ 3 ຄັ້ງ, ມີສະມາຊິກເຂົ້າຮ່ວມ 65 ເທື່ອຄົນ, ຜ່ານການຈັດຕັ້ງປະຕິບັດສາມາດຄັດເລືອກຈັດປະເພດ 3 ດີປະເພດ I ມີ 20 ສະຫາຍ, ປະເພດII ມີ 3 ສະຫາຍ ເທົ່າກັບ 12,5%





ກອງປະຊຸມຄັ້ງນີ້ ສະມາຊິກ ສຍ ແມ່ຍິງພາຍໃນໜ່ວຍຍັງໄດ້ໃຊ້ສິດປ່ອນບັດຄັດເລືອກເອົາຄະນະໜ່ວຍຮາກຖານຊຸດໃໝ່ ເຊິ່ງມີຜູ້ສະໝັກເລືອກຕັ້ງ 5 ສະຫາຍ, ເລືອກເອົາ 3 ສະຫາຍ, ເຊິ່ງກອງປະຊຸມຄັ້ງປະຖົມມະລຶກໄດ້ເລືອກເອົາ ສະຫາຍນາງ ໜິງ ທ່ຽງຈັນຫອມ ເປັນປະທານ ສຍ ໜ່ວຍຮາກຖານພະແນກການເງິນແຂວງ, ສະຫາຍ ນາງ ສີພະຈັນ ອ່ອນມະນີ ເປັນຮອງປະທານ, ສະຫາຍ ນາງ ດາວວິໄລ ບຸດນາໂຄ ເປັນຮອງປະທານ ທັງເປັນປະທານກວດກາ ເພື່ອຊີ້ນຳ-ນຳພາການເຄື່ອນໄຫວວຽກງານ ແລະ ຈັດຕັ້ງປະຕິບັດມະຕິກອງປະຊຸມໃຫ່ຍຂັ້ນຂອງຕົນໃຫ້ມີຜົນສໍາເລັດຕາມລະດັບຄາດໝາຍທີ່ວາງໄວ້.




ພາບ-ຂ່າວ: ພຸດທະສອນ/ ຂ່າວແຂວງເຊກອງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com

No comments

Powered by Blogger.